“தனிப்பட்ட சம்பவமாகவோ கோஷ்டிப் பூசலாகவோ கடந்து போய்விட முடியாது” - உதயநிதி பேச்சு!

4 நாட்கள் விடுமுறைக்கு பின்னர் தமிழக சட்டப்பேரவை இன்று (17.08.2026) கூடியது. அப்போது திமுக சார்பில் எதிர்க்கட்சித் தலைவர் உதயநிதி ஸ்டாலின் பேசுகையில், “கடந்த ஒரு வாரத்தில் மட்டும் தமிழ்நாடு முழுவதும் ஏராளமான கொலைகள் நடந்துள்ளன. குறிப்பாக, கோவையில் கள்ளக்குறிச்சியைச் சேர்ந்த ஒடுக்கப்பட்ட பிரிவைச் சேர்ந்த 19 வயது பொறியியல் மாணவர் அமுதனை, 20 பேர் கொண்ட ஒரு கும்பல் கடந்த திங்கள்கிழமை அடித்துக் கொலை செய்திருக்கிறது. இந்தப் பிரச்சனையை நான் ஏற்கனவே இந்த அவையில் எழுப்பியபோது, பள்ளிக்கல்வித் துறை அமைச்சர் இது ஒரு கோஷ்டி பூசலால் ஏற்பட்ட தகராறில் நடந்த கொலை என்று இங்கே பதிவு செய்திருக்கிறார். 10 பேர் மோதிக்கொண்டு, ஒருவருக்கொருவர் சண்டையிட்டு கொலை நடந்திருந்தால் அதை கோஷ்டி பூசல் என்று கூறலாம். ஆனால், ஒரு மாணவனை கிட்டத்தட்ட 20 பேர் சேர்ந்து அடித்திருக்கிறார்கள். எனவே, இது ஒரு படுகொலை. மாணவர் அமுதன் விஷயத்தில், கோவை செட்டிப்பாளையம் போலீசார் அமுதனை ஒரு வழக்கு தொடர்பான விசாரணைக்காக காவல் நிலையத்திற்கு வரச் சொல்லியிருக்கிறார்கள். அப்போது அந்த போதை கும்பல் குறித்து தகவல் கேட்டு அமுதனிடம் விசாரித்திருக்கிறார்கள். தகவல் பெற்ற காவல்துறை, குற்றவாளிகளைக் கண்டுபிடித்து, போதைப் பொருட்களை பறிமுதல் செய்திருக்க வேண்டும். ஆனால், போதைப் பொருள் பயன்பாடு குறித்து அமுதன் அளித்த தகவல்களை குற்றவாளிகளிடமே பகிர்ந்திருக்கிறார்கள். அதுதான் அமுதனுடைய மரணத்திற்கு முக்கிய காரணமாக அமைந்திருக்கிறது. இதை நான் மட்டும் சொல்லவில்லை. அமுதனுடைய பெற்றோர் இருவரும் இதைச் சொல்லியிருக்கிறார்கள். அவர்கள் இருவருமே என்னிடம் தொலைபேசியில் பேசியிருக்கிறார்கள். நான் அவர்களுக்கு ஆறுதல் கூறியிருக்கிறேன். அவர்கள் பேசும்போது, போதைப் பொருள் கும்பல் குறித்து காவல்துறையிடம் தகவல் கொடுத்ததால்தான் அமுதன் கொலை செய்யப்பட்டதாக உறுதியாக நம்புவதாக என்னிடம் தெரிவித்தார்கள். இந்த வழக்கு தொடர்பாக ஆய்வு செய்த பல்வேறு சமூக ஆர்வலர்களும் இதே குற்றச்சாட்டை முன்வைக்கிறார்கள். இந்த சம்பவத்திற்கு நீதி கிடைக்க வேண்டும் என்பதற்காக, நேற்றைய தினம் திமுக தலைவர் ஸ்டாலின் உத்தரவின்படி, கள்ளக்குறிச்சி மாவட்டக் கழக திமுக சார்பில் கிட்டத்தட்ட 10 ஆயிரம் பேர் பங்கேற்ற மாபெரும் கண்டன ஆர்ப்பாட்டத்தை கள்ளக்குறிச்சி நகரத்தில் நடத்தி இருக்கிறோம். இந்தக் கொலையை ஏதோ ஒரு தனிப்பட்ட சம்பவமாகவோ அல்லது கோஷ்டி பூசலாகவோ நாம் கடந்து போய்விட முடியாது. அரசின் அலட்சியத்தாலும், காவல்துறையின் பொறுப்பற்ற போக்காலும்தான் இந்தக் கொலை நடந்திருக்கிறது என்பதுதான் குற்றச்சாட்டு” எனத் தெரிவித்தார்.