பெயரை கேட்டாலே பீதி... 7 ஆண்டில் 300 ரவுடிகள் என்கவுண்டர்; பிரபல இயக்குநர் இயக்கத்தில் மாஸ் படம்!

இயக்குநர் ராம் கோபால் வர்மா (ஆர்ஜிவி) இயக்கும் புதிய க்ரைம் த்ரில்லர் திரைப்படம் குறித்த அறிவிப்பு வெளியாகி, அவரது ரசிகர்கள் மத்தியில் எதிர்பார்ப்பை ஏற்படுத்தியுள்ளது. தெலங்கானாவைச் சேர்ந்த ராம் கோபால் வர்மா, 1990 மற்றும் 2000-களில் இந்திய சினிமாவில் தனக்கென தனி பாணியை உருவாக்கிய முக்கியமான இயக்குநர்களில் ஒருவராக அறியப்பட்டார். வழக்கமான கதை சொல்லும் முறையைத் தாண்டி, வித்தியாசமான காட்சியமைப்பு, யதார்த்தமான கதாபாத்திரங்கள், இருண்ட பின்னணி மற்றும் பரபரப்பான திரைக்கதைகள் மூலம் ரசிகர்களின் கவனத்தை ஈர்த்தார். குறிப்பாக குற்றப் பின்னணியை மையமாகக் கொண்ட கதைகளை அவர் கையாண்ட விதம், இந்திய சினிமாவில் தனித்துவமான இடத்தைப் பெற்றது. ராம் கோபால் வர்மா இயக்கிய ‘சத்யா’, ‘கம்பெனி’, ‘சர்கார்’ உள்ளிட்ட திரைப்படங்கள் க்ரைம் த்ரில்லர் வகையில் குறிப்பிடத்தக்க படைப்புகளாக பார்க்கப்படுகின்றன. மும்பை நிழலுலகம், அரசியல் மற்றும் அதிகாரம், காவல்துறை நடவடிக்கைகள், குற்றவாளிகளின் வாழ்க்கை என பல்வேறு கோணங்களில் கதைகளை உருவாக்கிய ஆர்ஜிவி, கடந்த சில ஆண்டுகளில் பரீட்சார்த்தமான முயற்சிகளிலும் கவனம் செலுத்தி வந்தார். இந்த நிலையில், மீண்டும் தனது ரசிகர்களுக்கு நன்கு பரிச்சயமான க்ரைம் த்ரில்லர் களத்திற்குத் திரும்பியுள்ளார். ‘போலிஸ் கம்பெனி’ எனப் பெயரிடப்பட்டுள்ள இந்தப் புதிய திரைப்படத்தை டி-சீரிஸ் நிறுவனம் தயாரிக்கிறது. இப்படத்தின் கதாநாயகனாக நடிகர் ஹர்ஷவர்தன் ரானே நடிக்கிறார். உண்மைச் சம்பவங்களை அடிப்படையாகக் கொண்டு உருவாகும் இந்தப் படத்தில், மும்பை காவல்துறையில் பிரபலமான என்கவுன்டர் ஸ்பெஷலிஸ்டாக அறியப்பட்ட தயா நாயக் என்ற காவல்துறை அதிகாரியின் கதாபாத்திரத்தில் ஹர்ஷவர்தன் ரானே நடிக்கிறார். இதனால் படத்தின் கதைக்களம் காவல்துறை நடவடிக்கைகள், மும்பை நிழலுலகம் மற்றும் குற்ற உலகிற்கு எதிரான போலீஸ் நடவடிக்கைகளை மையமாகக் கொண்டிருக்கும் என எதிர்பார்க்கப்படுகிறது. 1990-களின் இறுதியிலும் 2000-களின் தொடக்கத்திலும் மும்பையில் நிழலுலகக் குழுக்களின் ஆதிக்கம் அதிகமாக இருந்த காலகட்டத்தை இந்தப் படம் பின்னணியாகக் கொண்டுள்ளது. குறிப்பாக 1997 முதல் 2004 வரையிலான காலகட்டத்தில் மும்பை காவல்துறையின் என்கவுன்டர் நடவடிக்கைகள் பரவலாக பேசப்பட்டன. அந்த காலகட்டத்தில் நூற்றுக்கணக்கான ரௌடிகள் என்கவுன்டரில் கொல்லப்பட்டதாகக் கூறப்படும் சம்பவங்களையும், அதனைச் சுற்றியிருந்த காவல்துறை நடவடிக்கைகளையும் அடிப்படையாகக் கொண்டு திரைப்படம் உருவாக இருப்பதாக ராம் கோபால் வர்மா தெரிவித்துள்ளார். இதனால் உண்மைச் சம்பவங்களுக்கும் சினிமா திரைக்கதைக்கும் இடையிலான அணுகுமுறை இப்படத்தில் முக்கியத்துவம் பெறும் என எதிர்பார்க்கப்படுகிறது. தயா நாயக் கதாபாத்திரத்தில் ஹர்ஷவர்தன் ரானே நடிப்பது படத்தின் மீதான எதிர்பார்ப்பை மேலும் அதிகரித்துள்ளது. காவல்துறை அதிகாரியின் பணிச்சூழல், குற்றவாளிகளை எதிர்கொள்ளும் விதம், என்கவுன்டர் நடவடிக்கைகளின் பின்னணி மற்றும் தனிப்பட்ட வாழ்க்கையில் ஏற்படும் தாக்கங்கள் என பல்வேறு அம்சங்கள் கதையில் இடம்பெற வாய்ப்புள்ளதாக கூறப்படுகிறது. ராம் கோபால் வர்மாவின் முந்தைய க்ரைம் திரைப்படங்களைப் போலவே, காவல்துறைக்கும் நிழலுலகத்திற்கும் இடையிலான மோதலை யதார்த்தமான காட்சிகளுடன் பதிவு செய்யும் முயற்சி இதில் இருக்கும் என ரசிகர்கள் எதிர்பார்த்து வருகின்றனர். இதனிடையே, ராம் கோபால் வர்மா மற்றொரு காவல்துறை பின்னணியிலான திரைப்படத்தையும் இயக்கி வருகிறார். ‘போலிஸ் ஸ்டேஷன் மெயின் பூத்’ எனக் குறிப்பிடப்படும் அந்தப் படத்தில் நடிகர் மனோஜ் பாஜ்பாயி முக்கிய கதாபாத்திரத்தில் நடிக்கிறார். ஏற்கெனவே காவல்துறை மற்றும் குற்ற உலகை மையமாகக் கொண்ட கதைகளை திறம்பட கையாண்ட இயக்குநராக அறியப்படும் ஆர்ஜிவி, ஒரே காலகட்டத்தில் இதுபோன்ற கதைக்களம் கொண்ட படங்களில் கவனம் செலுத்துவது அவரது ரசிகர்களிடையே ஆர்வத்தை ஏற்படுத்தியுள்ளது. 3 more pics of HARSHVARDHAN RANE as DAYA NAYAK in POLICE COMPANY pic.twitter.com/PKqn5BNFi6 — Ram Gopal Varma (@RGVzoomin) August 10, 2026 மும்பையின் குற்ற உலகம், என்கவுன்டர் கலாசாரம் மற்றும் காவல்துறை நடவடிக்கைகள் குறித்து பல்வேறு திரைப்படங்கள் வெளியாகியிருந்தாலும், ராம் கோபால் வர்மாவின் பார்வையில் உருவாகும் இந்தப் புதிய திரைப்படம் எந்த வகையில் வித்தியாசமாக இருக்கும் என்பதே தற்போது ரசிகர்களின் எதிர்பார்ப்பாக உள்ளது. ‘போலிஸ் கம்பெனி’ திரைப்படத்தின் வெளியீட்டு தேதி, மற்ற நடிகர்கள் மற்றும் தொழில்நுட்பக் குழுவினர் குறித்த முழுமையான தகவல்கள் அடுத்தடுத்த அறிவிப்புகளில் வெளியாகும் என எதிர்பார்க்கப்படுகிறது. மீண்டும் ஒரு அழுத்தமான க்ரைம் த்ரில்லர் மூலம் ஆர்ஜிவி தனது பழைய பாணிக்கு திரும்புகிறாரா என்பதை பொறுத்திருந்துதான் பார்க்க வேண்டும்.