சென்னை - ஹவுரா எக்ஸ்பிரஸ் ரயில் நேரத்தில் மாற்றம்: தென்னக ரயில்வே முக்கிய அறிவிப்பு

தென்னக ரயில்வே சென்னை பிரிவுக்குட்பட்ட பெடபரியா மற்றும் நாயுடுபேட்டை ரயில் நிலையங்களுக்கு இடையே பராமரிப்புப் பணிகளை மேற்கொள்கிறது. இதனால் சென்னை சென்ட்ரல் - ஹவுரா எக்ஸ்பிரஸ் ரயிலின் புறப்படும் நேரத்தில் மாற்றம் செய்யப்பட்டுள்ளதுடன், போத்தனூர் - சம்பல்பூர் மற்றும் மதுரை - கான்பூர் சென்ட்ரல் சிறப்பு ரயில்களின் சேவைகளும் நீட்டிக்கப்பட்டுள்ளன. சென்னை சென்ட்ரலில் இருந்து இரவு 7 மணிக்கு புறப்பட வேண்டிய சென்னை சென்ட்ரல் - ஹவுரா எக்ஸ்பிரஸ் (வண்டி எண்: 12840), திங்கட்கிழமை மற்றும் செப்டம்பர் 3, 10 ஆகிய தேதிகளில் ஒரு மணி நேரம் தாமதமாக இரவு 8 மணிக்கு புறப்படும். அதேபோல், செப்டம்பர் 5 மற்றும் 12 ஆகிய தேதிகளில் வழக்கமான நேரத்திற்கு பதிலாக இரண்டு மணி நேரம் தாமதமாக இரவு 9 மணிக்கு புறப்படும் என அறிவிக்கப்பட்டுள்ளது. சிறப்பு ரயில்களைப் பொறுத்தவரை, சம்பல்பூர் - போத்தனூர் சிறப்பு ரயில் (வண்டி எண்: 08311) செப்டம்பர் 9 முதல் நவம்பர் 25 வரை புதன்கிழமைகளில் இயக்கப்படும். இது சம்பல்பூரில் இருந்து காலை 11.35 மணிக்கு புறப்பட்டு, மூன்றாவது நாள் அதிகாலை 1.30 மணிக்கு போத்தனூர் சென்றடையும். மறுமார்க்கத்தில், போத்தனூர் - சம்பல்பூர் சிறப்பு ரயில் (வண்டி எண்: 08312) செப்டம்பர் 11 முதல் நவம்பர் 27 வரை வெள்ளிக்கிழமைகளில் இயக்கப்படும். இந்த ரயில் போத்தனூரில் மதியம் 1 மணிக்கு புறப்பட்டு, அடுத்த நாள் இரவு 11.15 மணிக்கு சம்பல்பூர் அடையும். மேலும், கான்பூர் சென்ட்ரல் - மதுரை சிறப்பு ரயில் (வண்டி எண்: 01925) செப்டம்பர் 2 முதல் நவம்பர் 25 வரை புதன்கிழமைகளில் தொடரும் வகையில் நீட்டிக்கப்பட்டுள்ளது. இதன் மறுமார்க்கமான மதுரை - கான்பூர் சென்ட்ரல் சிறப்பு ரயில் (வண்டி எண்: 01926) செப்டம்பர் 5 முதல் நவம்பர் 28 வரை சனிக்கிழமைகளில் இயங்கும் வகையில் சேவை நீட்டிப்பு செய்யப்பட்டுள்ளது.