“நரியாக இருப்பதை விட நாய் மேல்” - மூத்த பாலிவுட் நடிகரை சாடிய கங்கனா ரனாவத்

ஜார்கண்டில் மாநில பொதுச் சேவை ஆணையம் (JPSC) மற்றும் பணியாளர் தேர்வாணையம் (JSSC) ஆகியவற்றின் போட்டி தேர்வுகளில் முறைகேடுகள் நடந்துள்ளதாகக் கூறி அம்மாநில மாணவர்கள் மூன்று வாரங்களுக்கு மேலாக போராட்டம் நடத்தி வருகின்றனர். அதில் 14-வது JPSC தேர்வை ரத்து செய்ய வேண்டும் என்றும், சிபிஐ அல்லது ஓய்வுபெற்ற உயர் நீதிமன்ற நீதிபதிகள் அடங்கிய குழு மூலம் விசாரணை நடத்தப்பட வேண்டும் என்றும் கோரிக்கை வைத்து வருகின்றனர். இந்த விவகாரம் தொடர்பாக ராஞ்சியில் போராடும் மாணவர்களை நேரில் சந்தித்து ஆதரவு கொடுத்தார் பாலிவுட் நடிகர் பியூஷ் மிஷ்ரா. பின்பு செய்தியாளர்களைச் சந்தித்த அவர் சிஜேபி மாணவர்கள் போராட்டம் குறித்து கருத்து தெரிவித்த மற்றொரு மூத்த பாலிவுட் நடிகர் நஸ்ருதீனை கேள்வி எழுப்பியிருந்தார். அவர் பேசியதாவது, “நஸீர் சார், சிஜேபி போராட்டத்தின் போது திரைப்படத்துறையைச் சேர்ந்த சிலர் குரல் கொடுக்கவில்லை என்று நீங்கள் கூறினீர்கள். அப்போது வாயில் எலும்புத் துண்டைக் கவ்வியிருப்பவர்கள் பேசுவதில்லை என்றும் நீங்கள் சொன்னீர்கள். மிகுந்த மரியாதையுடன் நான் உங்களிடம் கேட்க விரும்புகிறேன், இப்போது வாயில் எலும்புத் துண்டுகளைக் கவ்வியிருக்கும் அந்த 'நாய்கள்' யார்?” எனக் கேள்வி எழுப்பியிருந்தார். இந்த கருத்தை வரவேற்ற நடிகையும் பாஜக எம்.பி-யுமான கங்கனா ரனாவத் தனது இன்ஸ்டாகிராம் ஸ்டோரில் “உண்மை என்னவென்றால், ஒவ்வொருவரும் யாரோ ஒருவருடைய நாய் தான். அதாவது, விசுவாசமானவர்கள். ஆனால், நான் யாருடைய உணவை உண்கிறேனோ அந்த வீட்டைக் (நாட்டை) காப்பதிலும் அதற்காகப் போராடுவதிலும் பெருமை கொள்கிறேன். நசீர் அவர்கள் இந்த நாட்டின் உணவை சாப்பிட்டுவிட்டு பக்கத்து நாட்டுக்காக போராடுகிறார். அவரைப் போன்று ஒரு நரியாக இருப்பதை விட, ஒரு நாயாக இருப்பதே மேல்” எனக் குறிப்பிட்டிருந்தார்.