சாவர்க்கர் குறித்து சர்ச்சை பேச்சு: ராகுல் காந்தி மீதான அவதூறு வழக்கு ரத்து - உச்ச நீதிமன்றம் உத்தரவு

எழுதியவர்: எக்ஸ்பிரஸ் செய்தி சேவை இந்துத்துவ சித்தாந்தவாதி வி.டி.சாவர்க்கர் குறித்துப் பேசிய கருத்துக்காக, காங்கிரஸ் தலைவர் ராகுல் காந்திக்கு எதிராக லக்னோ நடுவர் நீதிமன்றம் பிறப்பித்த குற்றவியல் அவதூறு வழக்கு மற்றும் அழைப்பாணையை வெள்ளிக்கிழமை உச்ச நீதிமன்றம் ரத்து செய்தது. ராகுல் காந்தியை விசாரணை செய்யத் தேவையான அனுமதியை உத்தரப்பிரதேச அரசு வழங்கவில்லை என்பதை நீதிமன்றம் சுட்டிக்காட்டியது. ஆங்கிலத்தில் படிக்க: "எதிர்மனுதாரரான உத்தரப்பிரதேச அரசு தாக்கல் செய்த பிரமாணப் பத்திரத்தில், குற்றம் சாட்டப்பட்டவரை விசாரிக்க அனுமதி வழங்கப்பட்டதாக எந்த தகவலும் இல்லை. இந்தச் சூழலில், புகார் மனு மற்றும் நடுவர் நீதிமன்றம் பிறப்பித்த உத்தரவு ஆகியவை ரத்து செய்யப்படுகின்றன," என்று நீதிபதிகள் தீபங்கர் தத்தா மற்றும் ஷீல் நாகு அடங்கிய அமர்வு உத்தரவிட்டது. கடந்த 2022-ம் ஆண்டு மகாராஷ்டிராவில், காங்கிரஸ் தலைவர் ராகுல் காந்தி, சாவர்க்கரை "ஆங்கிலேயர்களின் சேவகர்" என்றும் "அவர்களிடமிருந்து ஓய்வூதியம் பெற்றவர்" என்றும் கூறியதாக வழக்கறிஞர் ந்ரிபேந்திர பாண்டே தனியார் புகார் மனு தாக்கல் செய்தார். அதனைத் தொடர்ந்து லக்னோ நீதிமன்றம் ராகுல் காந்திக்கு அழைப்பாணை அனுப்பியது. இதை எதிர்த்து ராகுல் காந்தி அலகாபாத் உயர் நீதிமன்றத்தில் முறையிட்ட நிலையில், அவரது மனுவை 2024 ஏப்ரல் 4 அன்று உயர் நீதிமன்றம் தள்ளுபடி செய்தது. இதனையடுத்தே அவர் உச்ச நீதிமன்றத்தை அணுகினார். ஏப்ரல் 25-ம் தேதி இந்த மேல்முறையீட்டை விசாரித்த உச்ச நீதிமன்றம், அவரது கருத்துகளுக்குக் கடுமையான ஆட்சேபனையைத் தெரிவித்தது. நீதிபதிகள் தீபங்கர் தத்தா மற்றும் மன்மோகன் அடங்கிய அமர்வு ராகுல் காந்தியிடம், "சுதந்திரப் போராட்ட வீரர்களை நீங்கள் இப்படி பேசக்கூடாது..." என்று கூறியதுடன், இதுபோன்ற கருத்துகளை மீண்டும் கூறினால் அவர் மீது தானாக முன்வந்து நடவடிக்கை எடுக்கப்படும் என்றும் எச்சரித்தது. "வைஸ்ராயிடம் உரையாற்றும்போது மகாத்மா காந்தியும் கூட 'தங்கள் உண்மையுள்ள சேவகர்' என்பதைப் பயன்படுத்தினார் என்பது உங்கள் கட்சிக்காரருக்குத் தெரியுமா? அவரது பாட்டி பிரதமராக இருந்தபோது, இந்த மனிதரை (சாவர்க்கர்) புகழ்ந்து கடிதம் அனுப்பினார் என்பது உங்கள் கட்சிக்காரருக்குத் தெரியுமா? வரலாற்றைத் தெரிந்துகொண்டு சுதந்திரப் போராட்ட வீரர்களை இப்படி நடத்தக்கூடாது. ஏன் இதுபோன்ற கருத்துகளைத் தெரிவிக்கிறீர்கள்?" என்று ராகுல் காந்தி சார்பில் ஆஜரான மூத்த வழக்கறிஞர் ஏ.எம்.சிங்வியிடம் நீதிபதி தத்தா கேள்வி எழுப்பியிருந்தார். மேலும், "சுதந்திரப் போராட்ட வீரர்கள் குறித்துப் பொறுப்பற்ற கருத்துகளை அவர் இனி தெரிவிக்க வேண்டாம். சுதந்திரப் போராட்ட வீரர்களை நடத்தும் முறை இதுதானா?" என்றும் நீதிபதி கேட்டிருந்தார். அனுமதி என்ற சட்டப் புள்ளியில் ராகுல் காந்திக்கு "சட்டப்பூர்வமாக நல்ல வலுவான காரணம்" இருப்பதாகக் கூறி நீதிமன்றம் அதுவரை விசாரணை நடவடிக்கைகளுக்கு இடைக்காலத் தடை விதித்திருந்தது. வெள்ளிக்கிழமை இந்த வழக்கு மீண்டும் விசாரணைக்கு வந்தபோது, மாநில அரசின் வழக்கறிஞரிடம் நீதிபதி தத்தா, "அனுமதி எங்கே?... நீங்கள் சட்டத்தைப் பின்பற்ற வேண்டும்" என்று கேட்டார். புகார்தாரர் சார்பில் ஆஜரான வழக்கறிஞரும் வழக்குத் தொடர அனுமதி தேவை என்பதை ஒப்புக்கொண்டார். "அனுமதி பெறப்படவில்லை. எனவே, நடுவர் நீதிமன்றம் பிறப்பித்த உத்தரவை ரத்து செய்து, இந்த விவகாரத்தை மீண்டும் புதிதாகப் பரிசீலிக்கத் திரும்ப அனுப்ப வேண்டும் என்று வேண்டுகோள் விடுக்கிறேன்" என்று வலியுறுத்தினார். ஆனால் நீதிபதி தத்தா, "அனுமதி தேவை, ஆனால் அனுமதி இல்லை. அத்துடன் இந்த விஷயம் முடிவுக்கு வருகிறது," என்று கூறி வழக்கை முடித்துவைத்தார்.