தோல்வியை ஒப்புக்கொண்ட தி.மு.க: வீழ்த்திய காரணியைப் புரிந்து கொண்டதா?

தோல்வியைச் சந்திக்கும் போது, ஏறக்குறைய அனைத்து அரசியல் கட்சிகளும் எண்களை ஏற்றுக் கொண்டாலும், அதன் உண்மையான அர்த்தத்தைப் புரிந்து கொள்ளப் போராடும் ஒரு கட்டத்தைக் கடந்து செல்கின்றன. தமிழ்நாட்டில் திமுக ஆட்சியை இழந்த மூன்று மாதங்களுக்குப் பிறகு, கட்சியின் தலைவரும் முன்னாள் முதலமைச்சருமான மு.க. ஸ்டாலின் தானே போட்டியிட்ட தொகுதியிலும் தோல்வியடைந்த நிலையில் தனது கட்சியின் செயற்குழுவின் முன் நின்று, வரலாற்று ரீதியாக தனது பிழைப்பைப் பற்றி சிந்தித்துப் பழகிய ஒரு அமைப்பிற்கு இந்தத் தோல்வியை விளக்குவதற்கு முயன்றார். பதவிகளை மாற்றியமைக்கும் தீர்மானங்களை ஏற்றுக்கொண்ட உயர்நிலைச் செயற்குழுவிடம் பேசிய ஸ்டாலின், "நாம் பார்க்காத வெற்றியும் இல்லை, நாம் பார்க்காத தோல்வியும் இல்லை. இந்த ஒரு தேர்தலில்தான் தோற்றிருக்கிறோம். இது நிரந்தரமல்ல" என்று கூறினார். கட்சிக்கு நம்பிக்கையளிக்கும் வகையில் அமைந்த இந்தச் செய்தி, அதே வேளையில் தற்போது திமுகவை வரையறுக்கும் மையப் பதற்றத்தையும் கொண்டிருந்தது. தேர்தல் தோல்வியை கட்சி ஒப்புக்கொண்டாலும், தம்மைத் தோற்கடித்த காரணியை அது முழுமையாகப் புரிந்து கொண்டுள்ளதா என்பது தெளிவாகத் தெரியவில்லை. கட்சியின் தவறுகளை ஒப்புக்கொள்வதில் ஸ்டாலின் எவ்விதத் தயக்கமும் காட்டவில்லை. "முதலில் நமது தவறுகளை நாம் ஏற்றுக்கொள்ள வேண்டும். அதைத் திறந்த மனதோடு ஒப்புக்கொள்ள வேண்டும்" என்று அவர் கூறினார். இந்தத் தோல்வியை ஆராய 38 உறுப்பினர்கள் கொண்ட குழு அமைக்கப்பட்டது. இணையதளம் மூலமாகப் பல்லாயிரக்கணக்கான ஆலோசனைகள் வந்தடைந்தன, அவற்றை தாம் படித்ததாக ஸ்டாலின் தெரிவித்தார். முன்னாள் அமைச்சர் தங்கம் தென்னரசு தலைமையிலான மறுசீரமைப்புக் குழு அமைப்பில் செய்ய வேண்டிய மாற்றங்களை பரிசீலித்தது. பின்னர் ஸ்டாலின் தனது மிகச்சிறந்த உருவகத்தைக் குறிப்பிட்டார்: "ஊருக்கே வெளிச்சம் தரும் விளக்கு, தன் அடியில் இருக்கும் இருளைப் பார்ப்பதில்லை." அவரது கணிப்பில், அணுக முடியாத நிர்வாகிகள், போலி உறுப்பினர் புள்ளிவிவரங்கள், தீவிரமாக வேரூன்றிய உள்ளூர் படிநிலைகள் மற்றும் மற்றவர்களை வளர விடாத தலைவர்கள் ஆகியவையே அந்த 'இருள்' ஆகும். இதற்காக சில பதவிகளுக்கு வயது வரம்பு மற்றும் பதவிக் காலம், உண்மையான உறுப்பினர் சேர்க்கை, கட்சித் தேர்தல்கள் மற்றும் புதியவர்களுக்கு அதிக வாய்ப்புகள் ஆகியவற்றை ஸ்டாலின் முன்மொழிந்தார். 75 ஆண்டுகள் பழமையான ஓர் அரசியல் இயக்கத்திற்கு இவை குறிப்பிடத்தக்க ஒப்படைப்புகளாகும். இந்த செய்தியை ஆங்கிலத்தில் படிக்க இங்கே க்ளிக் செய்யவும். ஆனால் பிரச்சினை இந்த அமைப்பை விடப் பெரியதாக இருந்தால் என்ன செய்வது? ஸ்டாலினின் தீர்வுகளிலிருந்து பார்க்கும் போது, திமுக இந்த மாபெரும் அரசியல் அதிர்ச்சியை ஒரு பகுதி அமைப்புக் கோளாறாக மட்டுமே அணுகுவது போல் தோன்றுகிறது. மாவட்டச் செயலாளரைச் சீர்திருத்த வேண்டும், உறுப்பினர்களைச் சரிபார்க்க வேண்டும், இளைஞர்களுக்கு வாய்ப்பளிக்க வேண்டும் - சுருக்கமாகச் சொன்னால், இயந்திரத்திற்கு பராமரிப்பு சேவை தேவை என்று அது நம்புகிறது. இவை அனைத்தும் உண்மை என்றாலும், த.வெ.க (TVK) சிறந்த மாவட்டச் செயலாளர்களைக் கொண்டிருந்ததால் திமுகவைத் தோற்கடிக்கவில்லை. முதலமைச்சர் விஜய் முற்றிலும் மாறுபட்ட ஓர் அரசியல் வடிவத்தின் மூலம் ஆட்சியைப் பிடித்தார்: ரசிகர் மன்றங்கள், பிரபலம், டிஜிட்டல் கலாச்சாரம், முதல்முறை அரசியல் பணியாளர்கள், தற்போதைய அரசியல் சூழலின் மீதான சலிப்பு மற்றும் பாரம்பரிய அரசியல் அனுபவம் இல்லாதவர்களிடமும் மாநிலத்தை ஒப்படைக்கத் தயாராக இருந்த வாக்காளர்கள் மூலம் அவர் உருவெடுத்தார். இந்தத் தேர்தல், அரசியல் அங்கீகாரம் குறித்த அரசியல் ஸ்தாபனங்களின் பாரம்பரிய அனுமானங்களை வாக்காளர்கள் சவாலுக்கு உட்படுத்தியதைக் காட்டியது. இந்த பின்னணியில்தான், மாநிலத்தைக் கைப்பற்றிய புதிய சக்திகளை ஸ்டாலின் தொடர்ந்து கேள்வி எழுப்பி வருகிறார். "இப்போது அதிகாரத்திற்கு வந்திருப்பவர்களைப் பாருங்கள். மக்களுக்காகப் பணியாற்றாமல், போராட்டங்களை நடத்தாமல், கோட்பாடுகள் இல்லாமல், அமைப்புக் கட்டமைப்பு எதுவும் இல்லாமல் அவர்கள் அதிகாரத்திற்கு வந்திருக்கிறார்கள்" என்று திமுக தலைவர் கூறினார். சுருக்கமாகச் சொன்னால், த.வெ.க-விடம் இல்லாத ஒன்று அதாவது வரலாறு தங்கள் இயக்கத்திடம் உள்ளது என்பதைத் தனது சக தோழர்களுக்கு அவர் நினைவூட்ட முயன்றார். இருப்பினும், ஒரு மூத்த தலைவர் கூறியது போல, அது மிக முக்கியமான கேள்வியொன்றை எழுப்புகிறது. "போதுமான போராட்டம், கொள்கை அல்லது அமைப்பு இல்லாதவர்கள் இந்த மூன்றும் உள்ள ஒரு கட்சியைத் தோற்கடித்தார்கள் என்றால், வாக்காளர்கள் எதைத் தேர்ந்தெடுத்தார்கள்?" என்று அந்தத் தலைவர் கேட்டார். "த.வெ.க-விடம் அதிகாரத்திற்கான பாரம்பரியத் தகுதிகள் இல்லை என்று சொல்வது, அரசியல் பற்றிய நமது சொந்தப் புரிதலின் அடிப்படையில் நியாயமானதாக இருக்கலாம். ஆனால் வாக்காளர்கள் தெளிவாக வேறொரு வரையறையைப் பயன்படுத்தி இருக்கிறார்கள்." அதுவே, இந்தத் தோல்வியை குறிப்பாகக் கொளத்தூரில் ஸ்டாலின் அடைந்த தோல்வியை கட்சியால் எளிதில் ஏற்றுக்கொள்ள முடியாமல் போவதற்கான காரணம் என்று அந்த மூத்த தலைவர் கூறினார். திராவிட அரசியல் குடும்பத்தைச் சேர்ந்த ஒரு மூத்த கல்வியாளர் கூறுகையில், "தி.மு.கவைப் பொறுத்தவரை விஜய் வெறும் எதிரி மட்டுமல்ல. அரசியல் என்பது கொள்கை, அமைப்பு மற்றும் பல ஆண்டுகால அரசியல் பணியின் மூலமே சம்பாதிக்கப்பட வேண்டும் என்ற அதன் அடிப்படை நம்பிக்கையையே அவரது வெற்றி சவால் செய்கிறது. கட்சி எப்படி அரசியல் செய்ய வேண்டும் என்று நம்புகிறதோ, அந்த வழியில் செய்யாமலேயே அவர் வென்றுள்ளார்" என்றார். முறையான அரசியல் கட்சியாக இருக்கத் தெரியாது என்று தான் கூறும் ஒரு கட்சியிடம் தமிழ்நாட்டை இழந்த பிறகு, திமுகவின் உடனடித் தீர்வு "இன்னும் சிறந்த திமுகவாக மாறுவது மட்டுமே" என்று கூறிய அந்த கல்வியாளர், "இது எப்படி இருக்கிறது என்றால், தனது பகுதியில் உள்ளவர்கள் நாளிதழ்களில் இருந்து ஸ்மார்ட் போன்களுக்கு மாறிவிட்டார்கள் என்பதைத் தெரிந்துகொண்ட பிறகும், நாளிதழின் விநியோக வலையமைப்பைச் சீரமைக்க முயல்வதைப் போல இருக்கிறது" என்றார். இருப்பினும், தேர்தலில் படுதோல்வி அடைந்த பிறகு எந்தவொரு கட்சியும் தம்மைத்தானே சுயபரிசோதனை செய்துகொள்வது அரிது என்பதால் ஸ்டாலினுக்கு இதற்கான பெருமை சேர வேண்டும் என்று சிலர் கருதுகிறார்கள். உள்ளூர் தலைவர்கள் மீதான அவரது விமர்சனம் மிகவும் குறிப்பிட்டதாக இருந்தது. திமுக தனது தொடக்கக் காலத்தில் பழைய அமைப்பை மொழி, சினிமா, மேடைப் பேச்சு, பகுத்தறிவு மற்றும் சமூக நீதி வாதங்கள் மூலம் தகர்த்தெறிந்த ஒரு கிளர்ச்சி இயக்கமாக இருந்தது; ஆனால் காலப்போக்கில் அதுவே ஒரு பெரிய நிறுவனமாக மாறி, இப்போது மற்றொரு அரசியல் கிளர்ச்சியாளரை எதிர் நோக்கியுள்ளது என்பதை ஸ்டாலின் சுட்டிக்காட்டுவது போல் இருந்தது. "மனிதர்களைப் போலவே நிறுவனங்களும் தங்களுக்கு ஏற்கனவே தெரிந்த உலகத்திற்குள் சிக்கிக்கொள்ளக்கூடும். பழகிப்போன விஷயங்கள் ஒரு தேர்வாகத் தெரிவது நின்றுபோய், அதுவே நிஜமாகத் தோற்றமளிக்கத் தொடங்கும்" என்று அந்தச் கல்வியாளர் கூறினார். இருப்பினும், வலுவான அமைப்புகள் தோல்விகளைத் தாண்டி வாழும் என்பதில் ஸ்டாலின் சொல்வது சரியே. திமுக இதை பலமுறை செய்துள்ளது, மேலும் அதன் வரலாற்று நினைவாற்றலே த.வெ.க-வை எதிர்கொள்ளும்போது அதன் மிகப்பெரிய சொத்தாக இருக்கும். ஆனால், மீண்டும் எழுச்சி பெற கடந்த முறை எப்படி மீண்டு வந்தோம் என்பதை நினைவில் வைத்திருப்பதை விட அதிக உழைப்பு தேவைப்படுகிறது. ஸ்டாலின் தொண்டர்களிடம், வெளிப்படை பிரச்சாரத்திற்குச் செல்லும் முன் தங்கள் வீடுகளிலிருந்தே பிரச்சாரத்தைத் தொடங்குமாறு கூறினார்: வெளியில் செல்வதற்கு முன் குழந்தைகள், உறவினர்கள் மற்றும் அண்டை வீட்டாரின் வாக்குகளை உறுதிப்படுத்துங்கள் என்றார். இது நடைமுறைக்கு ஏற்ற ஆலோசனையாக இருந்தாலும், கவனம் அறியாமல் கட்சியின் உண்மையான பிரச்சினையையும் சுட்டிக் காட்டியிருக்கலாம். "ஒரு தொண்டர் தனது குடும்பத்தினருடன் உணவு மேஜையில் அமர்ந்திருக்கலாம். பரம்பரை திமுக குடும்பத்தைச் சேர்ந்த ஒரு குழந்தை பெரியாரை வியக்கலாம், சமூக நீதியை ஏற்கலாம், திராவிட இயக்கம் உருவாக்கிய அரசியல் மொழியைப் பேசலாம், ஆனாலும் விஜய்க்கு வாக்களிக்கலாம்... அந்த வாக்காளரை ஒரு சிறந்த உறுப்பினர் பதிவேடு மூலமாகவோ அல்லது புதிய மாவட்டச் செயலாளர் மூலமாகவோ மீட்டெடுக்க முடியாது" என்று அந்தச் கல்வியாளர் விளக்கினார். திமுகவின் முன்னாள் அமைச்சர்கள், நீண்டகால தோழர்கள் மற்றும் பின்னர் த.வெ.க-வில் இணைந்த ஒரு தலைவர் உட்பட பலருடன் உரையாடியபோது அவர்கள் ஒரு புள்ளியைத் திரும்பத் திரும்ப வலியுறுத்தினர். கட்சியின் சவால் வெறும் அமைப்பை மறுசீரமைப்பது மட்டுமல்ல; திராவிட இயக்கம் உருவாக்கிய உலகத்தின் பெரும்பாலான பலன்களைப் பெற்றுக்கொண்டு, அதன் முதன்மைப் பாதுகாவலருக்கு இனி தன் வாக்கு தகுதியானது அல்ல என்று ஒருவர் ஏன் முடிவு செய்தார் என்பதைப் புரிந்து கொள்வதே ஆகும். "ஸ்டாலின் முதல் பணியைத் தொடங்கியுள்ளார். திமுக மாற வேண்டும் என்பதை உணர்ந்துள்ளது என்பதற்கு அவரது உரையே சான்று" என்று முன்னாள் அமைச்சர் ஒருவர் கூறினார். ஸ்டாலின் சொன்னது போல், ஒரு விளக்கு தன் அடியில் இருக்கும் இருளைப் பார்க்காமல் முழு ஊருக்கும் ஒளி தரக்கூடும். ஆனால் இந்தத் தேர்தலுக்குப் பிறகு, திமுக மற்றொரு சாத்தியக்கூறையும் பரிசீலிக்க வேண்டும். ஒருவேளை, அந்த ஊரே மாறியிருக்கலாம்.