121 சுங்கச் சாவடிகளில் டிஜிட்டல் பாஸ் முறை: யாருக்கெல்லாம் கிடைக்கும்? ஆன்லைனில் விண்ணப்பிப்பது எப்படி?

தீரஜ் மிஸ்ரா இந்திய தேசிய நெடுஞ்சாலை ஆணையம் (NHAI) தனது நெட்வொர்க்கில் உள்ள 121 சுங்கச் சாவடிகளுக்கு (Toll Plazas) டிஜிட்டல் "உள்ளூர் பாஸ்" (Digital Local Pass) வசதியை விரிவாக்கம் செய்துள்ளது. இதன் மூலம் சுங்கச்சாவடியைச் சுற்றியுள்ள உள்ளூர்வாசிகள் 'ராஜ்மார்க்கயாத்ரா' (Rajmargyatra) செயலியைப் பயன்படுத்தி மாதாந்திர பாஸைப் பெற்றுக்கொள்ள முடியும். இந்த பாஸ் மூலம் கட்டணம் செலுத்தி, ஒரு மாதத்திற்கு எத்தனை முறை வேண்டுமானாலும் குறிப்பிட்ட சுங்கச்சாவடியைக் கடக்கலாம். சுங்கச்சாவடிகளில் வாகனங்கள் நிற்காமல் செல்லும் 'மல்டி-லேன் ஃப்ரீ ஃபுளோ' (MLFF) முறையை ஊக்குவிக்க இந்த முயற்சி தொடங்கப்பட்டுள்ளது. முதன்முதலாக டெல்லியில் உள்ள முன்ட்கா-பக்கர்வாலா சுங்கச்சாவடியில் ஜூலை 2026-இல் இந்த வசதி அறிமுகப்படுத்தப்பட்டது. வரும் மாதங்களில் மேலும் பல சுங்கச்சாவடிகளுக்கு இது விரிவாக்கப்படும் என அதிகாரிகள் தெரிவித்துள்ளனர். யார் விண்ணப்பிக்கலாம்? சுங்கச்சாவடியில் இருந்து 20 கி.மீ சுற்றளவுக்குள் வசிக்கும் பகுதிவாசிகள் 'ராஜ்மார்க்கயாத்ரா' செயலி மூலம் டிஜிட்டல் முறையில் இந்த பாஸை வாங்க தகுதியுடையவர்கள் ஆவர். முன்பெல்லாம் ஆவணங்களைச் சமர்ப்பிக்க நேரடியாகச் செல்ல வேண்டியிருந்த நிலையில், இப்போது சில நிமிடங்களிலேயே டிஜிட்டல் முறையில் விண்ணப்பிக்கலாம். தேசிய நெடுஞ்சாலைக் கட்டண விதிகளின்படி, வணிகம் சாராத சொந்த வாகன வைத்திருக்கும் உள்ளூர்வாசிகளுக்குச் சுங்கச்சாவடியைக் கடக்க ரூ.350 மாதாந்திரக் கட்டணமாக நிர்ணயிக்கப்பட்டுள்ளது. இந்த செயலி 'டிஜிலாக்கர்' (DigiLocker) மற்றும் 'வாஹன்' (VAHAN) அமைப்புகளுடன் இணைக்கப்பட்டுள்ளதால், முகவரி, வாகன விவரங்கள் மற்றும் ஃபாஸ்டேக் (FASTag) ஆகியவற்றைத் தானாகவே சரிபார்த்துக் கொள்ளும். இந்த 121 சுங்கச்சாவடிகளின் எல்லைக்குள் வராதவர்கள், மாதாந்திர பாஸ் பெற வழக்கம்போல அருகிலுள்ள சுங்கச்சாவடிக்கு நேரில் செல்ல வேண்டும். விண்ணப்பிப்பது எப்படி? கூகுள் பிளே ஸ்டோர் அல்லது ஆப்பிள் ஆப் ஸ்டோரில் இருந்து 'ராஜ்மார்க்கயாத்ரா' (Rajmargyatra) செயலியைப் பதிவிறக்கம் செய்யவும். செயலியில் உள்நுழைந்து 'லோக்கல் பாஸ்' என்ற தேர்வைத் தேர்ந்தெடுக்கவும். உங்கள் வாகனம் மற்றும் FASTag விவரங்களை உள்ளிடவும். டிஜிலாக்கர் மற்றும் வாஹன் மூலம் 20 கி.மீ எல்லை மற்றும் ஆவணச் சரிபார்ப்பு (KYC) தானாகவே நிறைவடையும். சரிபார்ப்புக்குப் பிறகு, ஆன்லைன் மூலம் மாதாந்திரக் கட்டணத்தைச் செலுத்தினால் பாஸ் உடனடியாகச் செயல்பாட்டிற்கு வரும். ஏன் இந்த முறை கொண்டுவரப்பட்டது? 'மல்டி-லேன் ஃப்ரீ ஃபுளோ' (MLFF) எனப்படும் தடையில்லா சுங்கச்சாவடி முறை அமல்படுத்தப்பட்ட பிறகு, சுங்கக்கட்டணம் செலுத்தாததற்காக அனுப்பப்பட்ட இ-நோட்டீஸ்களில் (e-notices) 20 கி.மீ சுற்றளவுக்குள் வாழும் உள்ளூர்வாசிகளின் வாகனங்களே அதிகளவில் இருந்தன. பாஸ் இல்லாத பல உள்ளூர்வாசிகள், ஊழியர்களுடனான பழக்கத்தின் அடிப்படையில் சுங்கச்சாவடியைக் கடந்து வந்தனர். ஆனால், மனித தலையீடு இல்லாத கேமரா அடிப்படையிலான புதிய அமைப்பில் இது தானாகவே விதிமீறலாகப் பதிவாகி இ-நோட்டீஸ் அனுப்பப்பட்டது. இனி ஃபாஸ்டேக் உடன் இணைக்கப்பட்ட டிஜிட்டல் பாஸ் கட்டாயமாக்கப்பட்டுள்ளது. பாஸ் இல்லையெனில், அபராதமாக இரட்டைக் கட்டணம் செலுத்த வேண்டி வரும். புதிதாக சேர்க்கப்பட்ட சுங்கச்சாவடிகளின் பட்டியல் 'ராஜ்மார்க்கயாத்ரா' செயலியில் உள்ளது. இதில் ஹரியானாவின் பர்தானா, உத்தரப் பிரதேசத்தின் பாரத்குண்ட், ஆந்திராவின் பிரம்மனபள்ளி, தமிழ்நாட்டின் பூதக்குடி, மத்தியப் பிரதேசத்தின் சிகாலிகலா மற்றும் பீகாரின் தேவ்குலி ஆகியவை அடங்கும்.