காஞ்சிபுரத்தில் விடுமுறை நாளில் கிரிக்கெட் விளையாடிய 11 வயது சிறுவன் பந்து தாக்கி உயிரிழப்பு!

<p style="text-align: justify;">காஞ்சிபுரம் மாவட்ட ஆட்சியர் அலுவலக வளாகத்தில் அமைந்துள்ள விளையாட்டு மைதானத்தில் கிரிக்கெட் விளையாடிக் கொண்டிருந்த 11 வயது சிறுவன், தலையில் பந்து பலமாக தாக்கியதில் சிகிச்சை பலனின்றி உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது. காஞ்சிபுரம் மாநகராட்சி NGO நகர் பகுதியைச் சேர்ந்த சுகிர்தா லட்சுமி என்பவரின் மகன் சாய் மோதிஷ் (11). இவர் மாவட்ட ஆட்சியர் அலுவலகம் அருகே இயங்கி வரும் அரசு உயர்நிலைப் பள்ளியில் 6ஆம் வகுப்பு பயின்று வந்தார்.</p> <h3 style="text-align: justify;">எதிர்பாராமல் நடந்த விபத்து</h3> <p style="text-align: justify;">கடந்த 26ஆம் தேதி அரசு விடுமுறை தினம் என்பதால், சாய் மோதிஷ் தன் நண்பர்களுடன் இணைந்து ஆட்சியர் அலுவலக வளாக மைதானத்தில் கிரிக்கெட் விளையாடச் சென்றுள்ளார். மைதானத்தில் பல அணிகளாகப் பிரிந்து இளைஞர்களும் சிறுவர்களும் விளையாடிக் கொண்டிருந்த சூழலில், எதிர்பாராதவிதமாக எங்கிருந்தோ வேகமாக வந்த கிரிக்கெட் பந்து ஒன்று சாய் மோதிஷின் தலையில் பலமாகத் தாக்கியுள்ளது. பந்து தாக்கிய வேகத்தில் நிலைதடுமாறிய சிறுவன், சம்பவ இடத்திலேயே மயங்கி விழுந்துள்ளார்.</p> <h3 style="text-align: justify;">சிகிச்சை பலனின்றி பிரிந்த உயிர்</h3> <p style="text-align: justify;">மயக்கமடைந்த சிறுவனை உடனடியாக மீட்டு, 108 ஆம்புலன்ஸ் மூலம் காஞ்சிபுரம் அரசு மருத்துவமனைக்குக் கொண்டு சென்று முதலுதவி அளித்தனர். பின்னர் மேல் சிகிச்சைக்காக செங்கல்பட்டு அரசு மருத்துவக் கல்லூரி மருத்துவமனையில் தீவிர சிகிச்சைப் பிரிவில் அனுமதிக்கப்பட்டார். அங்கு இரண்டு நாட்களாக மருத்துவர்கள் தீவிர சிகிச்சை அளித்து வந்த நிலையில், நேற்று மதியம் சுமார் 12.30 மணியளவில் சிறுவன் சாய் மோதிஷ் சிகிச்சை பலனின்றி பரிதாபமாக உயிரிழந்தார்.</p> <h3 style="text-align: justify;">போலீசார் தீவிர விசாரணை</h3> <p style="text-align: justify;">தற்போது சிறுவனின் உடல் பிரேதப் பரிசோதனைக்காக செங்கல்பட்டு அரசு மருத்துவமனை சவக்கிடங்கில் வைக்கப்பட்டுள்ளது. இச்சம்பவம் தொடர்பாக உயிரிழந்த சிறுவனின் தாயார் சுகிர்தா லட்சுமி அளித்த புகாரின் அடிப்படையில், காஞ்சி தாலுகா காவல் நிலைய போலீசார் வழக்குப் பதிவு செய்து, பந்து வீசியது யார் என்பது குறித்தும் மைதானத்தில் நடந்த சம்பவங்கள் குறித்தும் தீவிர விசாரணை நடத்தி வருகின்றனர். விடுமுறை நாளில் விளையாடச் சென்ற சிறுவன் உயிரிழந்த சம்பவம் அவரது குடும்பத்தினரையும் அப்பகுதி மக்களையும் பேரதிர்ச்சியில் ஆழ்த்தியுள்ளது.</p>