விண்ணில் தோன்றும் அபூர்வ அதிசயம்: உலகைக் கவர்ந்த முழு சூரிய கிரகணம்

விண்வெளியில் தோன்றும் பிரமிப்பூட்டும் நிகழ்வுகளில் ஒன்றான முழு சூரிய கிரகணம் சமீபத்தில் நிகழ்ந்து, உலகெங்கிலும் உள்ள மக்களை வியப்பில் ஆழ்த்தியது. சூரியனுக்கும் பூமிக்கும் இடையே நிலவு சரியாக ஒரே நேர்கோட்டில் வரும்போது இந்த அரிய காட்சி ஏற்படுகிறது. இதன்போது சூரியனின் ஒளிக்கதிர்கள் முற்றிலும் மறைக்கப்பட்டு, பகல் நேரத்திலேயே இருள் சூழ்ந்து மாலைப் பொழுது போன்ற ஒரு மாயாஜாலச் சூழல் உருவாகிறது. குறிப்பாக, நிலவு சூரியனை மறைக்கும் அந்த வேளையில், அதன் வெளிப்புற வளிமண்டலப் பகுதியான 'கொரோனா' மட்டும் ஒரு பளபளக்கும் பிரகாசமான வெண்வட்டமாகத் தோன்றுவது இதன் தனிச்சிறப்பாகும். இந்தக் அரிய நிகழ்வு ரஷ்யாவில் உள்ளூர் நேரப்படி மாலை 5 மணிக்குத் தொடங்கியது. சந்திரன் மெல்ல மெல்ல சூரியனை மறைக்கத் தொடங்கியபோது, அதன் விளிம்பில் சுடர்ந்த மினுமினுக்கும் ஒளிவட்டம் காண்போரைக் பரவசப்படுத்தியது. அதனைத் தொடர்ந்து, ஐஸ்லாந்து நாட்டின் தலைநகரான ரேய்காவிக்கின் வானில் முழுச் சூரிய கிரகணம் தென்பட்டது. இதனைப் பார்வையிட சுமாராக 80 ஆயிரத்திற்கும் அதிகமான சுற்றுலாப் பயணிகளும் வானியல் பிரியர்களும் ஒரே இடத்தில் திரண்டு இந்தக் காட்சியை ரசித்தனர். அதேபோல், ஸ்பெயின் நாட்டில் சுமார் 27 ஆண்டுகளுக்குப் பிறகு இந்த முழு சூரிய கிரகணம் தென்பட்டதால், அங்குள்ள பொதுமக்கள் மிகுந்த உற்சாகத்துடன் இதைக் கண்டு களித்தனர். ஐரோப்பிய நாடுகளில் சூரியன் அஸ்தமிக்கும் நேரத்திலேயே இக்கிரகணமும் நிகழ்ந்ததால், சூரிய அஸ்தமனத்தோடு சேர்ந்த ஒரு அரிய மாலைக் காட்சியை மக்களால் பார்க்க முடிந்தது. மேலும், லண்டன் நாடாளுமன்ற வளாகப் பகுதி, பாரீஸின் புகழ்பெற்ற ஈபிள் கோபுரம் உள்ளிட்ட பல பகுதிகளில் பகுதி அளவிலான சூரிய கிரகணம் தோன்றியது. ஐரோப்பாவின் பெரும்பான்மையான இடங்கள், வடமேற்கு ஆப்பிரிக்கா, கனடா மற்றும் வட அமெரிக்காவின் சில பகுதிகளிலும் மக்கள் இந்த விண்வெளி அதிசயத்தைக் கண்டு மகிழ்ந்தனர். இருப்பினும், இந்திய நேரப்படி இந்தச் சூரிய கிரகணம் இரவு 11.16 மணிக்கு நிகழ்ந்ததால், இந்தியாவில் இருந்தவர்களால் இந்த விண்வெளி நிகழ்வை நேரடியாகக் காண இயலவில்லை.