பாகிஸ்தான் கிரிக்கெட் வாரியத்தின் புதிய முயற்சி: லிங்க்ட்இன் மூலம் பயிற்சியாளர் தேடல்

பாகிஸ்தான் ஆண்கள் தேசிய கிரிக்கெட் அணிக்கான புதிய பீல்டிங் பயிற்சியாளரைத் தேர்வு செய்ய, அந்நாட்டு கிரிக்கெட் வாரியம் லிங்க்ட்இன் சமூக வலைதளத்தில் அதிகாரப்பூர்வமாக வேலைவாய்ப்பு அறிவிப்பை வெளியிட்டுள்ளது. டெஸ்ட், ஒருநாள் மற்றும் டி20 ஆகிய மூன்று வடிவிலான போட்டிகளுக்கும் சேர்த்து இந்தப் பயிற்சியாளர் பணியிடம் அறிவிக்கப்பட்டுள்ளது.

பொதுவாகத் தொழில்முறை நிறுவனங்கள் பணியாளர்களைத் தேர்ந்தெடுக்கப் பயன்படுத்தும் லிங்க்ட்இன் தளத்தில், கிரிக்கெட் வாரியம் இது போன்ற அறிவிப்பை வெளியிட்டது பலரையும் ஆச்சரியத்தில் ஆழ்த்தியுள்ளது. இந்தச் செயலைப் பல ரசிகர்கள் சமூக வலைதளங்களில் கேலி செய்து வருவதோடு, விதவிதமான மீம்ஸ்களைப் பகிர்ந்து கிண்டல் செய்து வருகின்றனர். இதனால் இணையத்தில் இது தொடர்பான விவாதங்கள் எழுந்துள்ளன.

பயிற்சியாளர் பதவிக்கான விண்ணப்பங்களைச் சமர்ப்பிப்பவர்கள் சில குறிப்பிட்ட தகுதிகளைப் பெற்றிருக்க வேண்டும் என வாரியம் நிபந்தனை விதித்துள்ளது. அதன்படி, விண்ணப்பதாரர்கள் குறைந்தபட்சம் ஐந்து ஆண்டுகள் பணியனுபவம் கொண்டிருக்க வேண்டும். மேலும், தேசிய அளவிலான அணி, கிளை அணி அல்லது சர்வதேச கிரிக்கெட் வீரர்களுடன் இணைந்து பணியாற்றிய முன் அனுபவம் பெற்றிருப்பது கட்டாயம் எனத் தெரிவிக்கப்பட்டுள்ளது.