கொள்ளிடம் அருகே அதிர்ச்சி! வீட்டிற்கு வெளியே காத்திருக்கும் ஆபத்து - மேனாயிருப்பில் உச்சக்கட்ட பீதி!

<p style="text-align: justify;"><strong>மயிலாடுதுறை: </strong>மயிலாடுதுறை மாவட்டம், கொள்ளிடம் ஒன்றியத்திற்குட்பட்ட அளக்குடி ஊராட்சி மேனாயிருப்பு கிராமத்தில், குடியிருப்புப் பகுதிக்கு மிக அருகில் அமைந்துள்ள குளத்தில் சுமார் 6 அடி நீளமுள்ள பெரிய முதலை ஒன்று நடமாடி வருவதால், அப்பகுதி கிராம மக்கள் கடுமையான அச்சத்திலும் பீதியிலும் உறைந்துபோயுள்ளனர்.</p> <p style="text-align: justify;">கொள்ளிடம் ஆற்றுப் பகுதியை ஒட்டியுள்ள கிராமங்களில் மழைக்காலங்களிலும், வெள்ளப் பெருக்கு ஏற்படும் காலங்களிலும் ஆற்றில் இருந்து முதலைகள் வெளியேறி அருகில் உள்ள பாசன வாய்க்கால்கள் மற்றும் நீர்நிலைகளுக்குள் புகுவது வழக்கம். அந்த வகையில், மேனாயிருப்பு கிராமத்தில் அமைந்துள்ள பொதுமக்கள் பயன்படுத்தும் முக்கியக் குளத்திற்குள் கடந்த சில தினங்களாக 6 அடி நீளமுள்ள முதலை ஒன்று உலா வந்து கொண்டிருக்கிறது.</p> <h3 style="text-align: justify;">கால்நடைகளுக்கு ஆபத்து</h3> <p style="text-align: justify;">இந்தக் குளத்தைச் சுற்றி நூற்றுக்கணக்கான குடும்பங்கள் வசித்து வருகின்றன. மேலும், இக்கிராமத்தைச் சேர்ந்த விவசாயிகள் மற்றும் பொதுமக்கள் தங்களது அன்றாட வாழ்வாதாரமாக விளங்கும் பசு மாடுகள், வெள்ளாடுகள் மற்றும் எருமைகள் உள்ளிட்ட கால்நடைகளை மேய்ச்சலுக்காக இந்தக் குளக்கரையை ஒட்டியுள்ள பகுதிகளிலேயே தினமும் விட்டு வருகின்றனர்.</p> <p style="text-align: justify;">குளத்து நீரில் முதலை நீந்தித் திரிவதையும், கரையில் வந்து வெயில் காய்வதையும் நேரில் கண்ட பொதுமக்கள் அதிர்ச்சியடைந்துள்ளனர். இதனால், நீரருந்தச் செல்லும் கால்நடைகளை முதலை வேட்டையாடி இழுத்துச் சென்றுவிடுமோ என்ற அச்சம் மேய்ப்பர்களிடையே ஏற்பட்டுள்ளது. ஏற்கனவே சில இடங்களில் கால்நடைகளை முதலைகள் தாக்கிய சம்பவங்கள் நினைவுகூரப்படுவதால், விவசாயிகள் தங்கள் கால்நடைகளை வெளியே அனுப்பவே பயந்து நடுங்குகின்றனர்.</p> <h3 style="text-align: justify;">இரவு நேரத்தில் முடங்கும் கிராமம்</h3> <p style="text-align: justify;">குளத்திற்கும் வீடுகளுக்கும் இடையே சில மீட்டர்கள் மட்டுமே இடைவெளி இருப்பதால், சிறுவர்களும், பெண்களும், முதியவர்களும் அன்றாடம் நடமாடும் பாதைகளுக்கு அருகிலேயே இந்த ஆபத்து அச்சுறுத்திக் கொண்டிருக்கிறது. குறிப்பாக, மாலை நேரங்களில் விளையாடச் செல்லும் சிறுவர்களின் பாதுகாப்புக் கேள்விக்குறியாகியுள்ளது.</p> <p style="text-align: justify;">முதலை எந்த நேரத்திலும் குளத்தை விட்டு வெளியேறி குடியிருப்புப் பகுதிக்குள் புகுந்துவிடக்கூடும் என்ற பயத்தின் காரணமாக, மாலை 6 மணிக்கு மேலேயே கிராம மக்கள் அனைவரும் தங்களது வீடுகளுக்குள் முடங்கும் சூழல் உருவாகியுள்ளது. இரவு நேரங்களில் வீட்டை விட்டு வெளியே வரவும், அவசரத் தேவைகளுக்காகப் பாதைகளில் நடமாடவும் பொதுமக்கள் கடும் அச்சமடைந்து வருகின்றனர். அத்தியாவசியப் பணிகளுக்குச் செல்வோர் கைகளில் தடியுடனும், வெளிச்சத்துடனுமே செல்லும் நிலை நீடிக்கிறது.</p> <h3 style="text-align: justify;">பொதுமக்கள் வைக்கும் அவசரக் கோரிக்கை</h3> <p style="text-align: justify;">இதுகுறித்து மேனாயிருப்பு கிராம மக்கள் தெரிவிக்கையில், "நாங்கள் தினமும் பயன்படுத்தும் குளத்திலேயே இவ்வளவு பெரிய முதலை இருப்பது எங்களுக்கு பெரும் அச்சுறுத்தலாக உள்ளது. சிறு குழந்தைகள் அறியாமல் குளத்தின் அருகில் சென்றுவிட்டால் என்ன செய்வது என்றே தெரியவில்லை. இரவில் நிம்மதியாக தூங்கக்கூட முடியாமல் பயத்துடனேயே பொழுதைக் கழித்து வருகிறோம். அசம்பாவிதம் ஏதும் நடப்பதற்குள் அதிகாரிகள் தலையிட வேண்டும்" என வேதனையுடன் தெரிவித்தனர்.</p> <p style="text-align: justify;">எனவே, பொதுமக்களின் உயிர்ப் பாதுகாப்பையும், அவர்களின் வாழ்வாதாரமான கால்நடைகளின் பாதுகாப்பையும் கருத்தில் கொண்டு, மயிலாடுதுறை மாவட்ட நிர்வாகமும், வனத்துறையும் உடனடியாக தலையிட வேண்டும். குளத்தில் சுற்றித் திரியும் 6 அடி நீள முதலையைப் பிடிப்பதற்கு பிரத்யேகக் கூண்டுகள் மற்றும் வலைகளை அமைத்து, அதை உடனடியாகப் பாதுகாப்பாக மீட்டு, மனித நடமாட்டம் இல்லாத அடர்ந்த வனப்பகுதியிலோ அல்லது பாதுகாக்கப்பட்ட முதலைப்பண்ணையிலோ கொண்டுபோய் விட வேண்டும் என மேனாயிருப்பு மற்றும் அளக்குடி ஊராட்சி பொதுமக்கள் தீவிரக் கோரிக்கை விடுத்துள்ளனர். வனத்துறை உடனடியாக நடவடிக்கை எடுக்கத் தவறினால், கிராம மக்களைத் திரட்டிப் போராட்டத்தில் ஈடுபடப் போவதாகவும் அப்பகுதி மக்கள் எச்சரிக்கை விடுத்துள்ளனர்.</p>