2036-க்குள் 1.5 டிரில்லியன் டாலர் பொருளாதாரம் இலக்கு: அமைச்சர் கீர்த்தனா

சென்னையில் நடைபெற்ற 'வெற்றி தமிழ்நாடு 2026' முதலீட்டாளர்கள் மாநாட்டில் முதலமைச்சர் விஜய் முன்னிலையில் பல முக்கியத் தொழில் முதலீடுகளுக்கான புரிந்துணர்வு ஒப்பந்தங்கள் கையெழுத்தாகின. இந்நிகழ்வில் உரையாற்றிய அமைச்சர் கீர்த்தனா, தமிழகத்தின் தொழிற்துறை வளர்ச்சி மற்றும் எதிர்காலப் பொருளாதார இலக்குகள் குறித்துப் பேசினார். இந்தியாவின் பிற மாநிலங்களோடு ஒப்பிடுகையில், தொழில்துறை முதலீடுகளுக்கு மிகவும் ஏற்ற மற்றும் நம்பகமான மாநிலமாகத் தமிழ்நாடு முதலிடம் வகிக்கிறது. தவெக அரசுப் பொறுப்பேற்ற முதல் 100 நாட்களிலேயே சுமார் 1 லட்சம் கோடி ரூபாய் மதிப்பிலான முதலீடுகள் ஈர்க்கப்பட்டுள்ளன. நாளொன்றுக்கு சராசரியாக 1,000 கோடி ரூபாய் என்ற வீதத்தில் முதலீடுகள் ஈர்க்கப்பட்டு, இதுவரை 97 புரிந்துணர்வு ஒப்பந்தங்கள் கையெழுத்தாகியுள்ளன. இதன் மூலம் சுமார் 1,06,998 பேருக்குப் புதிய வேலைவாய்ப்புகள் உருவாகும் என எதிர்பார்க்கப்படுகிறது. புதிய வணிகங்கள் மற்றும் தொழிற்சாலைகளைத் தொடங்குவதை எளிதாக்கும் வகையில், விண்ணப்பித்த 21 நாட்களுக்குள் தேவையான அனைத்து அனுமதிகளையும் வழங்கும் அதிவேக நடைமுறை அமல்படுத்தப்பட்டுள்ளது. தமிழகத்தில் அபரிமிதமான மனிதவளமும் திறமைமிக்க தொழிலாளர்களும் குவிந்துள்ளதால், முதலீடுகளுக்கான அனைத்துச் சாதகமான சூழல்களும் நிறைந்துள்ளன. வரும் 2036-ஆம் ஆண்டிற்குள் தமிழ்நாட்டின் பொருளாதாரத்தை 1.5 டிரில்லியன் அமெரிக்க டாலராக உயர்த்த வேண்டும் என்பதை இலக்காகக் கொண்டு அரசு இயங்கி வருகிறது. 'வெற்றி தமிழ்நாடு 2026' மாநாடு இந்த நீண்டகாலப் பயணத்தில் ஒரு முக்கிய மைல்கல்லாக அமைந்துள்ளது. வேலைதேடி இளைஞர்கள் யாரும் தங்கள் சொந்த ஊரைவிட்டு வெளியேறத் தேவையில்லாத நிலையை உருவாக்கி, உள்ளூரிலேயே தகுந்த வேலைவாய்ப்புகளை வழங்குவதே அரசின் முதன்மையான நோக்கம் என்றும் அமைச்சர் தெரிவித்தார்.