பகலிலேயே வரப்போகும் பேரிருள்: ஆக.12 அரிய முழு சூரிய கிரகணம்; இந்தியாவில் தெரியுமா?

வடக்கு அரைக்கோளத்தின் பல பகுதிகளை இருளில் மூழ்கடிக்கப் போகும் பிரமாண்ட விண்வெளி நிகழ்வாக, ஆகஸ்ட் 12 அன்று நிலவு, சூரியனுக்கும் பூமிக்கும் இடையே நேரடியாகக் கடந்து சென்று முழு சூரிய கிரகணத்தை உருவாக்க உள்ளது. ஒரு முழு சூரிய கிரகணத்தின் போது, நிலவானது சூரியனின் பிரகாசமான வெளிப்புறப் பரப்பான 'போட்டோஸ்பியரை' (Photosphere) முழுமையாக மறைக்கிறது. சூரியன் நிலவை விட 400 மடங்கு பெரியதாக இருந்தாலும், அது பூமியிலிருந்து 400 மடங்கு தொலைவில் உள்ளது என்ற அரிய தற்செயல் நிகழ்வே இந்த நிகழ்வைச் சாத்தியமாக்குகிறது. இதனால் பூமியின் வானத்தில் இவ்விரண்டும் ஒரே அளவில் இருப்பது போல் தோன்றுகின்றன. நிலவு சூரியனைக் கடக்கும்போது, அதன் நிழல் பூமியின் பரப்பில் விழுகிறது. இந்த நிழலின் மிக அடர்ந்த பகுதியான 'அம்ப்ரா' (Umbra), 'முழு மறைப்புப் பாதையை' (Path of totality) உருவாக்குகிறது. இந்தப் பாதையின் எல்லைக்குள் இருக்கும் அனைவரும் சூரியன் நிலவுக்குப் பின்னால் மறைவதைக் காண முடியும். முழு மறைப்பு நிகழும் பெரும்பாலான இடங்களில், இந்த முழு இருள் சூழல் 2 நிமிடங்களுக்கும் குறைவாகவே நீடிக்கும். இருப்பினும், கிரகணப் பாதையின் மையப் பகுதியில் முழு கிரகண நிகழ்வு சுமார் 2 நிமிடங்கள் 18 வினாடிகள் வரை நீடிக்கக்கூடும். முழு சூரிய கிரகணத்தைக் காணப்போகும் நகரங்கள் எவை? கிரீன்லாந்து, ஐஸ்லாந்து, வடக்கு ரஷ்யா, அட்லாண்டிக் பெருங்கடல், ஸ்பெயின் மற்றும் போர்ச்சுகலின் சிறிய பகுதி வழியாகச் செல்லும் ஒரு குறிப்பிட்ட குறுகிய பாதையில் சூரிய கிரகணம் முழுமையாகக் காட்சி அளிக்கும். ஐரோப்பாவின் பெரும்பாலான பகுதிகள், வட அமெரிக்கா மற்றும் வடமேற்கு ஆப்பிரிக்காவின் சில பகுதிகள் பகுதிச் சூரிய கிரகணத்தைக் காண முடியும். முழு சூரிய கிரகணம் தென்படும் முக்கிய நகரங்கள்: ஸ்டேஷன் நோர்ட், ஈசாஃப்ஜோர்தூர், போர்கார்னஸ், ரேக்யாவிக், கெஃப்லாவிக், சந்தாந்தேர், பில்பாவோ, கிஜோன், ஓவியேடோ, விடோரியா-காஸ்டீஸ், ஏ கொருன்யா, லூகோ, லோக்ரோனோ, பர்கோஸ், பொன்ஃபெர்ராடா, சராகோசா, பாலென்சியா, சாலோ, வல்லாடோலிட், மஹோன், போர்ட் டி பொலென்சா, அல்குடியா, செகோவியா, தெருயல், பால்மா, குவாடலஜாரா, குயென்கா, வலென்சியா, சாண்ட் அன்டோனி டி போர்ட்மேனி, இபிசா. பகுதிச் சூரிய கிரகணம் தென்படும் முக்கிய நகரங்கள்: அலர்ட், லாங்யியர்பியன், தன்மார்க்ஷாவ்ன், இடோக்கோர்ட்டூர்மிட், வெஸ்ட்மேனேயார், தோர்ஷாவ்ன், ஸ்டாக்ஹோம், ஒஸ்லோ, வார்சா, கோபன்ஹேகன், பெர்லின், டக்ளஸ், வியன்னா, டப்ளின், ஆம்ஸ்டர்டாம், ரோம், ப்ராக், லியூப்லியானா, லண்டன், பிரஸ்ஸல்ஸ், லக்சம்பர்க், பாரிஸ், சூரிச், மொனாக்கோ, அந்தோரா லா வெல்லா, மாட்ரிட், அல்ஜியர்ஸ், லிஸ்பன், ஜிப்ரால்டர், காசாபிளான்கா. இந்திய நகரங்களில் முழு சூரிய கிரகணத்தைப் பார்க்க முடியுமா? இல்ல, இந்த முறை இந்திய பகுதிகளில் முழு சூரிய கிரகணத்தையோ அல்லது பகுதி சூரிய கிரகணத்தையோ பார்க்க முடியாது. ஐரோப்பாவின் சில பகுதிகளில் சூரிய வெளிச்சம் திடீரென மறைவது, பகல் நேர வானத்தை சிறிது நேரத்திற்கு இருளாக்கும். மேலும், சூரியனின் பிரகாசமான மேற்பரப்பால் வழக்கமாக மறைக்கப்படும் அதன் வெளிப்புற வளிமண்டலமான 'கொரோனா' (Corona) பகுதி இதன் மூலம் வெளிப்படும். விஞ்ஞானிகள் இந்த அரிய வாய்ப்பைப் பயன்படுத்தி சூரியனின் கொரோனாவைப் பற்றி ஆய்வு செய்யவும், சூரிய வெளிச்சத்தின் தற்காலிக மறைவு பூமியின் வளிமண்டலத்தை எவ்வாறு பாதிக்கிறது என்பதைக் கண்காணிக்கவும் உள்ளனர். அமெரிக்க விண்வெளி அமைப்பான நாசா (NASA), சுமார் 50,000 அடி உயரத்தில் பறக்கும் தனது WB-57 ஆராய்ச்சி ஜெட் விமானத்தைப் பயன்படுத்தி இந்தக் கிரகணத்தைப் பின்தொடரத் திட்டமிட்டுள்ளது. இதன் மூலம் கொரோனா குறித்த தனது ஆய்வை சுமார் மூன்று நிமிடங்கள் வரை நீட்டிக்க உள்ளது.