தமிழகத்தில் உள்ள அனைத்து வணிக நிறுவனங்களிலும் தமிழில் பெயர் பலகை கட்டாயம்: உயர் நீதிமன்றம் உத்தரவு

தமிழகத்தில் உள்ள அனைத்து வணிக நிறுவனங்களின் பெயர் பலகைகளும் தமிழில் இடம்பெற வேண்டும் என்று சென்னை உயர் நீதிமன்றம் உத்தரவிட்டுள்ளது. இதற்காக அனைத்துக் கடைகளுக்கும் வரும் நவம்பர் 1-ஆம் தேதி வரை கால அவகாசம் வழங்கப்பட்டுள்ளது. குறிப்பிட்ட இந்தத் தேதிக்குள் அனைத்து வணிக நிறுவனங்களும் தங்களது பெயர் பலகைகளைத் தமிழ் மொழியில் மாற்றி அமைக்க வேண்டும் என்று அறிவுறுத்தப்பட்டுள்ளது.

வணிக நிறுவனங்களின் பெயர்ப் பலகைகளில் தமிழை கட்டாயமாக்கி கடந்த 2025-ஆம் ஆண்டு ஜூன் மாதம் தமிழக அரசு அரசாணை பிறப்பித்திருந்தது. இந்த விதிமுறையானது சென்னை மாநகராட்சி உள்ளிட்ட மாநிலத்தின் அனைத்துப் பகுதிகளிலும் உள்ள கடைகளுக்கும் பொருந்தும் என்று தெரிவிக்கப்பட்டுள்ளது. இந்த உத்தரவைச் செயல்படுத்துவதை உறுதி செய்யும் வகையில் தற்போது நீதிமன்றம் இந்த காலக்கெடுவை நிர்ணயித்துள்ளது.