ஆக.12-ல் ஒரே நேர்க்கோட்டில் அணிவகுக்கும் 6 கோள்கள்: வெறும் கண்ணால் பார்க்கலாம்; அபூர்வ வானியல் அதிசயம்

வானியல் ஆர்வலர்களுக்கு விருந்தளிக்கும் வகையில், ஆகஸ்ட் 12, 2026 காலையில் வியாழன், புதன், செவ்வாய், யுரேனஸ், சனி மற்றும் நெப்டியூன் ஆகிய 6 கோள்கள் விண்வெளியில் ஒரே நேரத்தில் ஒரே நேர்க்கோட்டில் அணிவகுக்கும் அபூர்வ நிகழ்வு நடைபெறவுள்ளது. ஆகஸ்ட் 12, 2026 காலை புதன் (Mercury), வியாழன் (Jupiter), செவ்வாய் (Mars), சனி (Saturn), யுரேனஸ் (Uranus) மற்றும் நெப்டியூன் (Neptune) ஆகிய கோள்கள் ஒரே நேர்க்கோட்டில் அணிவகுக்க உள்ளன. இதில் புதன், வியாழன், செவ்வாய் மற்றும் சனி ஆகிய கோள்களை வெறும் கண்ணால் காண முடியும். புதன் மற்றும் வியாழன் அதிக பிரகாசத்துடனும், செவ்வாய் சிவப்பு நிறத்திலும், சனி மஞ்சள் நிறத்திலும் தென்படும். யுரேனஸ் மற்றும் நெப்டியூனைப் பார்க்கத் தொலைநோக்கி (Telescope) அல்லது பைனாகுலர் தேவைப்படும். சூரிய உதயத்திற்கு முன்பு காலை வேளையில் கிழக்கில் உள்ள திறந்தவெளி வானத்தை உற்று நோக்க வேண்டும். அமாவாசை நெருங்குவதால் இரவு வானம் இருட்டாக இருப்பது கோள்களைக் கண்டறியச் சாதகமாக இருக்கும். நகர்ப்புற ஒளி மாசு இல்லாத இருளான இடத்தைத் தேர்ந்தெடுப்பது நல்லது. தெளிவான வானம் மற்றும் சாதகமான வானிலை நிலவும் பட்சத்தில், அடிவானத்திலிருந்து குறைந்தது 10 டிகிரி உயரத்தில் இந்த அரிய காட்சியைக் காணலாம். கோள்களின் இருப்பிடங்களைத் துல்லியமாக அடையாளம் காண 'Star Walk 2' போன்ற விண்வெளிச் செயலிகளைப் பயன்படுத்தலாம் என தெரிவிக்கப்பட்டுள்ளது.