கே.என்.நேரு, செங்கோட்டையன் நில விவரங்கள்: தமிழ்நாடு பேரவையில் எம்.ஆர்.கே. பன்னீர்செல்வம் கருத்து

தமிழ்நாடு சட்டப்பேரவையில் பட்ஜெட் மீதான பொது விவாதம் நடைபெற்றது. இந்த விவாதத்தின் போது, வேளாண் பட்ஜெட் குறித்து பேசிய எம்.ஆர்.கே. பன்னீர்செல்வம், விவசாயக் குடும்பத்தில் பிறக்க வேண்டும் என்று முதலமைச்சர் விஜய் முன்பு தெரிவித்திருந்ததைச் சுட்டிக்காட்டினார். அந்த எதிர்பார்ப்புடன் வேளாண் பட்ஜெட்டில் பல்வேறு மாற்றங்கள் இடம்பெறும் என்று நினைத்ததாகவும், ஆனால் தங்களுக்கு ஏமாற்றமே மிஞ்சியுள்ளதாகவும் அவர் விமர்சித்தார். தொடர்ந்து பேசிய எம்.ஆர்.கே. பன்னீர்செல்வம், முன்னாள் அமைச்சர் கே.என். நேரு ஒரு பெரிய விவசாயி என்றும், அவருக்கு ஆயிரக்கணக்கான ஏக்கர் நிலம் உள்ளது என்றும் தெரிவித்தார். மேலும், அவர் ஆயிரக்கணக்கான மாடுகளை வளர்த்து வருவதோடு, வாழை, தென்னை, நெல் எனப் பெரிய அளவில் விவசாயம் செய்து வருகிறார் என்றும் குறிப்பிட்டார். அதேபோல் வேலு என்பவர் டிராக்டர் ஓட்டுவார், வயலில் அண்டம் வெட்டுவார் என்றும் அவர் தெரிவித்தார். இதற்குப் பதிலளித்துப் பேசிய செங்கோட்டையன், நிலம் வைத்துக்கொள்வதில் குறிப்பிட்ட சட்டக் கட்டுப்பாடுகள் இருப்பதாகச் சுட்டிக்காட்டி, இந்த விவகாரத்தில் கே.என். நேருவை மாட்டிவிடாதீர்கள் என்ற பொருளில் பேசினார். இதனைத் தொடர்ந்து மீண்டும் பேசிய எம்.ஆர்.கே. பன்னீர்செல்வம், “நேரு பெரிய விவசாயி... ஆயிரம் மாடுகள் வைத்திருக்கிறார், ஆயிரம் ஏக்கரில் விவசாயம் செய்கிறார். செங்கோட்டையனுக்கு இப்போது எவ்வளவு நிலம் இருக்கிறது என்று கணக்கு பார்த்தால் தெரியும்” எனக் குறிப்பிட்டார். பட்ஜெட் விவாதத்தின் தீவிரமான சூழலுக்கு மத்தியில், முன்னாள் மற்றும் இந்நாள் அமைச்சர்களான கே.என். நேரு, செங்கோட்டையன் ஆகியோரின் நில விவரங்கள் குறித்து எம்.ஆர்.கே. பன்னீர்செல்வம் நகைச்சுவையாகப் பேசிய இந்த வார்த்தைப் பரிமாற்றம் சட்டப்பேரவை உறுப்பினர்களிடையே கலகலப்பையும் சிரிப்பலையையும் ஏற்படுத்தியது. இருப்பினும், இந்த நகைச்சுவையான பேச்சு அவையில் சிரிப்பலையை உண்டாக்கியிருந்தாலும் ஒரு சர்ச்சைக்கு வித்திட்டுள்ளது. முன்னாள், இந்நாள் அமைச்சர்களின் நில விவரங்கள் குறித்துப் பேசியது அவர்களுக்கே சிக்கலை உண்டாக்கும் என்றும், இதுகுறித்து விரைவிலேயே அவர்கள் நடவடிக்கையை சந்திக்க நேரிடலாம் என்றும் உள்விவரம் அறிந்தவர்கள் தெரிவிக்கின்றனர்.