பயணிகள் வரவேற்பு இருந்தும் புறக்கணிப்பா? புனலூர்–செங்கோட்டை பாதையில் கூடுதல் ரயில்களுக்கு தயக்கம் ஏன்?

கேரள தலைநகர் திருவனந்தபுரத்தில் இருந்து தமிழ்நாட்டின் தென்காசி, குற்றாலம், விருதுநகர் உள்ளிட்ட பகுதிகளுக்குச் செல்லும் பயணிகளுக்கு கொல்லம்–புனலூர்–செங்கோட்டை ரயில் பாதை முக்கியமானதாக உள்ளது. ஆனால், பயணிகளிடம் போதிய வரவேற்பு இருந்தபோதிலும், இந்த வழித்தடம் இன்னும் முழுமையாகப் பயன்படுத்தப்படாமல் இருப்பதாக பயணிகள் தரப்பில் தெரிவிக்கப்பட்டுள்ளது. தற்போது இந்தப் பாதையில் சில பயணிகள் ரயில்களுடன், தூத்துக்குடி–பாலக்காடு பாலருவி விரைவு ரயில், குருவாயூர்–மதுரை விரைவு ரயில் உள்ளிட்ட சில வழக்கமான விரைவு ரயில்கள் மட்டுமே இயக்கப்படுகின்றன. ஓணம் சிறப்பு ரயில்களுக்கு வரவேற்பு ஓணம் பண்டிகையை முன்னிட்டு இந்த வழித்தடத்தில் இயக்கப்பட்ட வாராந்திர சிறப்பு ரயில்களுக்கு பயணிகளிடம் நல்ல வரவேற்பு கிடைத்துள்ளது. இதையடுத்து, சிறப்பு ரயில்களை வழக்கமான சேவைகளாக மாற்ற வேண்டும் என்று கொல்லம்–செங்கோட்டை ரயில் பயணிகள் சங்கம், ரயில்வே நிர்வாகத்திடம் கோரிக்கை விடுத்துள்ளது. குறிப்பாக, திருவனந்தபுரத்தில் இருந்து கொல்லம், புனலூர், செங்கோட்டை வழியாக சென்னைக்கு வழக்கமான ரயில் சேவையை இயக்க வேண்டும் என்பது பயணிகள் சங்கத்தின் முக்கிய கோரிக்கையாக உள்ளது. இதற்கு முன்பும் திருவனந்தபுரம் வடக்கு ரயில் நிலையத்தில் இருந்து கொல்லம்–செங்கோட்டை வழியாக சென்னை நோக்கி சில சிறப்பு ரயில்கள் இயக்கப்பட்டன. ஆனால், அந்தச் சேவைகள் வழக்கமான ரயில்களாக மாற்றப்படவில்லை. இதுகுறித்து கொல்லம்–செங்கோட்டை ரயில் பயணிகள் சங்கத்தைச் சேர்ந்த தீபு ரவி தி டைம்ஸ் ஆஃப் இண்டியா நாளிதழிடம் கூறுகையில், எர்ணாகுளத்தில் இருந்து புதிய ரயிலை இயக்குவதைவிட, திருவனந்தபுரத்தில் இருந்து கொல்லம் மற்றும் செங்கோட்டை வழியாக ரயிலை இயக்குவது மிகவும் எளிதானது. முன்னதாக திருவனந்தபுரம் வடக்கு முதல் தாம்பரம் வரை இயக்கப்பட்ட ரயில், தாம்பரத்தில் ஏற்பட்ட நெரிசலைக் காரணம் காட்டி நிறுத்தப்பட்டது” என்று கூறினார். எழும்பூர் ரயில் நிலைய மறுசீரமைப்புப் பணிகள் காரணமாக தாம்பரத்தில் நெரிசல் ஏற்பட்டிருந்ததாக ரயில்வே தரப்பில் தெரிவிக்கப்பட்டது. தற்போது இந்த வழித்தடத்தில் சிறப்பு ரயில்கள் இயக்கப்பட்டு வருவதால், நிறுத்தப்பட்ட சேவையை மீண்டும் தொடங்க வேண்டும் என பயணிகள் சங்கம் எதிர்பார்க்கிறது. வார இறுதிகளில் சாலையில் கடும் போக்குவரத்து திருவனந்தபுரத்தில் இருந்து குற்றாலம், தென்காசி உள்ளிட்ட பகுதிகளுக்குச் செல்லும் சுற்றுலாப் பயணிகளுக்கு நேரடி ரயில் சேவை பெரும் உதவியாக இருக்கும். தற்போது தென்மலை வழியாகச் செல்லும் சாலையில் வார இறுதி நாட்கள் மற்றும் பண்டிகை காலங்களில் வாகனப் போக்குவரத்து அதிகமாக உள்ளது. இதனால், சாலைப் போக்குவரத்துக்கு மாற்றாக ரயில் சேவையை பயன்படுத்த விரும்பும் பயணிகளுக்கு கூடுதல் ரயில்கள் வசதியாக அமையும். குற்றாலம் அருவிக்கு செல்லும் சுற்றுலாப் பயணிகள் மட்டுமின்றி, வேளாண்மை சார்ந்த சுற்றுலாத் தலமாகவும் வளர்ந்து வரும் தென்காசிக்கும் இந்த ரயில் சேவை பயனுள்ளதாக இருக்கும். மின்மயமாக்கப்பட்ட பாதை கொல்லம்–செங்கோட்டை ரயில் பாதை மின்மயமாக்கப்பட்டுள்ளதால், திருவனந்தபுரத்தில் இருந்து கொல்லம், புனலூர், செங்கோட்டை வழியாக தென்காசி மற்றும் சென்னை நோக்கி ரயில்களை இயக்குவதற்கான வாய்ப்புகள் மேலும் அதிகரித்துள்ளன. ஓணம் காலத்தில் திருவனந்தபுரம் மத்திய ரயில் நிலையத்தில் ஏற்பட்ட நெரிசலைக் கருத்தில் கொண்டு, அண்டை மாநிலங்களில் இருந்து கொல்லம் நோக்கி சிறப்பு ரயில்களும் இயக்கப்பட்டன. தற்போது திருவனந்தபுரத்தில் இருந்து இந்த வழித்தடம் வழியாக தாம்பரம் மற்றும் வேளாங்கண்ணிக்கும் சிறப்பு ரயில்கள் இயக்கப்படுகின்றன. இதற்கு கிடைக்கும் வரவேற்பு, இந்தப் பாதையில் பயணிகளின் தேவை இருப்பதை காட்டுவதாக பயணிகள் சங்கத்தினர் கூறுகின்றனர். சென்னைக்கு மாற்றுப் பாதையாக அமையுமா? செங்கோட்டை, தென்காசி, குற்றாலம், விருதுநகர் மற்றும் சுற்றுவட்டாரப் பகுதிகளுக்குச் செல்லும் பயணிகளுக்கு கூடுதல் ரயில்கள் பெரும் பயனளிக்கும். அதே நேரத்தில், திருவனந்தபுரம்–சென்னை இடையே ரயில்களை இயக்குவதற்கான மாற்றுப் பாதையாகவும் கொல்லம்–செங்கோட்டை வழித்தடத்தைப் பயன்படுத்த முடியும். ஓணம் சிறப்பு ரயில்களுக்கு கிடைத்துள்ள வரவேற்பும், பாதை ஏற்கெனவே மின்மயமாக்கப்பட்டிருப்பதும் சாதகமான சூழலை உருவாக்கியுள்ளது. எனவே, சிறப்பு ரயில்களை வழக்கமான சேவைகளாக மாற்றுவதுடன், திருவனந்தபுரம்–கொல்லம்–புனலூர்–செங்கோட்டை வழியாக தென்காசி மற்றும் சென்னைக்கு கூடுதல் ரயில்களை இயக்க வேண்டும் என்பதே பயணிகளின் எதிர்பார்ப்பாக உள்ளது.