முஸ்லிம்களுக்கு ஹிஜாப் கட்டாயம் என்பதற்கு ஆதாரம் இல்லை; மாணவியின் மனுவைத் தள்ளுபடி செய்தது ஐகோர்ட்

பள்ளியில் ஹிஜாப் அணிவது ஒரு இன்றியமையாத மதப் பழக்கம் என்ற சிறுமியின் வாதத்திற்கு ஆதரவாகப் போதிய மத நூல்களோ அல்லது ஆதாரங்களோ தாக்கல் செய்யப்படவில்லை என்று கூறி அலகாபாத் உயர் நீதிமன்றம் மனுவைத் தள்ளுபடி செய்தது. ஆங்கிலத்தில் படிக்க: ஒழுக்கம் மற்றும் சீரான தன்மையைப் பேணும் நோக்கில் ஒரு நிறுவனம் குறிப்பிட்ட சீருடையை அமல்படுத்த முடியும் என்று குறிப்பிட்ட அலகாபாத் உயர் நீதிமன்றம், தனியார் சி.பி.எஸ்.இ பள்ளியில் நிர்ணயிக்கப்பட்ட சீருடையுடன் ஹிஜாப் அணிய அனுமதி கோரிய சிறுமியின் கோரிக்கையை அண்மையில் நிராகரித்தது. 11-ம் வகுப்பு மாணவி ஒருவர், சீருடையுடன் ஹிஜாப் அணியப் பள்ளிக்கு உத்தரவிடக் கோரித் தாக்கல் செய்த மனுவை நீதிபதிகள் ஜே. ஜே. முனீர் மற்றும் இந்திரஜித் சுக்லா ஆகியோர் அடங்கிய அமர்வு விசாரித்தது. "பள்ளி மாணவர்களுக்கு நிர்ணயிக்கப்படும் சீருடை பல நோக்கங்களை நிறைவேற்றுகிறது. அது ஒழுக்கம், குழந்தைகளிடையே சமத்துவம், நிறுவன அடையாளத்தைப் பிரதிபலிப்பது மற்றும் வகுப்பறைக்குள் வேறுபாடுகளைத் தவிர்ப்பது போன்றவற்றை வளர்க்கிறது. மாணவர்கள் சீருடை அணிய வேண்டும் என்ற விதி, மதச் சார்பற்ற சூழலை ஊக்குவிக்கிறது" என்று ஆகஸ்ட் 21 அன்று அளித்த தீர்ப்பில் நீதிமன்றம் தெரிவித்துள்ளது. இந்த விவகாரம் எங்கு எழுந்தாலும், தலைக்கவசம் (ஹிஜாப்) அணிவது இஸ்லாமிய மதத்தில் பெண்களுக்கு ஒரு இன்றியமையாத பகுதி அல்ல என்பதில் உயர் நீதிமன்றங்கள் "ஏகமனதாக" கருத்து தெரிவித்துள்ளன என்று நீதிமன்றம் சுட்டிக்காட்டியுள்ளது. "இங்கே, ஒரு முஸ்லிம் பெண்ணிற்கு ஹிஜாப் அணிவது மதத்தின் இன்றியமையாத பகுதி என்பதை நிரூபிக்க எந்த ஆதாரமும் அளிக்கப்படவில்லை. இத்தகைய வாதங்களும் ஆதாரங்களும் இல்லாத நிலையில், மனுதாரருக்குச் சாதகமாக நாங்கள் தீர்ப்பளிக்க முடியாது" என்றும் நீதிமன்றம் சேர்த்துக் கொண்டது. நீதிபதிகள் ஜே. ஜே. முனீர் மற்றும் இந்திரஜித் சுக்லா ஆகியோர் அடங்கிய அமர்வு ஆகஸ்ட் 21-ல் இந்த வழக்கை விசாரித்தது. பள்ளி நிர்வாகம் தனது சீருடைக் கொள்கையை மாற்றவும், ஆடைக் குறியீட்டை மாற்றியமைக்கவும் உரிமை உள்ளது என்றும், மாணவர்கள் அதற்குக் கட்டுப்பட வேண்டும் என்றும் சுட்டிக்காட்டிய நீதிமன்றம், "இது நிர்ணயிக்கப்பட்ட சீருடை மாற்றப்பட்ட வழக்கு அல்ல. மாறாக, கீழ் வகுப்புகளில் படிக்கும் போது சீருடையில் மனுதாரர் செய்த மாற்றத்தை (ஹிஜாப் சேர்த்ததை) இப்போது கைவிடுமாறு பள்ளி நிர்வாகம் வலியுறுத்துகிறது" எனக் குறிப்பிட்டது. மனுதாரர் கீழ் வகுப்புகளில் படித்தபோது பள்ளியின் எதிர்ப்பின்றி ஹிஜாப் அணிந்திருந்தார் என்பதற்காகவே, 11-ம் வகுப்பில் சேரும் மாணவிக்காகச் சீருடைக் கொள்கையைத் தளர்த்தப் பள்ளியைப் வற்புறுத்த அவருக்கு முழு உரிமை வந்துவிடாது என்றும் அமர்வு கூறியது ஹிஜாப் கட்டுப்பாட்டை எதிர்த்து மாணவி மனு சீருடையுடன் ஹிஜாப் தொடர்ந்து அணிய விரும்பியதால், 11-ஆம் வகுப்பில் தனக்கு அனுமதி மறுக்கப்பட்டதாகக் கூறி, அந்தச் சிறுமி தனது தாயார் மூலமாக நீதிமன்றத்தை அணுகினார். மனுவின்படி, அவர் 6 முதல் 10-ஆம் வகுப்பு வரை அந்தப் பள்ளியில்தான் படித்தார் என்றும், அந்த ஆண்டுகளில் எதிர்ப்பின்றி ஹிஜாப் அணிந்திருந்தார் என்றும் தெரிவித்தார். சீருடையுடன் ஹிஜாப் அணிந்திருந்த தனது அடையாள அட்டைகள் மற்றும் புகைப்படங்களையும் அவர் தாக்கல் செய்தார். 10-ம் வகுப்பு முடித்த பிறகு 11-ம் வகுப்பில் சேரச் சென்றபோது, வகுப்பறையில் ஹிஜாப் அணியக் கூடாது என தெரிவிக்கப்பட்டுள்ளது. இதையடுத்து, எந்தவித பாகுபாடுமின்றி கல்வியைத் தொடர உதவக்கோரி, மே 14 மற்றும் ஜூன் 10 ஆகிய தேதிகளில் மாவட்ட ஆட்சியரிடம் சிறுமி புகார் அளித்தார். மாவட்ட ஆட்சியர் பள்ளி ஆய்வாளரிடம் அறிக்கை கோரினார், அதில் பள்ளி தனது நிலைப்பாட்டைப் பதிவு செய்தது. தான் முஸ்லிம் ஷியா பிரிவைச் சேர்ந்தவர் என்றும், சிறுவயதிலிருந்தே ஹிஜாப் அணிவது தனது மதப் பழக்கத்தின் ஒரு பகுதி என்றும் அந்தச் சிறுமி கூறினார். அதை அணியத் தடை விதிப்பது அரசியலமைப்புச் சட்டப் பிரிவு 14 மற்றும் 19(1)(a)-ன் கீழ் தனது அடிப்படை உரிமைகளை மீறுவதாகும் என்றும், ஹிஜாப் அணிந்து வகுப்புகளில் கலந்துகொள்ள அனுமதிக்குமாறும் அவர் கோரிக்கை விடுத்தார்.