தமிழ்நாடு எல்லை வரை நீள்கிறது பெங்களூரு நம்ம மெட்ரோ: 9 புதிய நிலையங்களுடன் புதிய திட்டம்

கர்நாடக மாநிலத்தின் பெங்களூருவில் செயல்பட்டு வரும் 'நம்ம மெட்ரோ' அமைப்பின் மஞ்சள் வழித்தடத்தை, தமிழ்நாட்டின் எல்லைப் பகுதியான அத்திப்பள்ளி வரை நீட்டிப்பதற்குப் பெங்களூரு மெட்ரோ ரயில் கழகம் (பிஎம்ஆர்சிஎல்) விரிவான திட்டம் ஒன்றை வகுத்துள்ளதாக டெக்கான் ஹெரால்டு செய்தி வெளியிட்டுள்ளது. தென்னிந்தியாவின் முதல் மாநிலங்களுக்கு இடையேயான மெட்ரோ வழித்தடமாகப் பெங்களூருவில் இருந்து ஓசூர் வரை நேரடியாக இரயில் சேவையை அமைப்பதில் கர்நாடக அரசு ஆர்வம் காட்டாத நிலையை தொடர்ந்து, இந்த மாற்று நடவடிக்கை எடுக்கப்பட்டுள்ளது. இதன்படி, பொம்மசந்திராவில் இருந்து அத்திப்பள்ளி வரை 10.5 கிலோமீட்டர் தூரத்திற்கு உயர்மட்டப் பாதையாக இந்த வழித்தடம் அமைக்கப்பட்டு, அதில் 9 புதிய மெட்ரோ நிலையங்கள் கட்டப்பட உள்ளன. இந்த புதிய நீட்டிப்புப் பாதையானது தேசிய நெடுஞ்சாலை 44-ல் அமைந்துள்ள ஓசூர் சாலையின் வலது புறமாக அமைக்கப்பட உள்ளது. பொம்மசந்திராவில் உள்ள தற்போதைய கடைசி நிலையத்திலிருந்து சுமார் 1.5 கிலோமீட்டர் தொலைவில் அமைந்த நாராயணா இதயவியல் மருத்துவமனை அருகில் முதல் நிலையம் முன்மொழியப்பட்டுள்ளது. அதைத் தொடர்ந்து சந்காபுரா வட்டம், பழைய சந்காபுரா, திருமகொண்டனஹள்ளி, பாலகானஹள்ளி, அத்திப்பள்ளி தொழில்பேட்டை, யாதவனஹள்ளி, அத்திப்பள்ளி நகரம் மற்றும் அத்திப்பள்ளி முனையம் ஆகிய இடங்களில் நிலையங்கள் அமைக்கப்பட திட்டமிடப்பட்டுள்ளது. வேகமாக வளர்ந்து வரும் இப்பகுதிகளின் மக்களுக்குப் பயன்படும் வகையில், நடைமேம்பாலங்கள் மற்றும் சுரங்கப்பாதைகள் மூலம் இந்த நிலையங்கள் இணைக்கப்படும். இதற்கான சாத்தியக்கூறு அறிக்கை கர்நாடக அரசிடம் சமர்ப்பிக்கப்பட்டு, விரிவான திட்ட அறிக்கை (DPR) தயாரிக்க ஒப்புதல் பெறப்பட்டுள்ளது. முன்னதாக, ஓசூர் முதல் பொம்மசந்திரா வரை 23 கிலோமீட்டர் தொலைவிற்கு 12 நிலையங்களுடன் மெட்ரோ பாதை அமைக்கத் தமிழ்நாடு அரசு ஆர்வம் காட்டியிருந்தது. சென்னை மெட்ரோ ரயில் கழகம் தயாரித்த அறிக்கையின்படி, இதில் 12 கிலோமீட்டர் கர்நாடகாவிலும் 11 கிலோமீட்டர் தமிழ்நாட்டிலும் அமையும் வகையில் திட்டமிடப்பட்டிருந்தது. இருப்பினும், இரு மாநில மெட்ரோ அமைப்புகளையும் ஒன்றாக இணைப்பதில் பல்வேறு தொழில்நுட்பச் சிக்கல்கள் இருப்பதாகக் கர்நாடக தரப்பில் சுட்டிக்காட்டப்பட்டுள்ளது. குறிப்பாக, பெங்களூரு மெட்ரோ 750 வோல்ட் டிசி மூன்றாம் இரயில் (3rd rail) மின் அமைப்பைப் பயன்படுத்தும் வேளையில், தமிழ்நாடு 25 கேவி ஏசி மேல்நிலை மின்சார அமைப்பைப் முன்மொழிந்துள்ளது. மேலும் பெங்களூருவில் 6 பெட்டிகள் கொண்ட இரயில்களும், தமிழ்நாட்டில் 3 பெட்டிகள் கொண்ட இரயில்களும் திட்டமிடப்பட்டுள்ளன. நிலம் கையகப்படுத்துதல் மற்றும் கட்டண வருவாயைப் பகிர்ந்துகொள்வதில் உள்ள தெளிவின்மையும் இதற்கு முக்கியக் காரணங்களாகும். எனவே, இரு மாநிலங்களும் தத்தமது எல்லை வரை மெட்ரோ பாதையை அமைத்து, அத்திப்பள்ளியில் அமையும் இரு நிலையங்களையும் 90 மீட்டர் நீளமுள்ள நடைமேம்பாலம் மூலம் இணைப்பதே சிறந்த தீர்வாக இருக்கும் என்று பிஎம்ஆர்சிஎல் கருதுகிறது.