15 ஆண்டுகளுக்குப் பிறகு வந்த குட்நியூஸ்! சென்னை மெட்ரோவுடன் இணைகிறது சென்னை புறநகர் ரயில் சேவை!

சென்னை மக்களின் நீண்டகால எதிர்பார்ப்புக்கு முக்கியமான முன்னேற்றமாக, சென்னை மெட்ரோ ரயில் சேவையுடன் MRTS புறநகர் ரயில் சேவையை இணைக்க மத்திய ரயில்வே அமைச்சகம் ஒப்புதல் அளித்துள்ளதாக தகவல் வெளியாகியுள்ளது. சென்னையில் மெட்ரோ ரயில் சேவையை சென்னை மெட்ரோ ரயில் லிமிடெட் (CMRL) நிர்வகித்து வருகிறது. அதேநேரத்தில் MRTS உள்ளிட்ட புறநகர் ரயில் சேவைகளை தெற்கு ரயில்வே நிர்வகித்து வருகிறது. இந்த இரு ரயில் அமைப்புகளையும் ஒருங்கிணைத்து, MRTS-ஐ CMRL நிர்வாகத்தின் கீழ் கொண்டு வர வேண்டும் என தமிழக அரசு சார்பில் கடந்த 2021 ஜனவரி 27-ஆம் தேதி மத்திய ரயில்வே அமைச்சகத்துக்கு முன்மொழிவு அனுப்பப்பட்டிருந்தது. நீண்ட காலமாக நிலுவையில் இருந்த இந்த முன்மொழிவுக்கு தற்போது ஒப்புதல் கிடைத்துள்ளதாக தெரிவிக்கப்பட்டுள்ளது. என்னென்ன மாற்றங்கள் வரும்? இதன் மூலம் சென்னை MRTS-ன்: சொத்துகள் இயக்கம் பராமரிப்பு நிர்வாகம் ரயில் சேவை தொடர்பான செயல்பாடுகள் ஆகியவை படிப்படியாக சென்னை மெட்ரோ நிர்வாகத்தின் கீழ் கொண்டு வரப்பட உள்ளன. முதற்கட்டமாக 90 நாட்களுக்குள் MRTS தொடர்பான சொத்துகள் மற்றும் செயல்பாடுகள் CMRL-க்கு மாற்றப்படும் என கூறப்படுகிறது. அதன்பிறகு ரயில் இயக்கம், பராமரிப்பு உள்ளிட்ட மீதமுள்ள முக்கிய பணிகளும் படிப்படியாக மாற்றப்பட்டு, இரண்டு ஆண்டுகளுக்குள் முழுமையான ஒருங்கிணைப்பு மேற்கொள்ளப்படும் என தகவல் வெளியாகியுள்ளது. மெட்ரோவும் MRTS-மும் ஒரே நிர்வாகத்தின் கீழ் வருவதால், எதிர்காலத்தில் இரு சேவைகளுக்கும் இடையே சிறந்த ஒருங்கிணைப்பு ஏற்படும் வாய்ப்பு உள்ளது. குறிப்பாக, சென்னையின் ஒருங்கிணைந்த பொதுப் போக்குவரத்து அமைப்பை உருவாக்குவதற்கு இது முக்கியமான நடவடிக்கையாக பார்க்கப்படுகிறது. 15 ஆண்டுகளாக எதிர்பார்க்கப்பட்ட இந்த ஒருங்கிணைப்பு நடைமுறைக்கு வந்தால், சென்னை நகரின் ரயில் போக்குவரத்து கட்டமைப்பில் இது குறிப்பிடத்தக்க மாற்றமாக அமையக்கூடும்.