சரிவடையும் ‘டயமண்ட் ஹார்பர் மாடல்’: அபிஷேக் பானர்ஜியின் சுகாதார முகாம்கள் மீது பாயும் தொடர் வழக்குகள்

மேற்கு வங்கத்தின் திரிணாமுல் காங்கிரஸ் (TMC) எம்பியான அபிஷேக் பானர்ஜி தனது தொகுதியில் மேற்கொண்டு வந்த 'செபாஷ்ரய்' (Sebaashray) எனும் மக்கள் நல்வாழ்வுத் திட்டத்தின் சுகாதார முகாம்கள், தற்போது முறைகேடுகள், மருத்துவ அலட்சியம் முதல் அனுமதி பெறாத மருத்துவக் கருவிகளின் பயன்பாடு வரை பல முதல் தகவல் அறிக்கைகளை (FIR) எதிர்கொண்டு வருகின்றன. கொல்கத்தாவிலிருந்து சுமார் 50 கி.மீ தொலைவில், தெற்கு 24 பர்கானாஸ் மாவட்டத்தின் ஃபால்டா பிடிஓ (BDO) அலுவலகத்திற்கு எதிரே, மழைநீரில் பகுதி மூழ்கிய மைதானத்தில் பலகை, மூங்கில் மற்றும் எஃகு கம்பிகளால் செய்யப்பட்ட தற்காலிகக் கட்டிடம் ஒன்று நிற்கிறது. அதன் மேலே 'மெடிக்கல் காலேஜ் கல்கத்தா' என்ற பெயர்ப்பலகை வைக்கப்பட்டுள்ளது. ஆனால் யதார்த்தத்தில், இது மம்தா பானர்ஜி ஆட்சியில் திரிணாமுல் காங்கிரஸின் முன்னணி தலைவராக இருந்த அபிஷேக் பானர்ஜி, தனது 'செபாஷ்ரய்' திட்டத்தின்கீழ் அமைத்த முகாம்களில் ஒன்றாகும். தற்போது அந்த கட்டிடத்தின் தற்காலிக அறைகள், மருந்தகங்கள் மற்றும் ஆலோசனைக் கூடங்கள் ஆகியவை மருந்துச் சீட்டுகள், கையேடுகள் என தரை எங்கும் சிதறிக் கிடக்க காலியாகக் காட்சிளிக்கின்றன. இந்த வெறிச்சோடிய நிலை மேற்கு வங்கத்தில் ஏற்பட்ட ஆட்சி மாற்றத்தால் மட்டும் நிகழவில்லை. ஒரு காலத்தில் அபிஷேக் பானர்ஜியின் 'டயமண்ட் ஹார்பர் மாடல்' எனப் புகழப்பட்ட இந்த திட்டம், இப்போது முறைகேடுகள், மருத்துவ அலட்சியம் மற்றும் அனுமதி பெறாத சாதனங்களைப் பயன்படுத்தியது வரை பல காவல் துறை புகார்களை எதிர்கொண்டுள்ளது. இந்த செய்தியை ஆங்கிலத்தில் படிக்க இங்கே க்ளிக் செய்யவும். அபிஷேக் பானர்ஜியால் ஜனவரி 2, 2025 அன்று தொடங்கப்பட்ட இந்த செபாஷ்ரய் திட்டத்தின் முதற்கட்டமாக, வீடுகளுக்கே சென்று உதவும் நூற்றுக்கணக்கான முகாம்கள் அமைக்கப்பட்டன. டிசம்பர் 1, 2025 முதல், டயமண்ட் ஹார்பரின் பல சட்டமன்றப் தொகுதிகளுக்கு விரிவாக்கப்பட்டு, இலவச மருத்துவர் ஆலோசனைகள், பரிசோதனைகள், மருந்துகள் மற்றும் பெரிய அறுவை சிகிச்சைகள் வழங்கப்பட்டன. டிஎம்சி வலைத்தளத்தில் இத்திட்டம், முதியோர்களுக்குப் பார்வை மீட்டது முதல் குழந்தைகளுக்கு உயிா்காக்கும் அறுவை சிகிச்சைகள் வரை லட்சக்கணக்கான மக்களின் வாழ்க்கையை மாற்றியமைத்த ஒரு முன்னோடி சமூகத் திட்டம் என்று விவரிக்கப்பட்டுள்ளது. செபாஷ்ரய் திட்டத்திற்கு எதிராக முதல் வழக்கை பாஜக தலைவரும் வழக்கறிஞருமான அபிஜித் தாஸ் ஜூலை 4 அன்று பதிவு செய்தார். இதில் மருத்துவர்கள் உட்பட 15 பேர் மீது குற்றம் சாட்டப்பட்டதுடன், அபிஷேக் பானர்ஜி முதல் குற்றவாளியாகச் சேர்க்கப்பட்டார். ஏமாற்றுதல், ஆவணப் போலி, கலப்படம், விஷம் மூலம் தீங்கு விளைவித்தல் மற்றும் கொலை முயற்சி போன்ற பிரிவுகளின் கீழ் வழக்குப்பதிவு செய்யப்பட்டுள்ளது. இரண்டாவது புகார் ஜூலை 9 அன்று மாலதி பிஸ்வாஸ் என்பவரால் அளிக்கப்பட்டது. அதில், இந்த முகாமில் முழங்கால் வலிக்குச் சிகிச்சை பெற்ற பிறகு தனது கால் துண்டிக்கப்பட்டதாக அவர் குற்றம் சாட்டியுள்ளார். ஜூலை 15 அன்று பிஷ்ணுபூர் காவல் நிலையத்தில் சித்தரஞ்சன் மன்னா மற்றும் ரூமா மன்னா தம்பதியினர் தங்களது பிஞ்சு மகள் கிருத்தியின் கை துண்டிக்கப்பட்டதற்கு செபாஷ்ரய்தான் காரணம் எனப் புகாரளித்தனர். ஜனவரி 24, 2025 அன்று தங்கள் மகளுக்கு வலது கையில் கடுமையான வலி இருந்ததால் பைலான் முகாமிற்கு அழைத்துச் சென்றதாகவும், அங்கு அபிஷேக் பானர்ஜியை நேரில் சந்தித்தபோது குழந்தையின் மருத்துவம் மற்றும் கல்விச் செலவை ஏற்றுக்கொள்வதாக உறுதியளித்ததாகவும் கூறினர். 'நிஷப்த பிப்லப்' (அமைதிப் புரட்சி) என்ற செபாஷ்ரய்யின் சாதனைப் புத்தகத்திலும் கிருத்தியின் படம் இடம்பெற்றிருந்தது. ஆனால், குழந்தையின் நிலைமை மோசமடைந்ததால், பெங்களூருவில் உள்ள மருத்துவமனைக்குக் கொண்டு சென்றபோது, கை துண்டிக்கப்பட வேண்டும் என மருத்துவர்கள் கூறிவிட்டதாக பெற்றோர் தெரிவித்தனர். நான்காவது எஃப்.ஐ.ஆர் 'ஈக்கோ க்ரீக்' என்ற தனியார் ரிசார்ட் நிறுவனத்தின் சமீரன் ராய் என்பவரால் பிஷ்ணுபூர் காவல் நிலையத்தில் அளிக்கப்பட்டது. செபாஷ்ரய் முகாம் நடந்தபோது, 110 முதல் 120 மருத்துவர்கள் மற்றும் ஊழியர்களுக்கு தங்குமிடம், உணவு மற்றும் போக்குவரத்து வசதிகளைச் செய்து தர நிர்பந்திக்கப்பட்டதாகவும், 40 நாட்களுக்கு மேல் ரிசார்ட் அறைகள் பிளாக் செய்யப்பட்டு ரூ.20-25 லட்சம் வரை இழப்பு ஏற்பட்டதாகவும், அத்துடன் முகாம் நடத்தப் பணம் பறிக்கப்பட்டதாகவும் குற்றம் சாட்டப்பட்டுள்ளது. ஜூலை 25 அன்று மேற்கு வங்க சட்டப்பேரவையில் பேசிய முதல்வர் சுவேந்து அதிகாரி, செபாஷ்ரய் முகாம்களில் நான்கு வகையான முறைகேடுகள் நடந்ததாகக் குற்றம் சாட்டினார். தவறான சிகிச்சையால் உடல் உறுப்புகள் துண்டிக்கப்பட்டது, அனுமதியின்றி எக்ஸ்-ரே மற்றும் அல்ட்ராசோனோகிராபி இயந்திரங்களைக் கொள்முதல் செய்தது, மருத்துவ மாணவர்களைக் கொண்டு சிகிச்சை அளித்தது மற்றும் காலாவதியான மருந்துகளை வழங்கியது ஆகியவை இதில் அடங்கும். பாதிக்கப்பட்டவர்களின் புகைப்படங்களைக் காட்டிய அவர், அரசு நிதியைத் தவறாகப் பயன்படுத்தியது மற்றும் அரசு மருத்துவர்களைப் பணியில் அமர்த்தியது குறித்தும் நடவடிக்கைகள் எடுக்கப்பட்டு வருவதாகத் தெரிவித்தார். 2024 மக்களவைத் தேர்தலில் அபிஷேக்கை எதிர்த்துப் போட்டியிட்ட பாஜக தலைவர் அபிஜித் தாஸ் கூறுகையில், இந்த முகாம்களில் வழங்கப்பட்ட மருந்துச் சீட்டுகளில் மருத்துவர்களின் கையொப்பமோ, பதிவு எண்ணோ இல்லை என்றும், எம்பிபிஎஸ் முடிக்காத மருத்துவ மாணவர்களே சிகிச்சை அளித்துள்ளனர் என்றும் கூறி மருத்துவ கவுன்சிலில் புகாரளித்துள்ளார். மேலும், பாலினத்தைக் கண்டறியப் பயன்படும் அல்ட்ராசவுண்ட் இயந்திரங்கள் மாவட்ட நிர்வாகத்தின் அனுமதியின்றி தனியார் நர்சிங் ஹோம்களில் இருந்து பெறப்பட்டதாகவும், இதன் பேரில் ஒரு நர்சிங் ஹோமின் உரிமத்தை சுகாதாரத் துறை ரத்து செய்துள்ளதாகவும் தெரிவித்தார். அரசுத் திட்டமாக இல்லாதபோதிலும், கோடிக்கணக்கான ரூபாய் மதிப்பிலான அரசு மருந்துகள் செபாஷ்ரய் திட்டத்திற்குத் திருப்பப்பட்டதாகச் சுகாதாரத் துறை முதற்கட்ட விசாரணையில் தெரியவந்துள்ளது. அத்துடன், அரசியல் கட்சியின் முகாம்களில் அரசு மருத்துவர்கள் 'சுயசேவகர்களாகப்' பங்கேற்கக் கூடாது என மருத்துவர்கள் அமைப்பும் கேள்வி எழுப்பியுள்ளது. இந்தக் குற்றச்சாட்டுகள் அனைத்தையும் "அரசியல் உள்நோக்கம் கொண்டது" என்று மறுத்துள்ள அபிஷேக் பானர்ஜி, பாஜக அரசு மக்கள் நலத்திட்டங்களைச் செயல்படுத்துவதை விடத் தன் மீது எஃப்.ஐ.ஆர் பதிவு செய்வதிலேயே அதிக நேரத்தைச் செலவிடுவதாக எக்ஸ் தளத்தில் பதிவிட்டுள்ளார். அதேவேளையில், இந்த விவகாரத்தில் திரிணாமுல் காங்கிரஸில் பலர் பேசத் தயங்கும் நிலையில், அக்கட்சியின் எம்.எல்.ஏ குணால் கோஷ், இந்த புகார்கள் அனைத்தையும் அபிஷேக் பானர்ஜி சட்டப்பூர்வமாக எதிர்கொள்வார் என்று தெரிவித்துள்ளார்.