டாஸ்மாக்கிற்கு காட்டும் வேகம் விவசாயிகளுக்கு இல்லையா? 'வெற்றி 150' திட்டத்தில் நிதி பற்றாக்குறை'-வெளுக்கும் பால்கி

தமிழக பட்ஜெட்டில் பொதுமக்களின் அடிப்படைத் தேவைகளான குடிநீர் மேலாண்மை, மகாத்மா காந்தி தேசிய ஊரக வேலைவாய்ப்பு உறுதித் திட்டம் மற்றும் கூட்டுறவு வங்கிகளில் விவசாயக் கடன் தள்ளுபடி போன்ற முக்கிய மக்கள் நலத் திட்டங்களுக்கான நிதி ஒதுக்கீடு குறித்து பல்வேறு தணிக்கை விமர்சனங்களும், குழப்பங்களும் நிலவி வருகின்றன. இதுகுறித்து அரசியல் விமர்சகர் பால்கி நக்கீரன் டிவிக்கு அளித்த பிரத்யேக நேர்காணலில் தனது பார்வைகளைப் பகிர்ந்து கொண்டார். "குடிநீர் போன்ற மக்களின் அடிப்படைத் தேவைகளுக்காக உடனடியாக 4,800 கோடி ரூபாய் தேவைப்படும் நிலையில், தற்போதைய அரசு பட்ஜெட்டில் வெறும் 3,500 கோடி ரூபாய் மட்டுமே ஒதுக்கியுள்ளது. புள்ளிவிவரக் கணக்குகளை யாரும் ஆழமாகப் பார்க்க மாட்டார்கள் என்ற மெத்தனப் போக்கில் இந்த அறிவிப்புகள் வெளியிடப்பட்டுள்ளனவா என்ற சந்தேகம் எழுகிறது. மேலும், ஊரக வேலைவாய்ப்புத் திட்டத்திற்கு 'வெற்றி 150' என்று புதிய பெயரிட்டு, வேலை நாட்களை 125 முதல் 150 நாட்களாக உயர்த்துவோம் என்று அரசு அறிவித்தது. ஆனால், தற்போதைய யதார்த்த நிலவரப்படி மக்களுக்கு வெறும் 59 நாட்கள் மட்டுமே வேலை கிடைத்து வருகிறது. தற்போது அரசு இந்தத் திட்டத்திற்கு அலாட் செய்துள்ள தொகையைக் கணக்கிட்டால், மக்களுக்கு வெறும் 47 நாட்களுக்கு மட்டும்தான் வேலை கொடுக்க முடியும் என்று தணிக்கையாளர்கள் கூறுகிறார்கள். இதனால் ஏழை எளிய கீழ்த்தட்டு மக்களுக்கான வாழ்வாதார வேலைகளில் மிகப்பெரிய சுணக்கம் ஏற்பட்டுள்ளது. அதேபோல், கூட்டுறவு வங்கிகளில் 75,000 ரூபாய் வரையிலான பயிர்க்கடன் தள்ளுபடி என்ற அறிவிப்பிலும் தெளிவில்லை. இது மாவட்ட கூட்டுறவு வங்கிகளுக்கானதா அல்லது தொடக்க வேளாண்மை கூட்டுறவு சங்கங்களின் கீழ் கடன் வாங்கிய விவசாயிகளுக்கானதா என்பதில் அரசாணை தெளிவாக இல்லை. இதனால் கடன் வாங்கிய விவசாயிகள் தொடர்ந்து குழப்பத்தில் ஆழ்ந்துள்ளனர். மதுபான நிறுவனங்களின் செயற்கை சுவைக்கான அனுமதி உத்தரவுகள் மிகத் தெளிவாகவும் வேகமாகவும் வரும் நிலையில், விவசாயிகளின் கடன் தள்ளுபடி உத்தரவுகள் ஏன் தெளிவாக வருவது இல்லை என்ற கேள்வி எழுகிறது" என்றார்.