முகத்தைப் பார்த்து உணர்ச்சிகளைப் புரிந்து கொள்ளும் நாய்கள்: அறிவியல் பூர்வமான உண்மை

நாய்களால் மனித முக பாவனைகளைக் கொண்டு அவர்களின் உணர்வுகளைப் புரிந்து கொள்ள முடியும் என்பதை சமீபத்திய அறிவியல் ஆய்வு ஒன்று உறுதிப்படுத்தியுள்ளது. பயம், சோகம் மற்றும் கோபம் போன்ற மனிதர்களின் பல்வேறு எதிர்மறை உணர்ச்சிகளைக் கூட நாய்களால் வேறுபடுத்தி அறிய முடிகிறது என்பதை இந்த ஆய்வு வெளிச்சத்திற்கு கொண்டு வந்துள்ளது. வியன்னா பல்கலைக்கழகத்தைச் சேர்ந்த ஆராய்ச்சியாளர்கள், மனிதர்களின் மகிழ்ச்சி, சோகம், பயம் மற்றும் கோபம் போன்ற உணர்ச்சிகளைப் பிரதிபலிக்கும் புகைப்படங்களை நாய்களுக்குக் காண்பித்து, அவற்றின் மூளைச் செயல்பாடுகளை எம்.ஆர்.ஐ ஸ்கேன் மூலம் ஆய்வு செய்தனர். இந்த ஆய்வின் முடிவுகள் 'ஐசயின்ஸ்' என்ற அறிவியல் இதழில் வெளியிடப்பட்டுள்ளன. இதில், நாய்களின் மூளை மனிதர்களின் ஒரே மாதிரியான எதிர்மறை உணர்ச்சிகளுக்கு இடையே உள்ள வித்தியாசத்தைக் கண்டறியும் திறன் கொண்டது என்பது முதன்முறையாக நிரூபிக்கப்பட்டுள்ளது. ஆராய்ச்சியின் போது, மகிழ்ச்சியான முகங்களைப் பார்க்கும்போது நாய்களின் மூளையில் பார்வை, சமூகம் மற்றும் வெகுமதி தொடர்பான பகுதிகள் தீவிரமாகச் செயல்படுவது கண்டறியப்பட்டது. மேலும், பயம் நிறைந்த முகங்களைப் பார்க்கும்போதும், சோகம் அல்லது கோபமான முகங்களைப் பார்க்கும்போதும் நாய்களின் மூளையில் வெவ்வேறு வகையான செயல்பாட்டு முறைகள் காணப்பட்டன. இருப்பினும், கோபத்திற்கும் சோகத்திற்கும் இடையிலான வித்தியாசத்தை நாய்களால் முழுமையாகப் புரிந்து கொள்ள முடியவில்லை. இவற்றைத் துல்லியமாக அறிய குரல் அல்லது உடல் மொழ போன்ற கூடுதல் சான்றுகள் நாய்களுக்குத் தேவைப்படலாம் என ஆராய்ச்சியாளர்கள் கருதுகின்றனர். மனிதர்களுடன் ஆயிரக்கணக்கான ஆண்டுகள் இணைந்து வாழ்ந்ததன் மூலமே நாய்களுக்கு இந்த விசேஷ உணர்திறன் வளர்க்கப்பட்டிருக்கலாம் என நம்பப்படுகிறது. மனிதர்களின் நடத்தையைப் புரிந்துகொள்வது நாய்களின் பாதுகாப்பு மற்றும் பிழைப்பிற்கு உதவியாக இருந்ததால், வீட்டு விலங்காக மாறிய பரிணாம வளர்ச்சியில் இந்த சமூகத் திறன் உருவெடுத்திருக்கலாம். இந்த ஆய்வில் குறைந்த எண்ணிக்கையிலான நாய்கள் மட்டுமே பயன்படுத்தப்பட்டிருந்தாலும், நாய்கள் மனிதர்களை வெறும் மகிழ்ச்சி அல்லது வருத்தத்துடன் மட்டும் பார்க்காமல், அவர்களின் நுட்பமான உணர்வுகளைக் கூடப் புரிந்துகொள்ளும் திறன் கொண்டவை என்பதை இது தெளிவாக உணர்த்துகிறது.