சொல்வதெல்லாம் பொய்! “ரூ.30 லட்சம் கார் இருக்கும்போது ஏன் ஆட்டோ?” – தவெக எம்எல்ஏ சபரி ஐங்கரன் விளக்கம்

சட்டப்பேரவைக்கு ஆட்டோவில் வருவதாக சட்டசபையில் கூறிய நிலையில், தேர்தல் பிரமாணப் பத்திரத்தில் கார் இருப்பதாக குறிப்பிட்டிருப்பது குறித்து எழுந்த சர்ச்சைக்கு பெரியகுளம் தொகுதி தவெக எம்எல்ஏ சபரி ஐங்கரன் விளக்கம் அளித்துள்ளார். சட்டப்பேரவையில் இன்று பேசிய முதல்வர் விஜய், அனைத்து எம்எல்ஏக்களுக்கும் கார் வழங்கப்படும் என்றும், கார் பராமரிப்பு மற்றும் பெட்ரோல் செலவுகளுக்காக மாதம் ரூ.75 ஆயிரமும், உதவியாளர் படியாக ரூ.25 ஆயிரமும் வழங்கப்படும் என்றும் அறிவித்தார். இதற்கு நன்றி தெரிவித்துப் பேசிய சபரி ஐங்கரன், கல்லூரி காலத்தில் காதல் தோல்வி ஏற்பட்டபோது தனக்கு வேலை மற்றும் கார் எதுவும் இல்லை என்றும், தற்போது முதல்வர் விஜய் இரண்டையும் கொடுத்திருப்பதாகவும் நகைச்சுவையாக குறிப்பிட்டார். மேலும், தேனியில் இருந்து ரயிலில் சென்னைக்கு வந்து, அங்கிருந்து ஆட்டோவில் சட்டப்பேரவைக்கு செல்லும்போது காவலர்கள் தடுத்து நிறுத்துவதாகவும், எம்எல்ஏ அடையாள அட்டையை காட்டினாலும் நம்புவதில்லை என்றும் அவர் கூறினார். அவரது பேச்சு சட்டப்பேரவையில் சிரிப்பலையை ஏற்படுத்தியதுடன், முதல்வர் விஜய்யும் அவரை திரும்பிப் பார்த்ததாக கூறப்படுகிறது. இதற்கிடையே, சபரி ஐங்கரன் தேர்தல் வேட்புமனுவுடன் தாக்கல் செய்த பிரமாணப் பத்திரத்தில் தனக்கு கார் இருப்பதாக குறிப்பிட்டிருப்பதாக தகவல் வெளியானது. மேலும், ரேஞ்ச் ரோவர் டிஃபெண்டர் காருடன் இருக்கும் புகைப்படங்களும் சமூக வலைதளங்களில் வெளியாகியதால், “கார் இருக்கும்போது சட்டப்பேரவைக்கு ஏன் ஆட்டோவில் வருகிறார்?” என்ற கேள்வி எழுந்தது. இதுகுறித்து சட்டப்பேரவைக்கு வெளியே செய்தியாளர்கள் கேள்வி எழுப்பியபோது சபரி ஐங்கரன்,“முதல்வரின் அந்த அறிவிப்பு வரவேற்கத்தக்கது. சென்னை–தேனி இடையிலான பயணம் 450 கி.மீ. என்பதால் ரயிலில்தான் வருகிறேன். சமூக வலைதளங்களில் வருவதை நம்பாதீர்கள்” என்று பதிலளித்துள்ளார். இதன் மூலம் தனது ஆட்டோ பயணம் குறித்த சர்ச்சைக்கு அவர் விளக்கம் அளித்துள்ள நிலையில், அவரது காரை வைத்திருப்பது தொடர்பான விவரங்களுக்கும், சட்டப்பேரவையில் அவர் கூறிய கருத்துக்கும் இடையிலான முழுமையான பின்னணி என்ன என்பது குறித்து மேலும் விளக்கம் தேவைப்படுகிறது.