சுப்ரீம் கோர்ட் கொலீஜியத்தில் புதிய விவாதம்: ஐகோர்ட் பொறுப்புத் தலைமை நீதிபதிகள் நீதிபதிகளை நியமிக்க பரிந்துரைக்க முடியுமா?

Written by: Apurva Vishwanath ராஜஸ்தான் உயர் நீதிமன்றத்தின் பொறுப்புத் தலைமை நீதிபதி (Acting Chief Justice) சஞ்சீவ் பிரகாஷ் சர்மாவின் செயல்பாடுகள் குறித்த சர்ச்சை எழுந்துள்ள நிலையில், உயர் நீதிமன்ற பொறுப்புத் தலைமை நீதிபதியால் அனுப்பப்படும் நீதிபதிகள் நியமனப் பரிந்துரைகளை உச்ச நீதிமன்ற கொலீஜியம் எவ்வாறு கையாள வேண்டும் என்ற பழைய கேள்வி மீண்டும் விவாதத்திற்கு வந்துள்ளது. நீதிபதி சர்மா கடந்த 2025 செப்டம்பர் முதல் கிட்டத்தட்ட ஓராண்டாகப் பொறுப்புத் தலைமை நீதிபதியாகப் பணியாற்றி வரும் சூழலில், அவரால் பரிந்துரைக்கப்பட்ட 4 பெயர்களை உச்ச நீதிமன்ற கொலீஜியம் பரிசீலிக்க வேண்டியுள்ளதாக தி இந்தியன் எக்ஸ்பிரஸ் நாளிதழுக்குத் தெரிய வந்துள்ளது. இந்தியத் தலைமை நீதிபதி சூர்யா காந்த் தலைமையிலான உச்ச நீதிமன்ற கொலீஜியத்தில் நீதிபதிகள் விக்ரம் நாத், பி.வி. நாக ரத்னா, எம்.எம். சுந்தரேஷ் மற்றும் பி.எஸ். நரசிம்மா ஆகியோர் இடம்பெற்றுள்ளனர். கொலீஜிய வட்டாரங்களின்படி, நீதிபதி சர்மாவின் நீண்டகாலப் பொறுப்புப் பதவி, ராஜஸ்தான் உயர் நீதிமன்றமே அவரது தாய் நீதிமன்றம் (parent HC) ஆகியவற்றைக் கருத்தில் கொண்டு, வெறும் பொறுப்பு என்ற அதிகாரப்பூர்வப் பதவியைக் காரணம் காட்டி அவரது பரிந்துரைகளைத் திருப்பி அனுப்பாமல், தகுதியின் அடிப்படையில் பரிசீலிக்க வேண்டும் என்ற கருத்து உள்ளது. அதே சமயம், பொறுப்புத் தலைமை நீதிபதிகளின் பரிந்துரைகளை ஏற்கத் தொடங்கினால், நிரந்தரத் தலைமை நீதிபதியை உடனடியாக நியமிக்கும் அவசரம் குறைந்து, தற்காலிகப் பதவி காலங்கள் இயல்பான ஒன்றாக மாறிவிடும் அபாயம் உள்ளதாக மற்றொரு தரப்பு எச்சரிக்கிறது. பொதுவாக, பொறுப்புத் தலைமை நீதிபதிகளுக்கு குறுகிய பதவிக்காலமே இருப்பதால் அவர்கள் நீதிபதிகள் நியமனப் பரிந்துரைகளைச் செய்வதில்லை என்ற நடைமுறை உள்ளது. இருப்பினும், சில விதிவிலக்கான சூழ்நிலைகளில் இத்தகைய பரிந்துரைகள் வந்தபோது, கொலீஜியம் கடந்த காலங்களில் மாறுபட்ட அணுகுமுறைகளைக் கையாண்டுள்ளது. பம்பாய் உயர் நீதிமன்றம் (2020): நீதிபதி தர்மாதிகாரி 2020 பிப்.20 முதல் மார்ச் 19 வரை பொறுப்புத் தலைமை நீதிபதியாக இருந்தபோது 22 பெயர்களைப் பரிந்துரைத்தார். ஆலோசனைக் குழு நீதிபதிகளில் இருவரின் எதிர்ப்பையும் மீறி, அப்போதைய தலைமை நீதிபதி எஸ்.ஏ. பாப்டே தலைமையிலான கொலீஜியம் 18 பெயர்களை மத்திய அரசுக்கு அனுப்பியது. ஆனால், ஆலோசனைக் குழு நீதிபதிகளின் ஆட்சேபனைகளைச் சுட்டிக்காட்டி மத்திய அரசு அப்பட்டியலைத் திருப்பி அனுப்பியது. குறுகிய காலத்தில் 22 பேரையும் சரிபார்க்க முடியாது என நீதிபதிகள் ஏ.எம். கான்வில்கர் மற்றும் டி.ஒய். சந்திரசூட் ஆகியோர் எதிர்ப்புத் தெரிவித்திருந்தனர். ராஜஸ்தான் உயர் நீதிமன்றம் (2022): அப்போதைய ராஜஸ்தான் உயர் நீதிமன்றத் தலைமை நீதிபதி அகில் குரேஷி தனது பதவிக்காலத்தின் இறுதியில் 12 பெயர்களைப் பரிந்துரைத்ததாக மத்திய அரசு ஆட்சேபனை தெரிவித்தது. எனினும், குறிப்பிட்ட நபர் மீது உளவுத்துறை ரீதியான ஆட்சேபனைகள் ஏதேனும் உள்ளதா என அப்போதைய தலைமை நீதிபதி சந்திரசூட் தலைமையிலான கொலீஜியம் விளக்கம் கேட்டது. அரசு பதில் அளிக்காத சூழலில், 12 பெயர்களில் 8 பெயர்களுக்கு மத்திய அரசு ஒப்புதல் அளித்தது. ராஜஸ்தான் உயர் நீதிமன்றத்தின் முன்னாள் நீதிபதியும், தற்போதைய உச்ச நீதிமன்ற நீதிபதியுமான சந்தீப் மேத்தா, ஆக.2, 10 மற்றும் 17 ஆகிய தேதிகளில் தலைமை நீதிபதி சூர்யா காந்துக்கு 3 கடிதங்களை எழுதினார். அதில், நீதிபதி சர்மாவுக்குப் பதிலாக வேறு மாநிலத்தைச் சேர்ந்த ஒருவரைத் தலைமை நீதிபதியாக நியமிக்க வேண்டும் என்று கோரியுள்ளார். மேலும், வழக்கு பட்டியலிடுவதில் முறைகேடு, தலைமை நீதிபதி உடன் நெருக்கமாக இருப்பதாகக் கூறி சக நீதிபதிகளை அச்சுறுத்துதல் மற்றும் நிர்வாக அதிகாரங்களைத் தவறாகப் பயன்படுத்துதல் உள்ளிட்ட குற்றச்சாட்டுகளை அக்கடிதங்களில் அவர் முன்வைத்துள்ளார். இதற்கு ஆக.26 அன்று பதிலளித்த இந்தியத் தலைமை நீதிபதி சூர்யா காந்த், பணியில் உள்ள ஒரு நீதிபதி மீதான குற்றச்சாட்டுகளை ஊடகங்கள் வாயிலாகத் தீர்மானிக்க முடியாது என்றும், அவை நிறுவன நடைமுறைகள் (institutional channels) மூலமாகவே அணுகப்பட வேண்டும் என்றும் தெரிவித்தார். நீதிபதி சர்மா 2025 செப்டம்பர் இறுதி முதல் ராஜஸ்தான் உயர் நீதிமன்றத்தின் பொறுப்புத் தலைமை நீதிபதியாகப் பணியாற்றி வருகிறார். இதனை நீதிபதி மேத்தா தனது கடிதத்தில் வழக்கத்திற்கு மாறான நீண்ட பதவிக்காலம் எனக் குறிப்பிட்டுள்ளார். 2016 முதல் ராஜஸ்தான் உயர் நீதிமன்ற நீதிபதியாக இருந்த சர்மா, 2022-ல் பாட்னாவிற்கு மாற்றப்பட்டார். 2023-ல் உடல்நிலையைக் காரணம் காட்டி ராஜஸ்தான் திரும்பக் கோரியதை கொலீஜியம் நிராகரித்து, அவரை பஞ்சாப் மற்றும் ஹரியானா உயர் நீதிமன்றத்திற்கு மாற்றியது. பின், 2025-ல் நிறைவேற்றப்பட்ட தீர்மானத்தின் மூலம் அவர் மீண்டும் ராஜஸ்தானுக்குத் திரும்பினார்.