பரந்தூர் விமான நிலையம் ரத்து எதிரொலி: மீனம்பாக்கத்தை நவீனப்படுத்த தமிழக அரசு தீவிர ஆலோசனை

சென்னையை அடுத்த பரந்தூரில் புதிய சர்வதேச விமான நிலையம் அமைக்கும் திட்டம் கைவிடப்பட்டுள்ள நிலையில், தற்போதுள்ள மீனம்பாக்கம் விமான நிலையத்தை விரிவாக்கம் செய்வது குறித்துத் தமிழக அரசு தீவிரமாக ஆலோசனை மேற்கொண்டு பரிசீலித்து வருகிறது. முன்னதாக, பரந்தூரில் புதிய விமான நிலையம் அமைப்பதற்கான அனைத்து ஏற்பாடுகளும் தீவிரமாக நடைபெற்று வந்தன. எனினும், அந்தத் திட்டத்தை ரத்து செய்வதாகச் சட்டமன்றத்தில் முதல்வர் விஜய் அதிரடியாக அறிவித்தார். இந்த அறிவிப்பு பரவலான விவாதத்தை ஏற்படுத்தியுள்ளது. விமான நிலையத் திட்டத்திற்கு எதிராகத் தொடர்ந்து போராடி வந்த பரந்தூர் பகுதி விவசாயிகளும், சுற்றுச்சூழல் செயற்பாட்டாளர்களும் முதல்வரின் இந்த முடிவை வரவேற்றுள்ளனர். அதேநேரத்தில், இத்திட்டம் ரத்து செய்யப்படுவதால் தமிழ்நாட்டுக்குப் பொருளாதார இழப்பு ஏற்படுவதுடன், தொழில் வளர்ச்சியும், வேலைவாய்ப்பும் பாதிக்கப்படும் என்று பொருளாதார வல்லுநர்கள் எச்சரித்து வருகின்றனர். பரந்தூர் திட்டம் ரத்தான சூழலில், தற்போதுள்ள மீனம்பாக்கம் சென்னை விமான நிலையத்தின் கட்டமைப்பு வசதிகளை மேம்படுத்தப் பல்வேறு புதிய திட்டங்கள் பரிசீலிக்கப்பட்டு வருகின்றன. பொழிச்சலூர் மற்றும் தாரப்பாக்கம் வழியாக புதிய அணுகுசாலை (Access Road) அமைக்க சென்னை ஒருங்கிணைந்த பெருநகரப் போக்குவரத்து அதிகார அமைப்பு (CUMTA) பரிந்துரை செய்துள்ளது. விமான நிலையத்தைத் தாம்பரம் - மதுரவாயல் புறவழிச்சாலையுடன் நேரடியாக இணைக்கத் திட்டமிடப்பட்டு வருகிறது. அப்பகுதியில் உள்ள குடியிருப்புகளுக்குப் பெரிய அளவில் பாதிப்பு ஏற்படாத வகையிலும், அடையாறு ஆற்றுக்குப் பாதிப்பு இல்லாத வகையிலும் மேம்பால சாலை அமைக்கத் திட்டமிடப்பட்டுள்ளது. இந்த விரிவாக்கப் பணிகள் மூலம் சென்னை விமான நிலையத்தின் ஆண்டு பயணிகள் கையாளும் திறன் 55 மில்லியனாக (5.5 கோடி) உயரும் எனக் கணிக்கப்பட்டுள்ளது.