'60,000 கோடி முதலீட்டு மாநாடு வெறும் பில்டப்பா?'-அலசும் அரசியல் விமர்சகர் பால்கி

தமிழக அரசு அண்மையில் நடத்திய முதலீட்டு மாநாடு மற்றும் அதன் மூலம் ஈர்க்கப்பட்ட முதலீடுகள், உருவாக்கப்படவுள்ள வேலைவாய்ப்புகள் குறித்து சட்டப்பேரவையில் காரசாரமான விவாதங்கள் நடைபெற்று வருகின்றன. முந்தைய அரசு கொண்டு வந்த திட்டங்களுக்கும், தற்போதைய அரசு அறிவித்துள்ள திட்டங்களுக்கும் இடையிலான ஒப்பீடுகள் மற்றும் வெளிப்படைத்தன்மை குறித்து எதிர்க்கட்சிகள் தொடர்ந்து கேள்விகளை எழுப்பி வருகின்றன. இதுகுறித்து அரசியல் விமர்சகர் பால்கி நக்கீரன் டிவிக்கு அளித்த பிரத்யேக நேர்காணலில் தனது பார்வைகளைப் பகிர்ந்து கொண்டார். "அரசு தங்களின் 100 நாள் சாதனையாக முதலீட்டு மாநாட்டைக் குறிப்பிடுகிறது. இதன் மூலம் ஒரு லட்சம் பேருக்கு வேலைவாய்ப்பு, 765 திட்டங்கள் மற்றும் 60 ஆயிரம் கோடி ரூபாய் மதிப்பிலான திட்டங்கள் பற்றி பேசப்படுகிறது. ஆனால், சட்டமன்றத்தில் எதிர்க்கட்சியினர் 'இதில் நீங்கள் உருவாக்கிய திட்டங்கள் எவ்வளவு, நாங்கள் ஆட்சியில் இருந்தபோது முந்தைய அரசு வச்சிட்டுப் போன திட்டங்கள் எவ்வளவு?' என்ற கேள்வியைக் கேட்கும்போது, சம்பந்தப்பட்ட தொழில்துறை அமைச்சரால் அதற்குத் தெளிவான பதில் சொல்ல முடியவில்லை. ஏற்கனவே திமுக அரசு 45,000 கோடி ரூபாய் முதலீடுகளைக் கோரியிருந்த நிலையில், தற்போதைய அரசு அதனை 60,000 கோடியாக உயர்த்தி 15,000 கோடி கூடுதல் முன்னேற்றம் காட்டியிருந்தாலும், அதில் உள்ள உள்விவரங்களை அவர்களால் துல்லியமாக விளக்க முடியவில்லை. இதனால்தான் எதிர்க்கட்சிகள் இவை அனைத்தும் தங்களின் திட்டங்கள் என்று உரிமை கொண்டாடுகின்றன. மேலும், பத்தாயிரம் கோடி ரூபாய் மூலதனம் கொண்ட லெட்டர் பேடு அமைப்புகள் கூட இந்த டெண்டர்களில் பங்கேற்கலாம் என்ற குற்றச்சாட்டுகள் பொதுவெளியில் எழுந்துள்ளன. முதலமைச்சரின் தனி மாளிகைக்கு ஆன்லைன் டெண்டர் கோரப்பட்டதற்கான முறையான நடைமுறைகள் கூட வெளிப்படையாகக் காட்டப்படவில்லை. அரசு கூறும் வெளிப்படைத்தன்மை என்பதில் மிகப்பெரிய ஏமாற்று வேலை இருப்பதாகவே தோன்றுகிறது. மதுராந்தகத்தில் உள்ள ஒரு குறிப்பிட்ட மது நிறுவனம் தயாரிக்கும் 21 வகையான செயற்கை ருசி கொண்ட மதுவகைகளுக்கு அரசு முதலில் தடை விதித்துவிட்டு, ஒரே நாளில் அந்தத் தடையைத் திரும்பப் பெற்றுள்ளது. இதற்கான காரணம் என்னவென்று சட்டமன்ற உறுப்பினர்களுக்கும் தெரியவில்லை, பொதுமக்களுக்கும் தெரியவில்லை" என்றார்.