80-ஆவது சுதந்திர தின விழா விருதுகள் - முதலமைச்சர் விஜய் வழங்கினார்..!

சென்னையில் நடைபெற்ற சுதந்திர தின விழாவில் பல்வேறு விருதுகளை வழங்கி முதலமைச்சர் விஜய் கவுரவித்தார். தகைசால் தமிழர் விருதை காங்கிரஸ் மூத்த தலைவர் எம்.கிருஷ்ணசாமிக்கு முதலமைச்சர் வழங்கினார். தமிழ்நாட்டுக்காகவும் தமிழ் மொழிக்காகவும் தொண்டாற்றியமைக்கு அவர் கவுரவிக்கப்பட்டார். அவரைத் தொடர்ந்து, டென்சிங் ஹிலாரி எவரெஸ்ட் மாரத்தானை இருமுறை வென்ற ஒரே தமிழக பெண்ணான கோவையைச் சேர்ந்த நௌஷீனுக்கு கல்பனா சாவ்லா விருதை முதலமைச்சர் வழங்கினார். நீலகிரி ஆட்சியர் லட்சுமி பவ்யா, மெட்ரோ ரயில் நிறுவனத்தைச் சேர்ந்த சதீஷ் பிரபு குழுவினர் மற்றும் கோவை அரசு மருத்துவக் கல்லூரி மருத்துவமனை முதல்வர் கீதாஞ்சலிக்கு முதலமைச்சரின் நல் ஆளுமை விருதுகள் வழங்கப்பட்டன. சிறந்த மருத்துவருக்கான விருதை சென்னை அரசு புனர்வாழ்வு மருத்துவமனையின் திருநாவுக்கரசும், சிறந்த நிறுவனத்திற்கான விருதை திண்டிவனம் சிருஷ்டி பவுண்டேஷனும், சிறந்த சமூக சேவகருக்கான திருவண்ணாமலை மணிமாறனும் முதலமைச்சரிடம் பெற்றார். சென்னை மாநகராட்சியில் சிறந்த மண்டலத்திற்கான முதல் பரிசு 6ஆவது மண்டலமும், 2ஆம் பரிசை 2ஆவது மண்டலமும் பெற்றது. சிறந்த மாநகராட்சிக்கான முதல் பரிசை கோவையும், 2ஆம் பரிசை தஞ்சாவூரும் பெற்றது. அதேபோல், சிறந்த நகராட்சிக்கான முதல் பரிசை போடிநாயக்கனூரும், 2ஆம் பரிசை ஆரணியும், 3ஆம் பரிசை விழுப்புரமும் வென்றது.