ஹார்முஸ் ஜலசந்தி: ஈரானும் ஓமனும் இணைந்து புதிய திட்டமிடல் - அமெரிக்காவிற்கு ஈரான் நிபந்தனை

மேற்கு ஆசியாவில் நிலவும் பதற்றங்களுக்கு மத்தியில், ஹார்முஸ் ஜலசந்தி வழியாக புதிய கப்பல் போக்குவரத்து வழித்தடத்தை உருவாக்குவது குறித்து ஈரானும் ஓமனும் பேச்சுவார்த்தை நடத்தி வருகின்றன. இந்த வழித்தடத்தின் குறிப்பிட்ட பகுதிகள் ஈரான் மற்றும் ஓமனின் கடல் எல்லைகளின் வழியாக செல்லும் வகையில் திட்டமிடப்பட்டுள்ளது. இந்த முன்மொழியப்பட்ட பாதையில் கப்பல்களின் போக்குவரத்தை டெஹ்ரான் நிர்வாகம் மேற்கொள்ளும் என்று ஈரானின் உச்ச தேசிய பாதுகாப்பு மன்றத்தின் செயலாளர் மொஹ்சென் ரெஸாய் தெரிவித்துள்ளார்.

ஹார்முஸ் ஜலசந்தி உலகளாவிய எண்ணெய் மற்றும் திரவமாக்கப்பட்ட இயற்கை எரிவாயு போக்குவரத்தில் சுமார் ஐந்தில் ஒரு பங்கு வகிக்கும் முக்கியத்துவம் வாய்ந்த பாதையாகும். இந்த கடல்வழியை முழுமையாக மீண்டும் திறந்து வைப்பதற்கு, அமெரிக்கா ஈரான் மீதான தனது தாக்குதல்களையும் விரோதப் போக்குகளையும் நிறுத்த வேண்டும் என ஈரான் நிபந்தனை விதித்துள்ளது. அமெரிக்காவின் ராணுவ மற்றும் பொருளாதார அழுத்தங்களால் ஈரானின் பொருளாதாரம் ஏற்கனவே கடும் பாதிப்பைச் சந்தித்துள்ள நிலையில், ஜூன் மாதம் கையெழுத்திடப்பட்ட புரிந்துணர்வு ஒப்பந்தம் உத்தரவாதங்கள் இல்லாத காரணத்தால் தோல்வியடைந்ததாக ஈரான் தரப்பில் கூறப்படுகிறது.

இதற்கிடையே அமெரிக்க அதிபர் டொனால்ட் ட்ரம்ப், ஈரான் விவகாரம் குறித்து சமூக வலைதளங்களில் தொடர்ச்சியான பதிவுகளை வெளியிட்டு வருகிறார். ஈரான் வரைபடத்தை ட்ரம்ப் முக வடிவில் சித்தரித்து 'பை பை கராக்' என்ற வாசகத்துடன் அவர் பதிவிட்டிருப்பது சர்ச்சையை ஏற்படுத்தியுள்ளது. ஈரான் இடையிலான போரை முடிவுக்குக் கொண்டுவர மூன்று வழிகள் உள்ளதாக அமெரிக்க அதிகாரி ஒருவர் கருத்து தெரிவித்திருந்தாலும், அதிபர் ட்ரம்ப் அவற்றில் ஒரு குறிப்பிட்ட வழியை ஒருபோதும் தேர்ந்தெடுக்க மாட்டார் என்றும் தகவல்கள் தெரிவிக்கின்றன.