மலர் வளர்ப்பு, தோட்டக் கலைக்கு மின் இணைப்பு: 50 சென்ட் நிலம் இருக்க வேண்டும் என்ற விதி ரத்து

சென்னை: மலர் வளர்ப்பு மற்றும் தோட்டக் கலைப் பயிர்களுக்கு மின் இணைப்பு பெற இனி குறைந்தபட்சம் 50 சென்ட் நிலம் வைத்திருக்க வேண்டும் என்ற கட்டாயம் இல்லை என்று தமிழ்நாடு மின் உற்பத்தி மற்றும் பகிர்மானக் கழகம் (TNPDCL) தெளிவுபடுத்தியுள்ளது. இதனால், சிறிய நிலம் வைத்துள்ள விவசாயிகளும் மலர் மற்றும் தோட்டக்கலைப் பயிர்களுக்குத் தேவையான மின் இணைப்பைப் பெற முடியும். இதுதொடர்பாக மின் பகிர்மானப் பிரிவு இயக்குநர் திங்கள்கிழமை விளக்கம் அளித்துள்ளார். 50 சென்ட்டுக்கும் குறைவான நிலத்தில் மலர் வளர்ப்பு மற்றும் தோட்டக்கலைப் பணிகளை மேற்கொள்பவர்களுக்கு மின் இணைப்பு வழங்க முடியுமா என்பது குறித்து பல தகவல் அறியும் உரிமைச் சட்ட மனுக்கள் பெறப்பட்டதைத் தொடர்ந்து இந்த விளக்கம் அளிக்கப்பட்டுள்ளது. வழக்கமான விவசாய மின் இணைப்புகளுக்கு தமிழ்நாடு மின்சார ஒழுங்குமுறை ஆணையத்தின் பகிர்மான விதிமுறைகளில் 50 சென்ட் குறைந்தபட்ச நில அளவு நிர்ணயிக்கப்பட்டுள்ளது. இந்த விதி, விவசாய மின் இணைப்புகளுக்கான எல்.டி. கட்டணம் வகை 4-க்கு பொருந்தும். ஆனால், மலர் வளர்ப்பு மற்றும் தோட்டக்கலைப் பணிகளுக்காக மட்டும் பெறப்படும் மின் இணைப்புகளுக்கு இந்த 50 சென்ட் நில விதியை கட்டாயப்படுத்த வேண்டியதில்லை என்று தமிழ்நாடு மின் உற்பத்தி மற்றும் பகிர்மானக் கழகம் தெரிவித்துள்ளது. இதன்படி, 50 சென்ட்டுக்கும் குறைவான நிலம் வைத்திருப்பவர்களும் மலர் வளர்ப்பு மற்றும் தோட்டக் கலைப் பணிகளுக்காக எல்.டி. 3(ஏ) 1 கட்டணப் பிரிவின் கீழ் மின் இணைப்பைப் பெறலாம். சிறிய நிலப்பரப்பில் அதிக உற்பத்தி செய்யும் மலர் வளர்ப்பு, காய்கறி, பழம் உள்ளிட்ட தோட்டக்கலைப் பணிகளில் ஈடுபடும் சிறு விவசாயிகளுக்கு இந்த முடிவு பயனுள்ளதாக இருக்கும். சிறிய நிலம் வைத்திருப்பவர்களுக்கு பயன் மலர் மற்றும் தோட்டக் கலைப் பயிர்களை வளர்க்க அதிக நிலப்பரப்பு எப்போதும் தேவைப்படுவதில்லை. குறைந்த நிலத்திலும் பசுமைக்குடில், சொட்டுநீர் பாசனம் உள்ளிட்ட முறைகளைப் பயன்படுத்தி விவசாயிகள் உற்பத்தி செய்து வருகின்றனர். இத்தகைய விவசாயிகளுக்கு 50 சென்ட் நிலம் என்ற கட்டுப்பாடு இல்லாமல் மின் இணைப்பு கிடைப்பது உதவியாக இருக்கும். அதே நேரத்தில், இந்த தளர்வை பயன்படுத்தி வழக்கமான விவசாய மின் இணைப்புக்கான 50 சென்ட் விதியை யாரும் தவிர்க்கக் கூடாது என்று TNPDCL அறிவுறுத்தியுள்ளது. இதற்காக, எல்.டி. 3(ஏ) 1 பிரிவில் மலர் வளர்ப்பு மற்றும் தோட்டக்கலைக்காக மட்டும் மின் இணைப்பு கேட்டு விண்ணப்பிப்பவர்களிடம் உறுதிமொழி பெறும் வகையில் மின் கட்டண மென்பொருளில் புதிய வசதி ஏற்படுத்துமாறு தகவல் தொழில்நுட்பப் பிரிவுக்கு அறிவுறுத்தப்பட்டுள்ளது. விண்ணப்பதாரர்கள், மலர் வளர்ப்பு, தோட்டக்கலை, விவசாயம் மற்றும் அதனுடன் தொடர்புடைய பணிகளுக்கு தனித்தனி மின் இணைப்பு விதிமுறைகள் உள்ளதை அறிந்திருப்பதாக உறுதியளிக்க வேண்டும். மேலும், எல்.டி. 3(ஏ) 1 பிரிவில் விவசாயம் மற்றும் அதனுடன் தொடர்புடைய பணிகளுக்காக மின் இணைப்பு கேட்பவர்கள், முதலில் வழக்கமான முறையில் எல்.டி. 4 பிரிவின் கீழ் விவசாய மின் இணைப்புக்கு விண்ணப்பித்திருக்க வேண்டும். 50 சென்ட் விதி எதற்கு தொடர்ந்து பொருந்தும்? 2020 ஆகஸ்ட் 5-ம் தேதிக்குப் பிறகு பதிவு செய்யப்பட்ட வழக்கமான விவசாய மின் இணைப்பு விண்ணப்பங்களுக்கு 50 சென்ட் குறைந்தபட்ச நில அளவு என்ற விதி தொடர்ந்து அமலில் இருக்கும் என்று தமிழ்நாடு மின் உற்பத்தி மற்றும் பகிர்மானக் கழகம் மீண்டும் தெரிவித்துள்ளது.