திருவெறும்பூரில் உருவாகிறதா பிரம்மாண்ட பாதுகாப்பு–விண்வெளி தொழில் மையம்?

<p style="text-align: justify;">திருச்சி: திருச்சிராப்பள்ளியின் தொழில்துறை வளர்ச்சியில் புதிய அத்தியாயத்தை உருவாக்கும் வகையில், திருவெறும்பூரில் உள்ள சிப்காட் தொழிற்பேட்டை மத்திய அரசின் ‘பவ்யா’ (BHAVYA - Bharat Audyogik Vikas Yojana) திட்டத்தின் கீழ் தேர்வு செய்யப்படுவதற்கான வாய்ப்புகள் அதிகரித்துள்ளதாக தகவல்கள் வெளியாகியுள்ளன.</p> <p style="text-align: justify;">நாட்டின் முக்கிய நகரங்களுக்கு அருகே நவீன உள்கட்டமைப்பு வசதிகளுடன் கூடிய 100 ‘பிளக் அண்ட் பிளே’ தொழிற்பேட்டைகளை உருவாக்கும் மத்திய அரசின் முயற்சியின் ஒரு பகுதியாக இந்த திட்டம் செயல்படுத்தப்பட உள்ளது. இத்திட்டம் திருச்சியில் அமையும் பட்சத்தில், ஏற்கனவே தொழில் நகரமாக வளர்ந்து வரும் திருவெறும்பூரின் முக்கியத்துவம் மேலும் அதிகரிக்கும்.</p> <p style="text-align: justify;"><strong>பாதுகாப்பு தொழில்துறையின் புதிய மையமா திருவெறும்பூர்?</strong></p> <p style="text-align: justify;">தமிழ்நாடு பாதுகாப்பு தொழில் நடைபாதையில் திருச்சி முக்கிய மையங்களில் ஒன்றாக உள்ளது. இதனை அடுத்த கட்டத்துக்கு கொண்டு செல்லும் வகையில், திருவெறும்பூரில் பாதுகாப்பு மற்றும் விண்வெளித் துறைக்கான பிரத்யேக உற்பத்தி மையத்தை உருவாக்குவதற்கான முதற்கட்ட ஆலோசனைகள் மேற்கொள்ளப்பட்டு வருவதாக கூறப்படுகிறது.</p> <p style="text-align: justify;">உலகளவில் பாதுகாப்புத் துறையின் தேவைகள் வேகமாக மாறி வரும் நிலையில், ஆளில்லா வான்வழி வாகனங்கள் (UAV), ட்ரோன்கள் உள்ளிட்ட நவீன தொழில்நுட்பங்களின் பயன்பாடு அதிகரித்து வருகிறது. குறிப்பாக சமீபத்திய சர்வதேச மோதல்களில் ட்ரோன்கள் மற்றும் ஆளில்லா வான்வழி தொழில்நுட்பங்கள் முக்கியப் பங்கு வகித்திருப்பது, இந்தத் துறையின் எதிர்கால தேவையை வெளிப்படுத்தியுள்ளது.</p> <p style="text-align: justify;">இந்த நிலையில், திருவெறும்பூர் பகுதி பாதுகாப்பு உபகரணங்கள், ட்ரோன்கள் மற்றும் விண்வெளி சார்ந்த உற்பத்திகளுக்கு ஏற்ற இடமாக இருக்கும் என்று தொழில்துறையினர் கருத்து தெரிவித்துள்ளனர்.</p> <p style="text-align: justify;"><strong>148.9 ஏக்கர் சிப்காட் நிலம் பரிசீலனை</strong></p> <p style="text-align: justify;">புதிய தொழில் மையத்துக்காக பல்வேறு நிலப்பகுதிகள் அரசுத் தரப்பில் பரிசீலிக்கப்பட்டு வருவதாக கூறப்படுகிறது. திருவெறும்பூர் அருகே உள்ள ஈளந்தப்பட்டி மற்றும் சூரியூர் கிராமங்களில் சிப்காட் நிறுவனத்துக்கு சொந்தமான 148.9 ஏக்கர் நிலங்கள் திட்டத்துக்கு பயன்படுத்தப்படுவதற்கான வாய்ப்புகள் குறித்து ஆய்வு செய்யப்பட்டு வருவதாக தகவல்கள் தெரிவிக்கின்றன.</p> <p style="text-align: justify;">இதுதவிர, திருச்சியில் செயல்பட்டு வரும் படைக்கலத் தொழிற்சாலை (OFT), உயராற்றல் எரிபொருள் தொழிற்சாலை (HEPF) ஆகியவற்றை ஒட்டியுள்ள அரசு நிலங்களும் பரிசீலனையில் உள்ளதாக கூறப்படுகிறது. இதன் மூலம் ஏற்கனவே பாதுகாப்பு உற்பத்தித் துறையுடன் தொடர்புடைய தொழிற்சாலைகள் அமைந்துள்ள பகுதிக்கும், புதிய தொழில் மையத்துக்கும் இடையே ஒருங்கிணைப்பு ஏற்படுத்த முடியும் என எதிர்பார்க்கப்படுகிறது.</p> <p style="text-align: justify;"><strong>ட்ரோன் முதல் ‘டீப்-டெக்’ வரை...</strong></p> <p style="text-align: justify;">உலகளவில் ஆளில்லா வான்வழி வாகனங்களுக்கான தேவை அதிகரித்து வருவதால், திருச்சி பகுதியில் ட்ரோன் தயாரிப்பு மற்றும் அதனுடன் தொடர்புடைய உதிரிபாக உற்பத்தி நிறுவனங்களை உருவாக்குவதற்கான வாய்ப்புகளும் அதிகரித்துள்ளன. குறிப்பாக ‘டீப்-டெக்’ (Deep-tech) ஸ்டார்ட்அப் நிறுவனங்களை ஊக்குவித்து, புதிய தொழில்நுட்பங்களை உருவாக்குவதற்கான சூழலை ஏற்படுத்துவது குறித்து அரசு தரப்பில் ஆலோசிக்கப்பட்டு வருவதாக கூறப்படுகிறது.</p> <p style="text-align: justify;">செயற்கை நுண்ணறிவு, சென்சார் தொழில்நுட்பம், ரோபோடிக்ஸ், ட்ரோன் தொழில்நுட்பம், பாதுகாப்பு உபகரணங்கள் போன்ற துறைகளில் புதிய நிறுவனங்கள் உருவாகும் வாய்ப்பு இருப்பதாக தொழில்துறையினர் எதிர்பார்க்கின்றனர்.</p> <p style="text-align: justify;"><strong>களத்தில் 20-க்கும் மேற்பட்ட நிறுவனங்கள்</strong></p> <p style="text-align: justify;">திருச்சி பிராந்தியத்தில் ஏற்கனவே 20-க்கும் மேற்பட்ட குறு, சிறு மற்றும் நடுத்தர தொழில் நிறுவனங்கள் (MSMEs) பாதுகாப்பு மற்றும் விண்வெளித் துறைக்கு தேவையான பல்வேறு உபகரணங்களை உற்பத்தி செய்து வருவதாக கூறப்படுகிறது. இந்த நிறுவனங்களின் உற்பத்தித் திறனை அதிகரிப்பது, புதிய தொழில்நுட்பங்களை அறிமுகப்படுத்துவது, பாதுகாப்புத் துறை நிறுவனங்களுடன் இணைந்து செயல்படுவதற்கான வாய்ப்புகளை உருவாக்குவது உள்ளிட்டவை குறித்தும் ஆலோசனைகள் நடைபெற்று வருகின்றன.</p> <p style="text-align: justify;">மத்திய, மாநில அரசுகளின் ஆலோசகர்கள் உள்ளூர் தொழிலதிபர்களுடன் கலந்துரையாடி, தொழிற்சாலைகளை விரிவுபடுத்துவதற்கு தேவையான நிலம், உள்கட்டமைப்பு, தொழில்நுட்பம், மனிதவளம் உள்ளிட்ட தேவைகளை கண்டறிந்து வருவதாகவும் தகவல்கள் தெரிவிக்கின்றன.</p> <p style="text-align: justify;"><strong>NIT, சாஸ்த்ரா பல்கலைக்கழகங்கள் கூடுதல் பலம்</strong></p> <p style="text-align: justify;">திருவெறும்பூருக்கு அருகில் National Institute of Technology Tiruchirappalli (NIT Trichy), SASTRA Deemed University போன்ற உயர்கல்வி நிறுவனங்கள் இருப்பது இந்த திட்டத்துக்கு கூடுதல் பலமாக அமையும் என தொழில்துறையினர் தெரிவிக்கின்றனர்.</p> <p style="text-align: justify;">புதிய தொழில்நுட்ப நிறுவனங்களுக்கு தேவையான திறமையான பொறியாளர்கள், ஆராய்ச்சியாளர்கள் மற்றும் தொழில்நுட்ப வல்லுநர்களை உருவாக்குவதிலும், தொழில் நிறுவனங்களுக்கும் கல்வி நிறுவனங்களுக்கும் இடையே ஆராய்ச்சி சார்ந்த ஒத்துழைப்பை ஏற்படுத்துவதிலும் இந்த கல்வி நிறுவனங்கள் முக்கிய பங்காற்ற முடியும்.</p> <p style="text-align: justify;"><strong>பல்லாயிரம் வேலைவாய்ப்புகளுக்கு வாய்ப்பு</strong></p> <p style="text-align: justify;">திருவெறும்பூர் சிப்காட் பகுதி பாதுகாப்பு மற்றும் விண்வெளித் துறை உற்பத்தி மையமாக உருவெடுக்கும் பட்சத்தில், நேரடி வேலைவாய்ப்புகள் மட்டுமின்றி உதிரிபாக உற்பத்தி, போக்குவரத்து, சேவை, பராமரிப்பு, தொழில்நுட்பம் உள்ளிட்ட பல்வேறு துணைத்துறைகளிலும் வேலைவாய்ப்புகள் உருவாகும் வாய்ப்பு உள்ளது.</p> <p style="text-align: justify;">இதன் மூலம் திருச்சி மற்றும் சுற்றுவட்டார மாவட்டங்களைச் சேர்ந்த இளைஞர்களுக்கு அதிக அளவில் வேலைவாய்ப்பு கிடைக்கக்கூடும். உள்ளூர் குறு, சிறு மற்றும் நடுத்தர தொழில் நிறுவனங்களுக்கும் புதிய வர்த்தக வாய்ப்புகள் உருவாகலாம்.</p> <p style="text-align: justify;">திருவெறும்பூரில் பாதுகாப்பு மற்றும் விண்வெளித் துறை உற்பத்தி மையம் அமைப்பது தொடர்பான சாத்தியக்கூறு ஆய்வுகள் நிறைவடைந்துள்ளதாகவும், இதுகுறித்த அதிகாரப்பூர்வ அறிவிப்பு விரைவில் வெளியாகலாம் என்றும் தகவல்கள் தெரிவிக்கின்றன.</p> <p style="text-align: justify;">திருவெறும்பூர் சிப்காட் பாதுகாப்பு–விண்வெளி தொழில் மையமாக மாறும் பட்சத்தில், திருச்சியின் தொழில்துறை முகமே மாறுவதுடன், தமிழகத்தின் பாதுகாப்புத் துறை உற்பத்தி திறனுக்கும் புதிய வேகம் கிடைக்கும் என்ற எதிர்பார்ப்பு தொழில்துறையினர் மத்தியில் உருவாகியுள்ளது.</p>