உளுந்தூர்பேட்டையில் வி.சி.க. மாநாடு: பள்ளிகளுக்கு இன்று விடுமுறை!

<p>உளுந்தூர்பேட்டை: கள்ளக்குறிச்சி மாவட்டம் உளுந்தூர்பேட்டையில் விடுதலைச் சிறுத்தைகள் கட்சியின் சார்பில் ‘தமிழ்த் தேசிய எழுச்சி மாநாடு’ இன்று (திங்கள்கிழமை) பிரம்மாண்டமாக நடைபெறுகிறது. இதனையொட்டி அப்பகுதியில் உள்ள பள்ளி, கல்லூரிகளுக்கு இன்று ஒருநாள் விடுமுறை அறிவிக்கப்பட்டுள்ளது.</p> <h2>40 ஏக்கரில் பிரம்மாண்ட திடல்</h2> <p>விடுதலைச் சிறுத்தைகள் கட்சியின் தலைவரும், சிதம்பரம் தொகுதி மக்களவை உறுப்பினருமான தொல். திருமாவளவனின் பிறந்தநாளை (ஆகஸ்ட் 17) முன்னிட்டு இந்த மாநாடு அறிவிக்கப்பட்டது. இதற்காக சென்னை - திருச்சி தேசிய நெடுஞ்சாலையில், உளுந்தூர்பேட்டை புறவழிச்சாலை பகுதியில் சுமார் 40 ஏக்கர் பரப்பளவில் மாநாட்டுத் திடல் அமைக்கப்பட்டு, பிரம்மாண்ட மேடை தயார் செய்யப்பட்டுள்ளது.</p> <p>மாநாட்டிற்கு வருகை தரும் தொண்டர்கள் மற்றும் பொதுமக்கள் அமர்வதற்காக 50 ஆயிரம் இருக்கைகள் போடப்பட்டுள்ளன. (ஏற்கனவே இதே மைதானத்தில் தான் கடந்த 2024 அக்டோபர் 2-ஆம் தேதி வி.சி.க. மகளிர் விடுதலை இயக்கம் சார்பில் மது மற்றும் போதைப்பொருள் ஒழிப்பு மாநாடு வெற்றிகரமாக நடைபெற்றது குறிப்பிடத்தக்கது).</p> <h2>மழை எச்சரிக்கை: மாநாட்டு நேரம் மாற்றம்</h2> <p>வழக்கமாக வி.சி.க.வின் மாநாடுகள் மாலை 6 மணிக்குத் தொடங்கி இரவு 10 மணி வரை நடைபெறும். ஆனால், விழுப்புரம் மற்றும் கள்ளக்குறிச்சி மாவட்டங்களில் காற்றழுத்தத் தாழ்வுப் பகுதி காரணமாக திங்கள்கிழமை கனமழை பெய்ய வாய்ப்புள்ளதாக வானிலை ஆய்வு மையம் எச்சரித்துள்ளது.</p> <p>இதனைத் தொடர்ந்து, தொண்டர்களின் பாதுகாப்பையும் வசதியையும் கருத்தில் கொண்டு மாநாட்டு நேரத்தை வி.சி.க. தலைவர் தொல்.திருமாவளவன் மாற்றியமைத்துள்ளார். அதன்படி, இன்று பிற்பகல் 12.30 மணிக்குத் தொடங்கி மாலை 5 மணிக்குள் மாநாட்டை நிறைவு செய்யத் திட்டமிடப்பட்டுள்ளது.</p> <h2>மாநாட்டு நிகழ்ச்சிகள் விவரம்:</h2> <p>பிற்பகல் 12.30 மணி: இசை நிகழ்ச்சி</p> <p>பிற்பகல் 2.00 மணி: வரவேற்புரையுடன் மாநாடு தொடக்கம்</p> <p>பிற்பகல் 2.30 மணி: கவிஞர் இளையகம்பன் தலைமையில் கவியரங்கம்</p> <p>பிற்பகல் 3.00 மணி: தமிழ்த் தேசிய எழுச்சி மாநாட்டின் முக்கியத் தீர்மானங்கள் நிறைவேற்றம்</p> <p>பிற்பகல் 3.30 - 4.30 மணி: வி.சி.க. தலைவர் தொல். திருமாவளவன் சிறப்புரையாற்றுகிறார்.</p> <h2>அரசியல் வட்டாரத்தில் பரபரப்பு</h2> <p>தி.மு.க. கூட்டணியில் இருந்து வி.சி.க. விலகியுள்ளதாகக் கூறப்படும் நிலையில் நடைபெறும் இந்த மாநாடு, தமிழக அரசியலில் பெரும் எதிர்பார்ப்பை ஏற்படுத்தியுள்ளது. தமிழக அரசியலில் கட்சியின் பங்களிப்பை மேலும் வலுப்படுத்துவது, எதிர்காலத் திட்டமிடல்கள் மற்றும் தமிழ்த் தேசியம் சார்ந்த முக்கிய முடிவுகளைத் தனது உரையின் வாயிலாகத் தொல்.திருமாவளவன் வெளியிடுவார் என அரசியல் நோக்கர்கள் தெரிவிக்கின்றனர்.</p> <h2>பள்ளி, கல்லூரிகளுக்கு விடுமுறை</h2> <p>மாநாட்டிற்கு லட்சக்கணக்கான தொண்டர்கள் திரள்வார்கள் என்பதால் உளுந்தூர்பேட்டை பகுதியில் கடும் போக்குவரத்து நெரிசல் ஏற்பட வாய்ப்புள்ளது. இதனைக் கருத்தில் கொண்டும், மாணவர்களின் பாதுகாப்பை உறுதி செய்யவும் உளுந்தூர்பேட்டை வட்டாரத்தில் உள்ள பள்ளி மற்றும் கல்லூரிகளுக்கு இன்று ஒருநாள் விடுமுறை அளித்து மாவட்ட கல்வித்துறை உத்தரவிட்டுள்ளது.</p>