சினிமாவை தாண்டி அடுத்த அவதாரம்... தொழில் முனைவோர்களை தேடி களமிறங்கிய நடிகர் மாதவன்

நடிகர், திரைக்கதை எழுத்தாளர், திரைப்படத் தயாரிப்பாளர் மற்றும் தொழில்முனைவோர் என பன்முகத் திறமைகளை வெளிப்படுத்தி வரும் ஆர். மாதவன், தற்போது தொலைக்காட்சி தொகுப்பாளர் மற்றும் வழிகாட்டி என்ற புதிய பொறுப்பையும் ஏற்றுள்ளார். தொழில்முனைவோர் மற்றும் ஸ்டார்ட்அப் நிறுவனங்களை மையமாகக் கொண்டு உருவாகியுள்ள ‘கேம் சேஞ்சர்ஸ் மிடில் ஈஸ்ட்’ என்ற புதிய முதலீட்டுத் தொடரை அவர் தொகுத்து வழங்க உள்ளார். இந்த நிகழ்ச்சி, அடுத்த தலைமுறை தொழில்முனைவோர்களை அடையாளம் கண்டு, அவர்களின் புதுமையான யோசனைகளுக்கு முதலீடு, வழிகாட்டுதல் மற்றும் தொழில் வளர்ச்சிக்கான வாய்ப்புகளை ஏற்படுத்துவதை முக்கிய நோக்கமாகக் கொண்டுள்ளது. தொழில்முனைவோருக்கான புதிய தேடல் ‘கேம் சேஞ்சர்ஸ்’ நிகழ்ச்சி குறித்து சமூக வலைதளத்தில் பகிர்ந்த வீடியோவில் மாதவன், இது வெறும் முதலீடு அல்லது தொழில்முனைவு சார்ந்த நிகழ்ச்சி மட்டுமல்ல என்று தெரிவித்துள்ளார். தங்களை மட்டுமின்றி தங்களைச் சுற்றியுள்ள சமூகத்தையும் மாற்ற வேண்டும் என்ற எண்ணம் கொண்ட துணிச்சலான மனிதர்களைக் கண்டறிவதே இந்த நிகழ்ச்சியின் முக்கிய நோக்கம் என அவர் குறிப்பிட்டுள்ளார். ஒரு தொழில்முனைவோர் தனது யோசனையில் ஆழமான நம்பிக்கை வைத்திருப்பது அவசியம் என்றாலும், அதைவிட முக்கியமாக வளர்ச்சிக்கு ஏற்ப தன்னை மாற்றிக் கொள்ளும் திறனும், புதிய சவால்களுக்கு ஏற்ப தன்னை தகவமைத்துக் கொள்ளும் மனப்பான்மையும் இருக்க வேண்டும் என மாதவன் தெரிவித்துள்ளார். 2,000-க்கும் மேற்பட்ட விண்ணப்பங்கள் ஐக்கிய அரபு அமீரகத்தை மையமாகக் கொண்டு தொடங்கப்பட்டுள்ள இந்த ஸ்டார்ட்அப் முயற்சிக்கு தொழில்முனைவோர் மத்தியில் நல்ல வரவேற்பு கிடைத்துள்ளதாக தெரிவிக்கப்பட்டுள்ளது. இதுவரை சுமார் 2,000 நிறுவனர்கள் தங்களது ஸ்டார்ட்அப் யோசனைகள் மற்றும் நிறுவனங்களுடன் விண்ணப்பித்துள்ளதாக கூறப்படுகிறது. இதிலிருந்து அதிக திறனும் வளர்ச்சி வாய்ப்பும் கொண்ட 70 ஸ்டார்ட்அப் நிறுவனங்கள் தேர்வு செய்யப்பட உள்ளன. தேர்வு செய்யப்படும் நிறுவனங்கள், முதலீட்டாளர்கள், தொழில்துறை நிபுணர்கள் மற்றும் முன்னணி தொழில்முனைவோர்கள் அடங்கிய குழுவின் முன்பு தங்களது தொழில் திட்டங்களை முன்வைக்கும் வாய்ப்பைப் பெற உள்ளன. தொலைக்காட்சியைத் தாண்டும் முயற்சி ‘கேம் சேஞ்சர்ஸ் மிடில் ஈஸ்ட்’ ஒரு வழக்கமான தொலைக்காட்சி நிகழ்ச்சியாக மட்டும் இல்லாமல், தொழில்முனைவோருக்கான விரிவான தளமாக உருவாக்கப்படுவதாக தெரிவிக்கப்பட்டுள்ளது. தொலைக்காட்சி மற்றும் ஸ்ட்ரீமிங் தளங்களில் ஒளிபரப்பாகும் இந்த நிகழ்ச்சியின் மூலம், தேர்வு செய்யப்படும் ஸ்டார்ட்அப் நிறுவனங்களுக்கு முதலீடு மற்றும் வழிகாட்டுதல் மட்டுமின்றி, தங்களது தொழிலை விரிவுபடுத்துவதற்கான வாய்ப்புகளும் கிடைக்கும் என கூறப்படுகிறது. முதலீட்டாளர்கள், தொழில்துறை தலைவர்கள், தொழில்முனைவோர் மற்றும் ஸ்டார்ட்அப் சூழலமைப்பில் முக்கிய பங்கு வகிப்பவர்கள் என பல்வேறு துறைகளைச் சேர்ந்தவர்கள் இதில் இணைந்து செயல்பட உள்ளனர். ‘UAE-ல் வெற்றி பெற்றால் எங்கும் வெற்றி பெறும்’ ஐக்கிய அரபு அமீரகத்தை தொழில்முனைவோருக்கான சிறந்த களமாக மாதவன் குறிப்பிட்டுள்ளார். புதிய யோசனைகளை பரிசோதிக்கவும், புதுமையான தொழில் முயற்சிகளை உருவாக்கவும், உலகளாவிய சந்தையை நோக்கி நகரவும் UAE சிறந்த சூழலை வழங்குவதாக அவர் தெரிவித்துள்ளார். “ஐக்கிய அரபு அமீரகத்தில் ஒரு யோசனை வெற்றியடைந்தால், அது உலகின் மற்ற பகுதிகளிலும் வெற்றியடையக்கூடிய வாய்ப்பு உள்ளது” என்ற கருத்தையும் அவர் தெரிவித்துள்ளார். இதன் காரணமாகவே, மத்திய கிழக்கு நாடுகளில் மட்டும் இல்லாமல் உலகின் பல்வேறு பகுதிகளில் இருந்து திறமையான தொழில்முனைவோர்களை இந்த நிகழ்ச்சி தேட உள்ளது. முதலீட்டாளர்களுக்கு மாதவன் விடுத்துள்ள செய்தி புதிய தலைமுறை தொழில்முனைவோர்களை கண்டறிவதுடன், முதலீட்டாளர்களுக்கும் இந்த நிகழ்ச்சி புதிய பார்வையை வழங்கும் என மாதவன் நம்பிக்கை தெரிவித்துள்ளார். இளம் வயதில் தங்களிடம் இருந்த கனவு, ஆர்வம் மற்றும் அர்ப்பணிப்பு உணர்வை முதலீட்டாளர்கள் மீண்டும் நினைவுகூரும் வகையில் இந்த நிகழ்ச்சி அமையும் என அவர் கூறியுள்ளார். தங்களது தொழில் பயணத்தின் அடுத்த கட்டத்தில் புதிய கனவுகளைக் காணவும், புதிய முயற்சிகளில் ஈடுபடவும் இந்த நிகழ்ச்சி அவர்களுக்கு ஊக்கமளிக்கும் என்றும் மாதவன் தெரிவித்துள்ளார். துபாய்க்கு குடிபெயர்ந்த மாதவன் கொரோனா பெருந்தொற்று காலத்தில் தனது குடும்பத்துடன் சென்னையிலிருந்து துபாய்க்கு குடிபெயர்ந்த ஆர். மாதவனுக்கு ஐக்கிய அரபு அமீரகத்துடன் ஏற்கனவே நெருங்கிய தொடர்பு உள்ளது. அவரது மகன் வேதாந்த், தொழில்முறை நீச்சல் வீரராக வேண்டும் என்ற இலக்குடன் பயிற்சி மேற்கொண்டு வந்த நிலையில், கொரோனா காலகட்டத்தில் இந்தியாவில் நீச்சல் குளங்கள் மற்றும் பயிற்சி வசதிகள் பெருமளவில் பாதிக்கப்பட்டன. அந்த நேரத்தில் வேதாந்தின் பயிற்சி பாதிக்கப்படக்கூடாது என்பதற்காக, அவரது குடும்பம் துபாய்க்கு செல்ல முடிவு செய்தது. துபாயில் தேசிய அளவிலான நீச்சல் வீரர்களுக்கான பயிற்சி வசதிகள் கிடைத்ததால், வேதாந்த் தனது பயிற்சியை தொடர்ந்து மேற்கொள்ள முடிந்தது. இதன் பின்னர் மாதவனின் குடும்பம் ஐக்கிய அரபு அமீரகத்தில் தொடர்ந்து வசித்து வருகிறது. அதே நேரத்தில், திரைப்படப் பணிகள் உள்ளிட்ட தனது தொழில் காரணங்களுக்காக மாதவன் இந்தியாவுக்கும் வெளிநாடுகளுக்கும் தொடர்ந்து பயணம் செய்து வருகிறார். தொழில்முனைவோர் உலகில் மாதவனின் புதிய அத்தியாயம் திரைப்படத்துறையில் பல்வேறு பொறுப்புகளை ஏற்றுள்ள மாதவன், தற்போது ஸ்டார்ட்அப் மற்றும் முதலீட்டு உலகிலும் தனது கவனத்தை விரிவுபடுத்தியுள்ளார். ‘கேம் சேஞ்சர்ஸ் மிடில் ஈஸ்ட்’ நிகழ்ச்சியின் மூலம் உலகின் பல்வேறு பகுதிகளில் இருந்து புதிய சிந்தனைகளுடன் வரும் தொழில்முனைவோர்களை கண்டறிந்து அவர்களுக்கு சரியான தளத்தை உருவாக்குவதே அவரது புதிய முயற்சியாக பார்க்கப்படுகிறது. குறிப்பாக புதுமையான யோசனைகள், சமூக மாற்றத்தை ஏற்படுத்தும் தொழில்கள் மற்றும் எதிர்காலத்தை மாற்றக்கூடிய ஸ்டார்ட்அப் நிறுவனங்களுக்கு முக்கியத்துவம் அளிக்கப்பட உள்ளது. மாதவனின் இந்த புதிய முயற்சி, அவரது திரைப்பயணத்திலிருந்து முற்றிலும் மாறுபட்ட துறையில் அவரை வழிகாட்டி மற்றும் தொகுப்பாளராக முன்னிறுத்துகிறது. உலகளாவிய தொழில்முனைவோர்களை ஒரே தளத்தில் கொண்டு வந்து, அவர்களின் கனவுகளுக்கு முதலீட்டாளர்களின் ஆதரவை பெற்றுத் தரும் முயற்சியாக ‘கேம் சேஞ்சர்ஸ் மிடில் ஈஸ்ட்’ எதிர்பார்ப்பை ஏற்படுத்தியுள்ளது.