மத்திய கிழக்கில் அதிகரிக்கும் போர் பதற்றம்: ஹார்முஸ் ஜலசந்தியைத் திறக்க ஈரான் நிபந்தனை

மத்திய கிழக்குப் பகுதியில் போர் பதற்றம் மீண்டும் தீவிரமடைந்துள்ள நிலையில், அமெரிக்காவின் கப்பல் ஒன்றைத் தாக்கியதாக ஈரான் அறிவித்துள்ளது. இந்தச் சூழலில், ஹார்முஸ் ஜலசந்தியை மீண்டும் திறப்பது குறித்து ஈரான் புதிய நிபந்தனை ஒன்றை விதித்துள்ளது.

தங்கள் நாட்டின் மீது அமெரிக்கா மேற்கொண்டு வரும் தாக்குதல் நடவடிக்கைகள் மற்றும் அச்சுறுத்தல்களை அந்த நாடு முழுமையாகக் கைவிட்டால் மட்டுமே ஹார்முஸ் ஜலசந்தி பொதுப் போக்குவரத்திற்காகத் திறக்கப்படும் என்று டெஹ்ரான் தரப்பில் தெரிவிக்கப்பட்டுள்ளது. இந்த நிபந்தனைகள் நிறைவேற்றப்பட்டால் மட்டுமே ஜலசந்தியைத் திறந்து விடுவது குறித்த பரிசீலனை இருக்கும் என்று ஈரான் உறுதிபடத் தெரிவித்துள்ளது.