விவாதத்திற்கு அழைப்பு விடுத்த அமித்ஷா; “எனக்கு விளக்கம் தேவையில்லை”: ராகுல் காந்தி பதில்

எழுதியவர்: அசாத் ரஹ்மான் எதிர்க்கட்சிகள் எழுப்பும் அனைத்துக் கேள்விகளுக்கும் பதிலளிக்க அரசு தயாராக இருப்பதாக மத்திய உள்துறை அமைச்சர் அமித்ஷா புதன்கிழமை தெரிவித்த நிலையில், அதற்குப் பதிலடி கொடுத்த மக்களவை எதிர்க்கட்சித் தலைவர் ராகுல் காந்தி, அமித்ஷா கடந்த 20 நாட்களாக வராமல் இருந்துவிட்டு, தற்போது தனது நிலையைத் தக்கவைத்துக்கொள்ளக் கடைசி முயற்சி செய்வதாகக் குற்றம் சாட்டினார். ஆங்கிலத்தில் படிக்க: "பலூன் வெடித்துவிட்டது, இப்போது கடைசி நிமிடத்தில் அவர்கள் மீண்டும் காஸ் நிரப்ப முயற்சி செய்கிறார்கள். அமித்ஷாவுக்குத் தைரியம் இல்லை, உள்துறை அமைச்சருக்குத் தைரியம் இல்லை" என்று ராகுல் காந்தி கூறினார். நீட் வினாத்தாள் கசிவு விவகாரம் தொடர்பாக ஜூலை 20-ம் தேதி மாணவர்கள் நடத்திய பேரணியின் போது காவல் துறை நடத்தியதாகக் கூறப்படும் தாக்குதல் குறித்து விவாதிக்க அமித்ஷா விடுத்த அழைப்பிற்குப் பதிலளித்த ராகுல் காந்தி, அமைச்சரின் "கற்பனைகளையோ", "விரிவுரைகளையோ அல்லது விவாதத்தையோ" கேட்க எதிர்க்கட்சி விரும்பவில்லை என்றார். மாறாக, போராட்டம் நடத்திய மாணவர்கள் மீது பலபிரயோகம் செய்யப்பட்டது குறித்துக் கேட்கப்படும் குறிப்பிட்ட கேள்விகளுக்கு அரசு பதிலளிக்க வேண்டும் என்று அவர் கூறினார். "நாங்கள் சில எளிய விஷயங்களில் மட்டுமே ஆர்வம் காட்டுகிறோம்," என்று கூறிய ராகுல் காந்தி, போராட்டம் நடத்திய மாணவர்கள் மீது துப்பாக்கிச் சூடு நடத்தவும், காயப்படுத்தவும், தடியடி நடத்தவும் காவல்துறைக்கு உத்தரவிட்டது யார் என்று கேள்வி எழுப்பினார். "மாணவர்களில் ஒருவரின் பார்வையைப் பறித்தது யார், ஒரு மாணவனின் காதில் சுட்டது யார்? ஆணிகள் அடிக்கப்பட்ட தடிகளால் மாணவர்களை அடிக்க உத்தரவிட்டது யார்?" என்று கேள்வி எழுப்பிய ராகுல் காந்தி, இந்த உத்தரவுகளை உள்துறை அமைச்சகமே அமல்படுத்தியதாகக் குற்றம் சாட்டினார். “நமது குழந்தைகள் மீது துப்பாக்கிச் சூடு நடத்த அமித்ஷா தான் உத்தரவிட்டாரா? அவர் உத்தரவிட்டிருந்தால், அந்த குற்றத்திற்காக அவர் ராஜினாமா செய்ய வேண்டும். ஒருவேளை அவர் உத்தரவிடவில்லை என்றால், திறமையற்றவராக இருந்ததற்காக அவர் ராஜினாமா செய்ய வேண்டும்” என்றார். நாடாளுமன்றத்திற்குள்ளும் அதைச் சுற்றிலும் அவரது நகர்வுகள் தெளிவாகத் தெரிந்தபோதிலும், 20 நாட்கள் நடந்த நாடாளுமன்ற முடக்கத்தின் போது அமித்ஷா "காணாமல் போய்விட்டார்" என்றும் ராகுல் மேலும் குற்றம் சாட்டினார். “அவர் இங்கே (நாடாளுமன்ற வளாகம்) வருவார். அவரது கார்கள் வந்து செல்லும். அவரைச் சுற்றி 30 கார்கள் இருக்கும். மாணவர்கள் இதைத் தெரிந்துகொள்ள வேண்டும். மாணவர்கள் தன் வீட்டை அடைந்துவிடக்கூடாது என்பதற்காக அவரது வீட்டிற்கு வெளியே ஆயிரக்கணக்கான போலீசார் நிறுத்தப்பட்டிருந்தனர்” என்று ராகுல் காந்தி கூறினார். ஜூலை மாதம் ஜார்க்கண்டில் மாணவர்கள் மீது நடந்த வன்முறை குறித்துத் தாம் அமைதி காப்பதாக பா.ஜ.க சுமத்திய குற்றச்சாட்டையும் ராகுல் காந்தி நிராகரித்தார். “நான் இதில் அமைதியாக இல்லை. நமது மாணவர்களுக்கு எதிராக நடக்கும் எந்தவொரு வன்முறையையும் நாங்கள் ஆதரிக்கவில்லை என்று நான் கூறியிருக்கிறேன். இதை நான் வெளிப்படையாகவே சொல்கிறேன்” என்றார். செய்தியாளர்களுடனான உரையாடலின் போது ஊடகங்களையும் இலக்கு வைத்த காங்கிரஸ் தலைவர், தாம் பேசும்போது மீண்டும் மீண்டும் குறுக்கிடுவதாகக் கூறி எதிர்ப்பு தெரிவித்தார். “நீங்கள் அவரிடம் (அமித்ஷா) குறுக்கிட்டுப் பேசுவீர்களா? ஏன் பேசுவதில்லை? எங்களிடம் குறுக்கிடும் நீங்கள், அவரிடம் மட்டும் ஒருபோதும் குறுக்கிடுவதில்லை. அவரிடம் அப்படி என்ன சிறப்பு இருக்கிறது? முழு ஊடகமும் அவரைச் சுற்றி எலிகளைப் போல அமைதியாக நிற்கிறது. இப்போது நாட்டில் மாணவர்கள் பயப்படுவதில்லை. நீங்களும் பயப்படக்கூடாது.”