இத்தாலியின் நீண்டகால பிரதமர்: ஜார்ஜியா மெலோனிக்கு பிரதமர் மோடி வாழ்த்து

இத்தாலியின் போருக்குப் பிந்தைய வரலாற்றில், தொடர்ந்து மிக நீண்ட காலம் பிரதமராகப் பணியாற்றும் பெருமையை ஜார்ஜியா மெலோனி பெற்றுள்ளார். இந்த சாதனையை முன்னிட்டு, அவருக்கு இந்தியப் பிரதமர் நரேந்திர மோடி தனது மனமார்ந்த வாழ்த்துகளைத் தெரிவித்துள்ளார்.

ஜார்ஜியா மெலோனி கடந்த 2022 அக்டோபர் 22 அன்று இத்தாலியின் பிரதமராகப் பதவியேற்றார். இவர் இத்தாலியின் பிரதமராகப் பொறுப்பேற்ற முதல் பெண்மணி என்பது குறிப்பிடத்தக்கது. கடந்த வியாழக்கிழமையுடன் அவர் பதவியில் இருந்து 1,413 நாட்களை நிறைவு செய்துள்ள நிலையில், போருக்குப் பிந்தைய இத்தாலிய வரலாற்றில் இவ்வளவு நீண்ட காலம் தொடர்ந்து ஆட்சியில் இருந்த பிரதமர் என்ற சாதனையை அவர் எட்டியுள்ளார்.

இது குறித்து பிரதமர் மோடி தனது எக்ஸ் சமூக வலைதளப் பக்கத்தில் பதிவிட்டுள்ளார். மெலோனியின் இந்த மைல்கல், அவரது தலைமையின் மீது இத்தாலிய மக்கள் வைத்துள்ள நம்பிக்கையையும் உறுதியையும் வெளிப்படுத்துவதாக அவர் குறிப்பிட்டுள்ளார். மேலும், இந்தியா மற்றும் இத்தாலி இடையிலான சிறப்பு உத்திசார் கூட்டாண்மையை வலுப்படுத்துவதில் மெலோனியின் நட்பு முக்கியப் பங்காற்றியுள்ளதாகவும், இரு நாட்டு மக்களின் வளமான எதிர்காலத்திற்காகத் தொடர்ந்து இணைந்து பணியாற்ற விரும்புவதாகவும் அவர் தெரிவித்துள்ளார்.