சந்திரயான்-3 முதல் ககன்யான் வரை: விண்வெளி வரலாற்றில் இந்தியாவின் புதிய சகாப்தம்

மூன்று ஆண்டுகளுக்கு முன்பு, 2023 ஆகஸ்ட் 23 அன்று, சந்திரயான்-3 விண்கலத்தின் விக்ரம் லேண்டர் நிலவின் தென் துருவப் பகுதிக்கு அருகே பாதுகாப்பாகத் தரையிறங்கி உலக சாதனை படைத்தது. இதன் மூலம் நிலவில் விண்கலத்தை மெதுவாகத் தரையிறக்கிய நான்காவது நாடு என்ற பெருமையையும், தென் துருவப் பகுதியில் தடம் பதித்த முதல் நாடு என்ற பெருமையையும் இந்தியா பெற்றது. இந்த அளப்பரிய சாதனையைப் போற்றும் வகையில், அன்றைய தினத்தை 'தேசிய விண்வெளி தினம்' ஆக இந்திய அரசு அறிவித்தது. சந்திரயான்-3 திட்டம் ஒரு நிலவுப் பயணமாக மட்டுமல்லாமல், இந்தியாவின் ஒட்டுமொத்த தொழில்நுட்ப திறனையும் நிரூபிக்கும் களமாக அமைந்தது. எல்.வி.எம்.3-எம் 4 ராக்கெட் மூலம் விண்ணில் செலுத்தப்பட்ட இந்த விண்கலம், நிலவில் பாதுகாப்பாகத் தரையிறங்குவது, பிரக்யான் ரோவரை இயக்கி அறிவியல் பரிசோதனைகளை மேற்கொள்வது போன்ற அனைத்து நோக்கங்களையும் வெற்றிகரமாக நிறைவு செய்தது. சுமார் 14 பூமி நாட்களுக்கு நிகரான ஒரு நிலவு நாளில், நிலவின் மேற்பரப்பு வெப்பநிலை, நில அதிர்வுகள் மற்றும் கந்தகம் (Sulphur) உள்ளிட்ட பல்வேறு தனிமங்கள் நிலவில் இருப்பதை பிரக்யான் ரோவர் உறுதிசெய்தது. இந்த வெற்றியானது இந்தியாவிற்கு வெறும் பெருமையை மட்டும் தரவில்லை; விண்வெளித் துறையில் மிகப்பரிய கனவுகளைக் காண்பதற்கான நம்பிக்கையையும் வழங்கியுள்ளது. இதன் தொடர்ச்சியாக, இந்தியா தற்போது தானியங்கி ரோபோடிக் பயணங்களைத் தாண்டி, மனிதர்களை விண்வெளிக்கு அனுப்பும் 'ககன்யான்' திட்டத்தில் தீவிரமாக கவனம் செலுத்தி வருகிறது. விண்வெளி வீரர்களை பாதுகாப்பாக விண்ணிற்கு அனுப்பி மீட்டெடுப்பதற்கான சோதனைகள், பாராசூட் அமைப்புகளின் பகுப்பாய்வுகள் மற்றும் அதிநவீன கண்காணிப்பு அமைப்புகளின் உருவாக்கம் ஆகியவை முழுவீச்சில் நடைபெற்று வருகின்றன. ககன்யான் திட்டத்துடன் இந்தியாவின் பயணம் நின்றுவிடப்போவதில்லை. இதுவே நாட்டின் எதிர்கால விண்வெளித் திட்டங்களுக்கான வலுவான அடித்தளமாக அமையவுள்ளது. இதன் அடுத்தகட்டமாக, 2035-ஆம் ஆண்டிற்குள் 'பாரதிய அந்தரிக்ஷ் ஸ்டேஷன்' என்ற இந்தியாவின் சொந்த விண்வெளி மையத்தின் முதல் தொகுதியை புவியின் தாழ்வட்டப் பாதையில் அமைப்பதற்கான வடிவமைப்புப் பணிகள் ஏற்கனவே தொடங்கிவிட்டன. மேலும், 2040-ஆம் ஆண்டிற்குள் இந்திய விண்வெளி வீரரை நிலவுக்கு அனுப்பும் நீண்டகால இலக்கையும் இஸ்ரோ நிர்ணயித்துள்ளது. நிலவில் காலடி எடுத்து வைத்த வரலாற்றுத் தருணம், இந்தியாவை சர்வதேச விண்வெளிப் பந்தயத்தின் முன்னணி வரிசையில் கொண்டு வந்து நிறுத்தியுள்ளது. சந்திரயான்-3 ஏற்படுத்திய அந்த வரலாற்றுச் சிறப்புமிக்க தொடக்கம், தற்போது விண்வெளியில் இந்தியாவின் நிலையான மற்றும் வலிமையான இருப்பை உறுதி செய்யும் நோக்கில் புதிய உயரங்களை நோக்கிப் பயணித்துக் கொண்டிருக்கிறது.