ரூ.12 லட்சம் வரை மிச்சப்படுத்தலாம்: கம்மியான வட்டியில் ஹோம் லோன் கொடுக்கும் பேங்க்ஸ்

சொந்தமாக வீடு வாங்க வேண்டும் என்பது பலரின் கனவு. ஆனால், வீடு வாங்குவதற்காக பல ஆண்டுகளுக்கு கடன் வாங்கும்போது, வங்கியின் வட்டி விகிதம் மிகவும் முக்கியமானதாகிறது. வட்டி விகிதத்தில் சிறிய மாற்றம் இருந்தாலும், 20 அல்லது 30 ஆண்டுகள் கடன் செலுத்தும்போது மொத்தமாக செலுத்த வேண்டிய வட்டி தொகையில் பெரிய வித்தியாசம் ஏற்படலாம். தற்போது ரூ.30 லட்சத்துக்கு மேல் மற்றும் ரூ.75 லட்சம் வரை வீட்டுக்கடன் வாங்க நினைப்பவர்கள், பொதுத்துறை மற்றும் தனியார் வங்கிகளில் 7 சதவீதம் முதல் தொடங்கும் வட்டி விகிதங்களைப் பெற முடிகிறது. ஆகஸ்ட் 19, 2026 நிலவரப்படி Paisabazaar தரவுகளின் அடிப்படையில், எந்த வங்கிகளில் குறைந்த வட்டி விகிதம் உள்ளது என்பதைப் பார்க்கலாம். பொதுத் துறை வங்கிகளில் குறைந்த வட்டி எவ்வளவு? பொதுத் துறை வங்கிகளில் பாங்க் ஆஃப் மகாராஷ்டிரா மற்றும் சென்ட்ரல் பேங்க் ஆஃப் இந்தியா ஆகியவை குறைந்தபட்சமாக 7% வட்டியில் வீட்டுக்கடன் வழங்குகின்றன. பாங்க் ஆஃப் மகாராஷ்டிராவின் வீட்டுக்கடன் வட்டி 7% முதல் 9.90% வரை உள்ளது. சென்ட்ரல் பேங்க் ஆஃப் இந்தியாவில் இது 7% முதல் 9.15% வரை உள்ளது. அதற்கு அடுத்ததாக பாங்க் ஆஃப் இந்தியா 7.10% முதல் 10% வரை வட்டி வசூலிக்கிறது. இந்தியன் வங்கி மற்றும் யூகோ வங்கி ஆகியவற்றில் குறைந்தபட்ச வட்டி 7.15% ஆக உள்ளது. இந்தியன் வங்கியின் வட்டி 7.15% முதல் 9.55% வரையிலும், யூகோ வங்கியின் வட்டி 7.15% முதல் 9.25% வரையிலும் உள்ளது. யூனியன் பேங்க் ஆஃப் இந்தியா மற்றும் இந்தியன் ஓவர்சீஸ் வங்கி ஆகியவற்றில் வீட்டுக்கடன் வட்டி 7.15% மற்றும் 7.20% முதல் தொடங்குகிறது. பாங்க் ஆஃப் பரோடா மற்றும் கனரா வங்கி ஆகியவற்றில் குறைந்தபட்ச வட்டி 7.20% ஆக உள்ளது. பாங்க் ஆஃப் பரோடாவின் வட்டி 7.20% முதல் 9% வரையிலும், கனரா வங்கியின் வட்டி 7.20% முதல் 10% வரையிலும் உள்ளது. பஞ்சாப் நேஷனல் வங்கி 7.25% முதல் 9.20% வரையிலும், ஸ்டேட் பேங்க் ஆஃப் இந்தியா 7.25% முதல் 9.05% வரையிலும் வீட்டுக்கடன் வழங்குகிறது. பஞ்சாப் அண்ட் சிந்த் வங்கியில் வட்டி 7.35% முதல் 10.75% வரையிலும் உள்ளது. தனியார் வங்கிகளில் நிலை என்ன? தனியார் வங்கிகளைப் பார்க்கும்போது, சவுத் இந்தியன் வங்கி குறைந்தபட்சமாக 7.25% வட்டியில் வீட்டுக்கடன் வழங்குகிறது. இதற்கு அடுத்ததாக ஃபெடரல் வங்கி 7.35% முதல் வட்டி வசூலிக்கிறது. எச்எஸ்பிசி வங்கி 7.45% முதல் வட்டியையும், கர்நாடகா வங்கி 7.48% முதல் வட்டியையும் வழங்குகிறது. ஐசிஐசிஐ வங்கியில் வீட்டுக்கடன் வட்டி 7.50% முதல் தொடங்குகிறது. கோட்டக் மஹிந்திரா வங்கி 7.60% முதல், ஹெச்டிஎஃப்சி வங்கி 7.75% முதல் வட்டி வசூலிக்கின்றன. இதற்கு மேல், தமிழ்நாடு மெர்க்கன்டைல் வங்கி 7.90% முதல் 9.30% வரையிலும், ஆக்சிஸ் வங்கி 8% முதல் 11.90% வரையிலும் வட்டி விகிதம் கொண்டுள்ளன. சிட்டி யூனியன் வங்கி 8.50% முதல் 10% வரையிலும், கரூர் வைஸ்யா வங்கி 8.50% முதல் 10.65% வரையிலும், பந்தன் வங்கி 8.55% முதல் 13.52% வரையிலும் வட்டி வசூலிக்கின்றன. 1% வட்டி வித்தியாசம் எவ்வளவு தாக்கத்தை ஏற்படுத்தும்? வீட்டுக்கடனில் வட்டி விகிதத்தை குறைத்து வாங்குவது ஏன் முக்கியம் என்பதற்கு ஒரு உதாரணத்தைப் பார்க்கலாம். ரூ.50 லட்சத்தை 30 ஆண்டுகளுக்கு கடனாக வாங்குகிறீர்கள் என்று வைத்துக்கொள்வோம். 7% வட்டி என்றால், மாத தவணை ஒப்பீட்டளவில் குறைவாக இருக்கும். அதே கடனுக்கு 8% வட்டி விதிக்கப்பட்டால், மாத EMI மட்டுமல்லாமல், 30 ஆண்டுகளில் செலுத்தும் மொத்த வட்டியும் கணிசமாக அதிகரிக்கும். இந்த உதாரணத்தில் 7%க்கு பதிலாக 8% வட்டி செலுத்தினால், 30 ஆண்டுகளில் சுமார் ரூ.12.32 லட்சம் கூடுதல் வட்டி செலுத்த வேண்டிய நிலை ஏற்படும். அதனால், வீட்டுக்கடன் வாங்கும்போது 0.50% அல்லது 1% வித்தியாசத்தை சாதாரணமாக எடுத்துக்கொள்ளக்கூடாது. உங்கள் கிரெடிட் ஸ்கோர் முக்கியம் வங்கிகள் விளம்பரப்படுத்தும் குறைந்தபட்ச வட்டி விகிதம் அனைவருக்கும் ஒரே மாதிரியாக கிடைக்கும் என்று அர்த்தமில்லை. குறிப்பாக, கிரெடிட் ஸ்கோர் வீட்டுக்கடன் வட்டியை நிர்ணயிப்பதில் முக்கிய பங்கு வகிக்கிறது. கடனை சரியான நேரத்தில் திருப்பிச் செலுத்தும் திறன் மற்றும் முந்தைய கடன் வரலாறு உள்ளிட்டவற்றை மதிப்பிடுவதற்கு கிரெடிட் ஸ்கோர் பயன்படுத்தப்படுகிறது. கிரெடிட் ஸ்கோர் சிறப்பாக இருந்தால், குறைந்த வட்டியில் கடன் கிடைக்கும் வாய்ப்பு அதிகமாக இருக்கலாம். வட்டி விகிதம் ஏன் ஒருவருக்கு ஒருவர் மாறுகிறது? ஒரே வங்கியில் வீட்டுக்கடன் வாங்கினாலும், அனைத்து வாடிக்கையாளர்களுக்கும் ஒரே வட்டி விகிதம் கிடைக்க வேண்டிய அவசியமில்லை. கடன் வாங்குபவரின் கிரெடிட் ஸ்கோர், மாத வருமானம், வேலை அல்லது தொழில் நிலை, கடன் தொகை, திருப்பிச் செலுத்தும் காலம் மற்றும் ஏற்கனவே உள்ள கடன் பொறுப்புகள் போன்ற பல விஷயங்களை வங்கிகள் பரிசீலிக்கின்றன. எனவே, வங்கி விளம்பரத்தில் காட்டப்படும் குறைந்தபட்ச வட்டி விகிதத்தைப் பார்த்தவுடன் அதே வட்டி உங்களுக்கும் கிடைக்கும் என்று கருதக்கூடாது. இ.எம்.ஐ. என்றால் என்ன? வீட்டுக்கடன் வாங்கிய பிறகு ஒவ்வொரு மாதமும் வங்கிக்கு செலுத்தும் தொகைதான் இ.எம்.ஐ. எனப்படும். இந்த மாத தவணையில், நீங்கள் வாங்கிய அசல் கடன் தொகையின் ஒரு பகுதியும், அதற்கான வட்டியின் ஒரு பகுதியும் அடங்கியிருக்கும். கடன் தொகை மற்றும் வட்டி விகிதம் அதிகமாக இருந்தால் EMI அதிகரிக்கும். அதேபோல், கடனை திருப்பிச் செலுத்தும் காலத்தை நீட்டித்தால் மாத EMI குறையலாம்; ஆனால் நீண்ட காலத்தில் செலுத்தும் மொத்த வட்டி அதிகரிக்க வாய்ப்பு உள்ளது. எனவே, வீட்டுக்கடன் வாங்கும் முன் வட்டி விகிதம் மட்டுமல்லாமல் இ.எம்.ஐ., மொத்த வட்டி, கடன் காலம் மற்றும் உங்களுக்கு வங்கி வழங்கும் உண்மையான வட்டி விகிதம் ஆகியவற்றையும் ஒப்பிட்டு முடிவு செய்வது முக்கியம். குறிப்பு: மேலே குறிப்பிடப்பட்டுள்ள வட்டி விகிதங்கள் ஆகஸ்ட் 19, 2026 அன்று கிடைத்த தகவல்களின் அடிப்படையிலானவை. வங்கிகளின் விதிமுறைகள், வட்டி விகிதங்கள் மற்றும் தனிநபருக்கான கடன் சலுகைகள் மாறுபடலாம்.