வெறும் 6 மிமீ தடிமன், 98 கிராம் எடை: சியோமியின் அல்ட்ரா-தின் மேக்னடிக் பவர் பேங்க் செப்.8-ல் அறிமுகம்

இந்தியாவில் 2 புதிய மேக்னடிக் பவர் பேங்க்குகளின் அறிமுகத் தேதியை சியோமி நிறுவனம் அதிகாரப்பூர்வமாக அறிவித்துள்ளது. தனது சார்ஜிங் சாதனங்களின் வரிசையை விரிவாக்கும் நோக்கில், உலகளாவிய சந்தைகளில் ஏற்கனவே அறிமுகமான சியோமி அல்ட்ரா-தின் மேக்னடிக் பவர் பேங்க் 5000 15W மற்றும் சியோமி மேக்னடிக் பவர் பேங்க் 10000 45W ஆகிய மாடல்களை நிறுவனம் விரைவில் களமிறக்குகிறது. இதில் 5000 எம்ஏஹெச் மாடல் 15 வாட் மேக்னடிக் வயர்லெஸ் சார்ஜிங் மற்றும் யுஎஸ்பி டைப்-சி வழியாக 22.5 வாட் வயர்டு சார்ஜிங் வசதியைக் கொண்டுள்ளது. சியோமி நிறுவனம் தனது எக்ஸ் தளப் பதிவில், இந்த 2 பவர் பேங்க்குகளும் செப்டம்பர் 8-ஆம் தேதி இந்தியாவில் அறிமுகமாகும் என்பதை உறுதிப்படுத்தியுள்ளது. இருப்பினும், இவற்றின் விலை விவரங்கள் மற்றும் விற்பனை குறித்த தகவல்கள் இன்னும் வெளியிடப்படவில்லை. வெளியான டீசர் படத்தின்படி, இவை சீனா, சர்வதேச சந்தைகளில் விற்பனையாகும் அதே வடிவமைப்பைக் கொண்டுள்ளன. 10,000 எம்ஏஹெச் பேட்டரி திறன் மற்றும் 45 வாட் அதிவேக சார்ஜிங் திறனுடன் வரும் மேக்னடிக் பவர் பேங்க் 10000 45W மாடலின் கூடுதல் சிறப்பம்சங்கள் இன்னும் ரகசியமாக வைக்கப்பட்டுள்ளன. கிராஃபைட் பிளாக், கிளேசியர் சில்வர் மற்றும் ரேடியன்ட் ஆரஞ்ச் ஆகிய வண்ணங்களில் கிடைக்கும் இந்த பவர் பேங்க் வெறும் 6 மிமீ தடிமனும் (98.5 x 71.5 x 6 மிமீ), 98 கிராம் எடையும் மட்டுமே கொண்டு மிக மெல்லியதாக வடிவமைக்கப்பட்டுள்ளது. இதில் அதிக ஆற்றல் அடர்த்தி கொண்ட சிலிக்கான்-கார்பன் பேட்டரி பயன்படுத்தப்பட்டுள்ளது. இதன் வழக்கமான கொள்ளளவு 5,000 எம்ஏஹெச் மற்றும் 5 வோல்ட்டில் மதிப்பிடப்பட்ட கொள்ளளவு 3,000 எம்ஏஹெச் ஆகும். இது 15 வாட் வரை மேக்னடிக் வயர்லெஸ் சார்ஜிங்கையும், ஐபோன்களுக்கு 7.5 வாட் சார்ஜிங்கையும் வழங்குகிறது. இதன் யுஎஸ்பி டைப்-சி போர்ட் மூலம் 22.5 வாட் வரை வயர்டு சார்ஜிங் செய்ய முடியும். ஒரே நேரத்தில் வயர் மற்றும் வயர்லெஸ் இணைப்பு மூலம் 2 சாதனங்களை சார்ஜ் செய்து கொள்ளலாம். வெப்பத்தை தணிக்க 4,369 சதுர மிமீ கிராஃபைட் தகடு மற்றும் டூயல் என்டிசி வெப்பநிலை கட்டுப்பாட்டு அமைப்பு வழங்கப்பட்டுள்ளது. மேலும் அதிக மின்னழுத்தம், அதிக மின்னோட்டம், ஷார்ட் சர்க்யூட், அதிகப்படியான சார்ஜிங் மற்றும் தேவையற்ற பொருட்கள் கண்டறிதல் போன்ற பாதுகாப்பு அம்சங்களும் இதில் உள்ளன. இந்த அல்ட்ரா-தின் பவர் பேங்க் சியோமி, ஆப்பிள், சாம்சங் மற்றும் கூகுள் உள்ளிட்ட முன்னணி பிராண்டுகளின் ஸ்மார்ட்போன்களுடன் எளிதாகப் பொருந்தும். குறிப்பாக, சியோமி 12 தொடர் மற்றும் அதன் பிந்தைய மாடல்கள், ஐபோன் 12 தொடர் முதல் அனைத்து புதிய ஐபோன்கள், சாம்சங் கேலக்ஸி எஸ்23 அல்ட்ரா முதல் கேலக்ஸி எஸ்26 அல்ட்ரா வரையிலான மாடல்கள் மற்றும் கூகுள் பிக்சல் 9, பிக்சல் 10 தொடர் போன்களுக்கு இது ஆதரவளிக்கும்.