சீர்காழி இளைஞருக்கு ஆயுள் தண்டனை: ஆபாச வீடியோ எடுத்து பெண்களை மிரட்டிய வழக்கில் நீதிமன்றம் பரபரப்பு தீர்ப்பு!

<p style="text-align: justify;"><strong>காரைக்கால்: </strong>காரைக்காலில் கணவரை இழந்த 45 வயது பெண் மற்றும் 16 வயது சிறுமியைப் பாலியல் வன்கொடுமை செய்து, ஆபாச வீடியோ எடுத்து மிரட்டிய மயிலாடுதுறை மாவட்டத்தைச் சேர்ந்த இளைஞருக்கு ஆயுள் தண்டனை விதித்து காரைக்கால் நீதிமன்றம் அதிரடி தீர்ப்பளித்துள்ளது. இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.</p> <h3 style="text-align: justify;">வெல்டிங் பட்டறை ஊழியர்</h3> <p style="text-align: justify;">மயிலாடுதுறை மாவட்டம் சீர்காழியைச் சேர்ந்தவர் 26 வயதான அசோக்குமார். இவர் கடந்த 2019-ஆம் ஆண்டு காரைக்கால் நகரப் பகுதியில் உள்ள ஒரு வெல்டிங் பட்டறையில் வேலைக்குச் சேர்ந்துள்ளார். தொடர்ந்து கொரோனா ஊரடங்கு காலத்தில், வெல்டிங் பட்டறை உரிமையாளரின் வீட்டிலேயே தங்கி வேலை பார்த்து வந்துள்ளார். இதனிடையே, சில ஆண்டுகளுக்கு முன்பு வெல்டிங் பட்டறை உரிமையாளர் எதிர்பாராதவிதமாக மின்சாரம் தாக்கி உயிரிழந்தார். அவரது மறைவுக்குப் பின்னரும், அசோக்குமார் அந்த வீட்டிலேயே தங்கி வெல்டிங் கடையை முழுமையாகக் கவனித்து வந்துள்ளார்.</p> <h3 style="text-align: justify;">பெண்ணுக்கு மிரட்டலும் பாலியல் வன்கொடுமையும்</h3> <p style="text-align: justify;">கடந்த 2024-ஆம் ஆண்டு, அசோக்குமார் மதுபோதையில் அந்த வெல்டிங் பட்டறை உரிமையாளரின் மனைவியை (45) அடித்துத் துன்புறுத்தி பாலியல் வன்கொடுமை செய்துள்ளார். மேலும், அதனைத் தனது செல்போனில் வீடியோவாகப் பதிவும் செய்துள்ளார். அந்த ஆபாச வீடியோவைக் காட்டி அவ்வப்போது மிரட்டி, அந்தப் பெண்ணைப் பலமுறை தொடர்ந்து பாலியல் வன்கொடுமை செய்து வந்துள்ளார். பாதிக்கப்பட்ட பெண் பயத்தின் காரணமாக இது குறித்து வெளியே சொல்ல முடியாமல் தவித்து வந்துள்ளார்.</p> <h3 style="text-align: justify;">மகனுக்கு வந்த வீடியோவும் போலீஸ் விசாரணையும்</h3> <p style="text-align: justify;">இந்நிலையில், அசோக்குமார் மதுபோதையில் அந்தப் பெண்ணின் மகனுக்கே அந்த ஆபாச வீடியோவை அனுப்பி, பணம் கேட்டு மிரட்டியுள்ளார். இதனால் அதிர்ச்சியடைந்த அந்தப் பெண்ணின் மகன், கடந்த 2025-ஆம் ஆண்டு காரைக்கால் நகரக் காவல் நிலையத்தில் இது குறித்துப் புகார் அளித்தார். புகாரின் பேரில் வழக்குப் பதிவு செய்த போலீசார், அசோக்குமாரைக் கைது செய்து தீவிர விசாரணை நடத்தினர். விசாரணையின் ஒரு பகுதியாக அவரது செல்போனைக் கைப்பற்றி ஆய்வு செய்தபோது, பல பெண்களை அவர் ரகசியமாக ஆபாச வீடியோ எடுத்து மிரட்டி வந்தது தெரியவந்தது.</p> <h3 style="text-align: justify;">போக்சோ வழக்கு பதிவு</h3> <p style="text-align: justify;">போலீசாரின் விரிவான ஆய்வில், காரைக்கால் நகரப் பகுதியைச் சேர்ந்த 16 வயது சிறுமி ஒருவரையும் அசோக்குமார் மிரட்டி ஆபாசமாக வீடியோ பதிவு செய்து, பாலியல் வன்கொடுமை செய்ததும் கண்டுபிடிக்கப்பட்டது. இதனையடுத்து, அசோக்குமார் மீது பாலியல் வன்கொடுமை வழக்குகளுடன் சேர்த்து, சிறுமியைப் பாதுகாக்கும் போக்சோ சட்டத்தின் கீழும் வழக்குப் பதிவு செய்யப்பட்டது. இந்த வழக்கு விசாரணை காரைக்கால் நீதிமன்றத்தில் நடைபெற்று வந்தது.</p> <h3 style="text-align: justify;">நீதிமன்றத்தின் சிறப்புமிக்க தீர்ப்பு</h3> <p style="text-align: justify;">அனைத்துத் தரப்பு விசாரணைகளும் சாட்சியங்களும் நிறைவடைந்த நிலையில், நீதியரசர் மோகன் இந்த வழக்கில் பரபரப்பான தீர்ப்பை வழங்கினார். குற்றவாளி அசோக்குமார் மீதான குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டதால், 45 வயது பெண்ணை மிரட்டி பாலியல் வன்கொடுமை செய்ததற்கு 10 ஆண்டுகள் சிறை தண்டனையும், 16 வயது சிறுமியைப் பாலியல் வன்கொடுமை செய்ததற்கு ஆயுள் தண்டனையும் வழங்கப்பட்டது. மேலும், பெண்களை ஆபாசமாக வீடியோ எடுத்து மிரட்டிய குற்றத்திற்காக 3 ஆண்டுகள் சிறை தண்டனையும், 4 லட்சம் ரூபாய் அபராதமும் விதித்து நீதிமன்றம் உத்தரவிட்டது. பல பெண்களை ஆபாச வீடியோ எடுத்து மிரட்டிய குற்றவாளிக்கு ஆயுள் தண்டனை விதிக்கப்பட்ட இச்சம்பவம் காரைக்கால் பகுதியில் பெரும் பரபரப்பை ஏற்படுத்தியுள்ளது.</p>