நீட் வினாத்தாள் கசிவு: பாட நிபுணர்கள் தேர்வில் எந்தவித வரைமுறையும் இல்லை - இயற்பியல் நிபுணர் அதிர்ச்சித் தகவல்

எழுதியவர்: மகேந்தர் சிங் மன்ரால் மத்திய நுழைவுத் தேர்வு அமைப்புகளின் தேர்வுப் பணிகளுடன் தொடர்புடைய மகாராஷ்டிராவைச் சேர்ந்த இயற்பியல் நிபுணர் ஒருவர், வினாத்தாள் தயாரிப்பு, மொழிபெயர்ப்பு மற்றும் மதிப்பீடு ஆகியவற்றில் ஈடுபட்டுள்ள பாட நிபுணர்களைத் தேர்ந்தெடுப்பது மற்றும் நிர்வகிப்பதற்கான தேசியத் தேர்வு முகமையின் (என்.டி.ஏ) நடைமுறை குறித்து சி.பி.ஐ-க்கு அளித்துள்ள வாக்குமூலத்தில் கேள்விகளை எழுப்பியுள்ளார். ஆங்கிலத்தில் படிக்க: நீட் வினாத்தாள் கசிவு வழக்கில் 360 சாட்சிகளைப் பட்டியலிட்டு, 13 குற்றஞ்சாட்டப்பட்ட நபர்களின் பெயர்களைக் குறிப்பிட்டு ஜூலை 28-ம் தேதி டெல்லி விரைவு நீதிமன்றத்தில் சி.பி.ஐ தாக்கல் செய்த குற்றப்பத்திரிகையில் இவரது வாக்குமூலம் மேற்கோள் காட்டப்பட்டுள்ளது. பாட நிபுணர்களைத் தேர்ந்தெடுப்பதற்கு முறையான தகுதி வரம்புகளோ அல்லது எழுதப்பட்ட விதிகளோ எதுவுமில்லை என்றும், இந்தச் செயல்முறை பெரும்பாலும் அமைப்பில் ஏற்கனவே தொடர்புடைய நபர்களின் பரிந்துரைகளையே நம்பியிருந்தது என்றும் அந்த நிபுணர் சி.பி.ஐ-யிடம் தெரிவித்ததாகத் தெரிகிறது. “வினாக்கள் தயாரித்தல், சரிபார்த்தல் (moderation) மற்றும் மொழிபெயர்ப்பு போன்ற பணிகளுக்கு இயற்பியல், வேதியியல் மற்றும் உயிரியல் போன்ற பாடங்களில் இருந்து ஆசிரியர்களைப் பரிந்துரைக்கும் உரிமை ஏற்கனவே இருக்கும் நிபுணர்களுக்கு இருந்தது” என்று அவர் கூறியதாகத் தெரியவருகிறது. இயற்பியல் செட்-ஐ.எஃப் (Set-IF) வினாத்தாளை மராத்தியில் இருந்து ஆங்கிலத்திற்கு மொழிபெயர்க்கும் பணியைப் புனேவைச் சேர்ந்த கைதான ஆசிரியை மனிஷா சஞ்சய் ஹவால்தார் மார்ச் 14-ம் தேதி மேற்கொண்டார் என்றும், பின்னர் மார்ச் 21-ம் தேதி அந்த பிழைத்திருத்தப் பணியை இந்தச் சாட்சி செய்தார் என்றும் வாக்குமூலத்தில் பதிவு செய்யப்பட்டுள்ளது. நீட் வினாத்தாளைக் கசியவிட்டதாகக் கூறி மே 22-ம் தேதி ஹவால்தாரை சி.பி.ஐ கைது செய்தது. தனது வாக்குமூலத்தில் அந்தச் சாட்சி, சி.பி.எஸ்.இ அகில இந்திய மருத்துவ/பல் மருத்துவ நுழைவுத் தேர்வை (ஏ.ஐ.பி.எம்.டி) நடத்திய காலம் உட்பட 2013 முதல் மத்திய அரசு அமைப்புகளால் நடத்தப்படும் மருத்துவ மற்றும் பொறியியல் நுழைவுத் தேர்வுப் பணிகளில் தனக்குத் தொடர்பு இருப்பதாகவும், குறுகிய காலம் கூட்டு நுழைவுத் தேர்விலும் (ஜே.இ.இ) பணியாற்றியிருப்பதாகக் குறிப்பிட்டுள்ளார். மேலும் 2000 ஆம் ஆண்டு முதல் மகாராஷ்டிரா வாரியம் மற்றும் மாநில நுழைவுத் தேர்வில் தொடர்புடையவர் என்றும் தெரிவித்துள்ளார். வினாத்தாள் தயாரிக்கப்பட்ட பிறகு, இயற்பியல் பாடப் பகுதிகள் பல மொழிகளில் மொழிபெயர்க்கப்பட்டதாகவும், ஒவ்வொரு மொழிக்கும் சுமார் இரண்டு முதல் நான்கு ஆசிரியர்கள் ஈடுபடுத்தப்பட்டதாகவும் அந்த நிபுணர் தனது சாட்சியத்தில் கூறியுள்ளார். "வினாக்கள் தயாரித்தல் மற்றும் சரிபார்த்தல் பணிகளுக்கும் ஆசிரியர்கள் ஈடுபடுத்தப்பட்டனர்; இத்தகைய பணிகள் ஆண்டுமுழுவதும் தொடர்ந்தன. எனக்குத் தெரிந்தவரை, இந்தப் பணிகளை நிர்வகிக்க முறையான ஆவண நடைமுறைகள் எதுவும் இல்லை, மேலும் இதுபோன்ற பணிகளுக்கு எழுதப்பட்ட பணி நியமனக் கடிதங்களோ அல்லது முறையான ஆவணங்களோ வழங்கப்படுவதில்லை” என்று அவர் தனது வாக்குமூலத்தில் குற்றம் சாட்டியுள்ளார். 'வினாத்தாள் தயாரிப்பு முறையில் உள்ள குறைபாடுகள்' வினாத்தாள் தயாரிப்பு அமைப்பில் உள்ள குறைபாடுகளையும் அந்தச் சாட்சி சுட்டிக்காட்டினார். அவரது பார்வையில், இந்தச் செயல்முறையில் தெளிவான நடைமுறைகளும் முறையான நிர்வாகமும் இல்லை. வினாத்தாள் தயாரிப்பில் பாட நிபுணர்கள், வினா உருவாக்குபவர்கள், சரிபார்ப்பாளர்கள் மற்றும் மொழிபெயர்ப்பாளர்கள் ஆகியோர் ஈடுபடுவதால், போதுமான கண்காணிப்பு அமைப்புகள் இல்லையென்றால் இதில் ஈடுபட்டுள்ள எந்தவொரு நபரும் தகவல் கசிவுக்கான மூலமாக மாறக்கூடும் என்று அவர் கூறினார். "இந்தப் பணிகளில் ஈடுபட்டுள்ள தனிநபர்கள் மீது போதிய மேற்பார்வையும் கட்டுப்பாடும் இல்லை என்று நான் நம்புகிறேன்" என்று வாக்குமூலத்தில் குறிப்பிடப்பட்டுள்ளது. கடந்த 6 முதல் 7 ஆண்டுகளாக என்.டி.ஏ உடன் தொடர்புடைய வேதியியல் நிபுணர் ஒருவரைப் பற்றியும் அந்த வாக்குமூலத்தில் குறிப்பிடப்பட்டுள்ளது. "அந்த வேதியியல் நிபுணர், தற்போதுள்ள நிபுணர்களுக்கும் எதிர்காலப் பணிகளுக்காக இணைய உள்ள நிபுணர்களுக்கும் பயிற்சி அளிக்கும் பட்டறைகள் தொடர்பாக என்.டி.ஏ உடன் ஒருங்கிணைந்து செயல்பட்டார். சைனிக் பள்ளி 6-ம் வகுப்பு நுழைவுத் தேர்விற்கு அமைக்கப்பட்ட வினாக்கள் தொடர்பாக அவருக்கும் என்.டி.ஏ அதிகாரி ஒருவருக்கும் இடையே சில கருத்து வேறுபாடுகள் ஏற்பட்ட பிறகு, ஒருங்கிணைப்புப் பணியை அந்த (வேதியியல்) நிபுணர் பொறுப்பேற்றுக்கொண்டார்" என்று ஒரு வட்டாரம் தெரிவித்தது. புனேவில் உள்ள கார்வாரே கல்லூரி மற்றும் எஸ்.பி கல்லூரியைச் சேர்ந்த தனது நண்பர்கள் அல்லது அறிமுகமானவர்களை மட்டுமே வேதியியல் நிபுணரின் பரிந்துரையின் பேரில் புதிய நிபுணர்களாகப் பட்டியலில் சேர்த்ததாகச் சாட்சி குற்றம் சாட்டியுள்ளார். என்.டி.ஏ அமைப்பில் நிபுணர்களைத் தேர்ந்தெடுப்பதற்கு முறையான கொள்கை எதுவும் இல்லை என்றும், அறிமுகமானவர்கள் மட்டுமே பரிந்துரை மூலம் தேர்ந்தெடுக்கப்பட்டனர் என்றும் அவர் புரிந்துகொண்டதாக அந்த வட்டாரம் கூறியது. காயத்தால் பாதிக்கப்பட்டுத் தொடர்ந்து பணியாற்ற முடியாமல் போன டாக்டர் பட் என்ற மற்றொரு வேதியியல் நிபுணருக்குப் பதிலாக, சி.பி.ஐ-யால் ஏற்கனவே கைது செய்யப்பட்ட மந்தாரே என்பவரால் தான் அந்த வேதியியல் நிபுணர் என்.டி.ஏ அமைப்புக்கு அறிமுகப்படுத்தப்பட்டதாகச் சாட்சி கூறினார். “என்.டி.ஏ உடனான தொடர்பைத் தொடர்ந்து, இயற்பியல் மற்றும் உயிரியல் உட்பட பல்வேறு துறைகளைச் சேர்ந்த பல ஆசிரியர்களை அவர் அறிமுகப்படுத்தினார். அவரது பரிந்துரைகள் மூலம் 40 முதல் 50 ஆசிரியர்கள் இந்த அமைப்பிற்குள் கொண்டு வரப்பட்டதாக அவர் மதிப்பிட்டுள்ளார்” என்று அந்த வட்டாரம் தெரிவித்தது. 'குல்கர்னியின் நடத்தை குறித்து தெரியாது' கடந்த 4 முதல் 5 ஆண்டுகளாக என்.டி.ஏ உடன் தொடர்புடைய வேதியியல் நிபுணராக விவரிக்கப்பட்ட பி.வி. குல்கர்னி பற்றியும் அந்த வாக்குமூலத்தில் குறிப்பிடப்பட்டுள்ளது; மூத்த என்.டி.ஏ நிபுணர் ஒருவர் கோவிட் காரணமாகத் தனது பணிகளைச் செய்ய முடியாதபோது குல்கர்னி இணைத்துக் கொள்ளப்பட்டார். மே 15-ம் தேதி புனேவில் கைது செய்யப்பட்ட ஓய்வுபெற்ற விரிவுரையாளரான குல்கர்னி, நீட் 2026 கசிந்த வினாத்தாள்களை விநியோகிக்க சதித் திட்டத்தில் ஈடுபட்டிருந்தார்.