செவ்வாய் கிரகத்தில் மாணிக்கம், நீலக்கல் தாதுக்கள்: நாசா பெர்சவரன்ஸ் ரோவர் புதிய சாதனை!

செவ்வாய் கிரகத்தின் 'ஜெசிரோ பள்ளத்தில்' (Jezero Crater) ஆய்வு செய்து வரும் நாசாவின் பெர்சவரன்ஸ் (Perseverance) ரோவர், அங்குள்ள பாறை ஒன்றின் மீது லேசர் கதிர்களைப் பாய்ச்சி ஆய்வு செய்தபோது எதிர்பாராத புதிய தாதுக்களைக் கண்டறிந்துள்ளது. பூமியில் மாணிக்கம் (Ruby) மற்றும் நீலக்கல் (Sapphire) போன்ற விலைமதிப்பற்ற நவரத்தினக் கற்களுடன் தொடர்புடைய தாதுக்கள் செவ்வாயில் கண்டறியப்பட்டிருப்பது, சிவப்பு கிரகம் நாம் நினைத்ததை விட மிகவும் சிக்கலான புவியியல் மாற்றங்களைக் கடந்து வந்துள்ளது என்பதைக் காட்டுகிறது. ஜெசிரோ பள்ளத்தின் விளிம்பிற்கு அருகே காணப்பட்ட பிளேஜியோகிளேஸ் (plagioclase) நிறைந்த மூன்று பாறைகளை ஆய்வு செய்தபோது இந்தக் கண்டுபிடிப்பு நிகழ்ந்தது. பெர்சவரன்ஸ் ரோவரில் உள்ள 'சூப்பர்கேம்' (SuperCam) கருவியைப் பயன்படுத்திய விஞ்ஞானிகள், அதில் 'குரோமியம் கலந்த குருந்தம்' (Chromium-bearing corundum) என்ற தாதுவின் தெளிவான தடயங்கள் இருப்பதை உறுதிப்படுத்தியுள்ளனர். பூமியில் மாணிக்கம் மற்றும் நீலக்கல் உருவாவதற்கு அடிப்படையாக இருப்பது இந்தக் குருந்தம் வகை தாதுவே ஆகும். லாஸ் அலமோஸ் தேசிய ஆய்வகத்தின் புவி வேதியியலாளர் ஆன் ஒல்லிலா (Ann Ollila) தலைமையிலான ஆய்வாளர்கள், தாங்கள் சற்றும் எதிர்பாராத பாறைகளில் இந்த அசாதாரண தாதுக்கள் கண்டறியப்பட்டுள்ளதாகத் தெரிவித்துள்ளனர். பெர்சவரன்ஸ் கண்டறிந்த இந்தத் தாதுக்கள் மிக முக்கியமானவையாகக் கருதப்படுகின்றன. ஏனெனில், இத்தகைய தாதுக்கள் உருவாவதற்குப் பாறைகளுக்கும் அதிக வெப்பம் கொண்ட சுடுநீருக்கும் இடையே ஏற்படும் வேதியியல் வினைகளே காரணமாகும். கோடிக்கணக்கான அல்லது பல பில்லியன் ஆண்டுகளுக்கு முன், செவ்வாய் கிரக பாறைகளின் இடுக்குகளில் சூடான நீர் பாய்ந்தபோது இத்தாதுக்கள் உருவாகியிருக்கலாம் என்று விஞ்ஞானிகள் கருதுகின்றனர். பூமியிலும் இதுபோன்ற வெப்ப நீர் செயல்முறைகளின் மூலமே படிகங்களும் நவரத்தினக் கற்களும் உருவாகின்றன. எனவே, செவ்வாயில் இத்தகைய செயல்முறைகள் நிகழ்ந்ததற்கான ஆதாரம் கிடைத்திருப்பது, அக்கிரகத்தின் உட்பகுதியும் மேற்பரப்பும் எவ்வாறு உருவானது என்பது பற்றிய புதிய தகவல்களை வழங்குகிறது. ஜெசிரோ பள்ளத்தில் பல காலத்திற்கு முன்பு ஒரு ஏரி இருந்ததாக நம்பப்படும் நிலையில், அங்குத் திரவ வடிவிலான தண்ணீர் செவ்வாயின் புவியியல் வரலாற்றில் பெரும் பங்காற்றியுள்ளது என்பதை இந்த ஆய்வு முடிவுகள் மேலும் உறுதிப்படுத்துகின்றன. குரோமியம் கலந்த குருந்தம் தாது கண்டறியப்பட்டிருப்பது, பல பில்லியன் ஆண்டுகளுக்கு முன்பு செவ்வாய் கிரகத்தில் நிலவிய சூழலை மறுகட்டமைப்பு செய்ய விஞ்ஞானிகளுக்கு உதவும்.செவ்வாயின் மேற்பரப்பிற்கு அடியில் நீரோட்டம் எவ்வாறு பாய்ந்தது என்பதை அறிய முடிகிறது. செவ்வாய் கிரகத்தின் பண்டைய எரிமலை மற்றும் வெப்ப நீர் செயல்பாடுகளின் வரலாற்றைப் புரிந்துகொள்ள உதவுகிறது. பண்டைய நுண்ணுயிர் வாழ்க்கைக்கான வாய்ப்பு: நீர், வெப்பம் மற்றும் வேதி வினைகள் நிறைந்த பாறைகள் ஆகியவை நுண்ணுயிரிகள் வாழ்வதற்கு ஏற்ற சூழலை உருவாக்கக்கூடியவை. இருப்பினும், இந்த கண்டுபிடிப்பு செவ்வாயில் உயிரினங்கள் வாழ்ந்தன என்பதற்கான நேரடி ஆதாரம் கிடையாது. மாறாக, பண்டைய செவ்வாய் கிரகம் எப்போதாவது உயிரினங்கள் வாழ்வதற்கு ஏற்ற தகுதியான சூழலைக் கொண்டிருந்ததா என்பதைப் புரிந்துகொள்வதற்கான மற்றொரு புவியியல் ஆதாரமாக இது விளங்குகிறது. பெர்சவரன்ஸ் ரோவர் தொடர்ந்து ஜெசிரோ பள்ளத்தை ஆய்வு செய்து, அறிவியல் ரீதியாக மதிப்புமிக்க பாறை மாதிரிகளைச் சேகரித்து வருகிறது. இந்த மாதிரிகளில் சில எதிர்காலத்தில் பூமிக்குக் கொண்டுவரப்பட்டு, அதிநவீன ஆய்வகக் கருவிகள் மூலம் மேலும் விரிவாக ஆய்வு செய்யப்பட உள்ளன. பார்ப்பதற்குச் சாதாரணமாகத் தெரியும் பாறைகளுக்குள்ளும் செவ்வாயின் பண்டைய காலநிலை, நீர் செயல்பாடு மற்றும் புவியியல் பரிணாமம் பற்றிய பிரம்மாண்ட ரகசியங்கள் ஒளிந்திருக்கலாம் என்பதை இக்கண்டுபிடிப்பு நிரூபித்துள்ளது. இந்த ஆய்வு முடிவுகள் 'ஜியோபிசிகல் ரிசர்ச் லெட்டர்ஸ்' (Geophysical Research Letters) இதழில் விரிவாக வெளியிடப்பட்டுள்ளன. மேலும், நிலவு மற்றும் கிரக அறிவியல் மாநாட்டிலும் (Lunar and Planetary Science Conference) இது ஆய்வறிக்கையாகச் சமர்ப்பிக்கப்பட்டுள்ளது.