பா.ஜ.க தொடர்ந்து வெற்றி பெற்றாலும் ஒருவித தயக்கம் ஏன்? புதிய அணியிடம் மோடி - நிதின் நபின் கூறியது என்ன?

எழுதியவர்: லிஸ் மேத்யூ கடந்த வாரம் டெல்லியில் உள்ள பா.ஜ.க-வின் தேசியத் தலைமை அலுவலகத்தில் நடைபெற்ற மூடிய கதவுகளுக்குள்ளான கூட்டத்தில் கட்சியின் புதிய தேசிய நிர்வாகிகள் கூடினர். ஆனால், அந்த அறையில் வெற்றி பெற்றதற்கான ஆரவாரமான சூழல் ஏதும் நிலவவில்லை. ஆங்கிலத்தில் படிக்க: அடுத்தகட்ட நடவடிக்கைக்கான புதிய திட்டங்கள் குறித்து ஆலோசிக்க நிர்வாகிகள், பிரதமர் நரேந்திர மோடி மற்றும் கட்சித் தலைவர் நிதின் நபின் ஆகியோரைச் சந்தித்தனர். கடந்த சில ஆண்டுகளாகத் தொடர்ந்து பெற்ற தேர்தல் வெற்றிகளால் நிர்வாகிகள் சுணக்கமடைய வேண்டாம் என்று மிதமான ஆனால் உறுதியான குரலில் மோடி அறிவுறுத்தினார் எனத் தகவல்கள் தெரிவிக்கின்றன. அதிகாரத்தில் இருப்பது கட்சித் தலைவர்களுக்கும் மக்களுக்கும் இடையே ஒரு இடைவெளியை உருவாக்கிவிட்டதாக நபின் எச்சரித்ததாகவும் தகவல்கள் மேலும் தெரிவிக்கின்றன. டெல்லி ஆலோசனையில் பங்கேற்ற தலைவர்கள், பிரதமர் புதிய அணியின் மீது மிகுந்த நம்பிக்கை வைத்திருந்ததாகவும், தெளிவான செய்தியை வழங்கியதாகவும் தெரிவித்தனர். "அவர் பல மணிநேரம் அமர்ந்து புதிய நிர்வாகிகள் ஒவ்வொருவரின் பேச்சையும் உற்றுக் கேட்டார். அவர்கள் தங்களைப் பற்றியும், கட்சியில் எவ்வாறு வளர்ச்சி அடைந்தார்கள் என்பதைப் பற்றியும் பேச வைத்தார்" என்று அந்தச் சந்திப்பில் பங்கேற்ற ஒரு தலைவர் கூறினார். "பிரதமர் மோடி எப்போதும் தெளிவான பார்வையைக் கொண்டவர். 2014-இல் யு.பி.ஏ அரசுக்கு எதிரான மக்களின் கோபமே நம்மை ஆட்சிக்குக் கொண்டு வந்தது. ஆனால், 2019-ல் ஏழை எளிய மக்களுக்காக எடுக்கப்பட்ட திட்டங்களும் நாட்டின் பாதுகாப்புமே நம்மை மீண்டும் ஆட்சிக்குக் கொண்டு வந்தன என்று அவர் ஏற்கனவே நம்மிடம் கூறியிருந்தார். 2023-ல், பா.ஜ.க தனது அமைப்பின் பலத்தைக் கொண்டு லோக்சபா தேர்தலைச் சந்திக்க வேண்டும் என்று அவர் கூறினார். கட்சித் தலைவர்களும் தொண்டர்களும் மீண்டும் முன்னணியில் நிற்க வேண்டும் என்றும், நமது வெற்றிகளை நாம் எளிதாக எடுத்துக்கொள்ள முடியாது என்பதுமே அவரது செய்தியாக இருந்தது" என்று அந்தத் தலைவர் மேலும் சேர்த்துக் கூறினார். ஜென் ஸி தலைமுறையுடன் இடைவெளியா? பல்வேறு மாநிலங்களில் உள்ள நிர்வாகிகள் மற்றும் தொண்டர்கள் மத்தியில் ஒருவித தயக்கமும் அமைதியின்மையும் அதிகரித்து வரும் சூழலில்தான் இந்தக் கூட்டம் நடைபெற்றுள்ளது. புதிய அமைப்பிற்கான அணியை உருவாக்குவதில் ஏற்பட்ட தாமதம் (மாதக்கணக்கில் ஆனது) மற்றும் நீண்ட காலமாக எதிர்பார்க்கப்படும் அமைச்சரவை மாற்றம் ஆகியவை பல மூத்த தலைவர்கள் மத்தியில் ஒரு நிச்சயமற்ற சூழலை உருவாக்கியுள்ளதாக பா.ஜ.க-வின் உள்விவரம் அறிந்த சிலர் தெரிவிக்கின்றனர். ஒரு மாநில பா.ஜ.க தலைவர் விவரித்தது போல, இது பல மூத்த தலைவர்களைத் 'தங்களைத் தற்காத்துக் கொள்ளும் மனநிலைக்கு' தள்ளியுள்ளது; அந்தத் தயக்கம் மாநில அளவிலும் பரவியுள்ளது. "சொந்தப் பதவியைப் பற்றிய நிச்சயமற்ற தன்மையும் பதற்றமும் இருப்பதால், கட்சியிலும் அரசாங்கத்திலும் உள்ள ஒவ்வொரு மூத்த தலைவரும் தங்களைத் தற்காத்துக் கொள்ளும் மனநிலையிலேயே இருக்கிறார்கள். மாற்றத்தைக் குறித்த பயம் அவர்கள் தலைக்கு மேல் தொங்கிக்கொண்டே இருக்கிறது. இதனால் நிர்வாகம் பாதிக்கப்படுவதோடு, சாதாரண காரியகர்த்தாக்களும் சகிப்புத்தன்மையை இழக்கிறார்கள்" என்று அந்தத் தலைவர் கூறினார். பா.ஜ.க-வின் இந்தக் கவலைகளுக்கு மேலும் வலு சேர்க்கும் வகையில், மாநில தலைவர்களிடம் நிலவும் "வளர்ந்து வரும் இடைவெளி" மற்றும் "சலிப்புத் தன்மை" குறித்து ஆர்.எஸ்.எஸ் அமைப்பும் சுட்டிக்காட்டியுள்ளதாகத் தெரியவருகிறது. சங் பரிவார் அமைப்புகளுடன் நெருங்கிய தொடர்பிலுள்ள ஒரு மூத்த பா.ஜ.க தலைவர் கூறுகையில், 'ஜென் ஸி' தலைமுறையின் போராட்டங்கள் மற்றும் அவர்களின் பிரச்னைகள் குறித்து சில மூத்த அமைச்சர்கள் வெளியிட்ட பகிரங்க அறிக்கைகள் எதிர்மறையான விளைவையே ஏற்படுத்தியுள்ளதாகத் தெரிவித்தார். "கரப்பான்பூச்சி ஜனதா கட்சி (சி.ஜே.பி) மற்றும் அதன் தலைவர்கள் எழுப்பும் பிரச்னைகள் சரியானவை தான், ஆனால் அவர்களின் உள்நோக்கம் தவறானது என்று அமைச்சர்கள் கூறும்போது, அந்த வாதம் எவ்வாறு நிலையாக நிற்கும்? எழுப்பப்படும் பிரச்னை சரியானதாக இருக்கும்போது, அதை யார் எழுப்பினால் என்ன? இதுபோன்ற பதில்கள், கட்சியிடமோ அல்லது அரசாங்கத்திடமோ சிறந்த வாதங்கள் இல்லை என்ற எண்ணத்தை உருவாக்கிவிடும்; மேலும் அமைச்சரின் இத்தகைய கருத்துக்கள் எதிர்க்கட்சித் தலைவர்களையும் விமர்சகர்களையும் வெளிச்சத்திலேயே வைத்திருக்க உதவும்." பல்கலைக்கழகங்களுக்கு மத்திய அமைச்சர்களை அனுப்புவது எத்தகைய விளைவை ஏற்படுத்தும் என்பது குறித்தும் பல தலைவர்கள் அச்சம் தெரிவித்துள்ளனர். "மாணவர்களின் ஜனநாயக இடமான ஒரு பல்கலைக்கழகத்திற்கு ஒரு அமைச்சர் செல்லும்போது, அங்கு ஒருதலைப்பட்சமாகப் பேசுவது ஆபத்தானது. ஒருவேளை அவர் கலந்துரையாடலில் ஈடுபட்டால், அமைச்சரின் ஒவ்வொரு பதிலும் மிகுந்த கவனத்துடனும் முதிர்ச்சியுடனும் கையாளப்படாவிட்டால் அது மிகப்பெரிய சர்ச்சையாக மாறக்கூடும். இது சி.ஜே.பி மற்றும் பிற எதிர்க்கட்சிகள் கட்சியையும் அரசாங்கத்தையும் குறி வைப்பதற்கான சூழலை அமைத்துக் கொடுத்துவிடும்" என்று ஒரு தலைவர் கூறினார். டெல்லியில் சி.ஜே.பி தலைமையிலான போராட்டங்கள், அதைத் தொடர்ந்து ராஞ்சியிலும், பாட்னாவிலும் நடைபெற்ற இளைஞர் போராட்டங்கள் குறித்த தகவல்கள் மாநிலங்கள் முழுவதிலிருந்தும் பா.ஜ.க-வுக்கு வந்து கொண்டுள்ளன. கல்வி மற்றும் வேலைவாய்ப்பு போன்ற அடிப்படைப் பிரச்னைகளை நோக்கி உரையாடல் மாறியுள்ளதாகக் கட்சித் தலைவர்கள் சுட்டிக்காட்டுகின்றனர். அடுத்த ஆண்டு தொடக்கத்தில் தேர்தல் நடைபெறவுள்ள உத்தரப் பிரதேசம் போன்ற மாநிலத்தில், இந்த 'ஜென் ஸி' இடைவெளி குறித்த கவலை, உள்கட்சிப் பூசல் மற்றும் சாதி ரீதியிலான உராய்வுகளுடன் சேர்ந்து பெரிய கவலையாக மாறியுள்ளது. உத்தரப் பிரதேசத்தில் 18 முதல் 29 வயதுக்குட்பட்ட 'ஜென் ஸி' வாக்காளர்கள் மொத்த வாக்காளர்களில் 20 சதவீதத்திற்கும் அதிகமாக உள்ளனர். தேர்வு முறைகேடுகள் மற்றும் வேலையின்மை போன்ற பிரச்சினைகள் அவர்களைப் பெருமளவில் பாதித்துள்ளதாக அம்மாநில பாஜக தலைவர்கள் தெரிவிக்கின்றனர்.