40 கிலோ வெயிட் லாஸ்.. ஜிம் இல்லாமலே இப்படியொரு மாற்றமா? குஷ்பு சொன்ன சீக்ரெட்

நடிகை குஷ்பு கடந்த சில ஆண்டுகளாக தனது உடல் எடையை படிப்படியாகக் குறைத்து, முற்றிலும் மாறுபட்ட தோற்றத்தில் ரசிகர்களை ஆச்சரியப்படுத்தி வருகிறார். ஒருகாலத்தில் தனது உடல் எடை குறித்து சமூக வலைதளங்களில் பல்வேறு விமர்சனங்களை எதிர்கொண்ட குஷ்பு, தற்போது சுமார் 38 கிலோ வரை எடையைக் குறைத்திருப்பதாக தெரிவித்துள்ளார். தொடர்ந்து அவரது தோற்றத்தில் ஏற்பட்ட மாற்றம் குறித்து ரசிகர்கள் பலரும் அவரது எடை குறைப்பு ரகசியம் என்ன என்று கேள்வி எழுப்பி வந்த நிலையில், இன்று நடைபெற்ற நியூஸ்18 டவுன் ஹால் நிகழ்ச்சியில் அதற்கான பதிலை குஷ்பு வெளிப்படையாக பகிர்ந்துள்ளார். நல்ல உடல் என்பது வெறும் உடற்பயிற்சி மற்றும் உணவுக் கட்டுப்பாட்டால் மட்டும் கிடைப்பதில்லை என்றும், முதலில் மனதை ஆரோக்கியமாக வைத்துக் கொள்வது மிகவும் முக்கியம் என்றும் குஷ்பு தெரிவித்துள்ளார். “நல்ல உடல் என்பது நல்ல மனதில் இருந்து வருகிறது. நாம் முதலில் நம் மனதை நன்றாக வைத்துக் கொள்ள வேண்டும். அதுவே எல்லாவற்றுக்கும் அடிப்படை” என்று அவர் கூறியுள்ளார். உடல் எடையைக் குறைப்பதற்கான பயணத்தில் மனநிலை, வாழ்க்கை முறை மற்றும் அன்றாட பழக்கவழக்கங்கள் முக்கிய பங்கு வகித்ததாகவும் அவர் குறிப்பிட்டுள்ளார். தனது எடை குறைப்பு பயணத்திற்கு முக்கிய திருப்புமுனையாக அமைந்தது ‘அண்ணாத்த’ திரைப்படம் என்று குஷ்பு தெரிவித்துள்ளார். அந்தப் படத்திற்காக டப்பிங் கொடுக்கச் சென்றபோது, திரையில் தனது அறிமுகக் காட்சியைப் பார்த்து தானே அதிர்ச்சியடைந்ததாக கூறியுள்ளார். திரையில் தனது உருவம் மிகவும் பெரிதாகத் தெரிந்ததை பார்த்தபோது, “திரை முழுவதையும் நான் ஒருத்தியே ஆக்கிரமித்துவிட்டேன். பலூன் போல ஊதிவிட்டேன். என் கழுத்தே ஸ்க்ரீனில் தெரியவில்லை. முகம் அவ்வளவு பெரிதாக இருந்தது. எனக்காக நானே ஏதாவது செய்ய வேண்டும்” என்று முடிவு செய்ததாக தெரிவித்துள்ளார். அந்த காலகட்டத்தில் உடல் எடை அதிகரிப்பால் அன்றாட வாழ்க்கையிலும் சில சிரமங்களை எதிர்கொண்டதாக குஷ்பு கூறியுள்ளார். குறிப்பாக படிக்கட்டுகளில் ஏறி இறங்கும்போது மூச்சு வாங்குவது, நீண்ட தூரம் நடக்கும்போது மூட்டு வலி ஏற்படுவது போன்ற பிரச்சனைகள் இருந்ததாக தெரிவித்துள்ளார். இதே நேரத்தில் தனது கணவரும் மகள்களும் உடல் எடையைக் குறைப்பதில் கவனம் செலுத்தி வந்ததை கவனித்த அவர், தானும் அவர்களுடன் இணைந்து தனது வாழ்க்கை முறையை மாற்றிக் கொள்ள முடிவு செய்ததாக கூறியுள்ளார். கடந்த நான்கு ஆண்டுகளாக தொடர்ந்து உடல் எடையைக் குறைக்கும் முயற்சியில் ஈடுபட்டு வருவதாக குஷ்பு தெரிவித்துள்ளார். இதன் மூலம் சுமார் 38 கிலோ வரை எடையைக் குறைத்திருப்பதாக அவர் கூறியுள்ளார். ஆனால், இதற்காக தினமும் பல மணி நேரம் ஜிம்மில் கடுமையான உடற்பயிற்சிகளை செய்ததாக நினைக்க வேண்டாம் என்றும் அவர் தெளிவுபடுத்தியுள்ளார். தனக்கு ஜிம் செல்வது அதிகம் பிடிக்காது என்றும், இயல்பான அன்றாட உடல் இயக்கங்களையே அதிகம் விரும்புவதாகவும் தெரிவித்துள்ளார். குஷ்புவின் எடை குறைப்பு பயணத்தில் வீட்டு வேலைகளும் முக்கிய பங்கு வகித்துள்ளன. தனது வீட்டில் கணவர், இரண்டு மகள்கள், அம்மா, மாமியார் மற்றும் ஏழு செல்லப்பிராணிகள் என பெரிய குடும்பத்துடன் வசிப்பதாக அவர் தெரிவித்துள்ளார். வீட்டில் ஒரேயொரு பணியாளர் மட்டுமே இருப்பதால், பெரும்பாலான வேலைகளை தானே செய்து கொள்வதாகவும் கூறியுள்ளார். வீட்டு வேலைகள் மூலம் நாள் முழுவதும் சுறுசுறுப்பாக இருப்பது தனது உடல்நலனைப் பாதுகாப்பதில் முக்கிய பங்காற்றியதாகவும் அவர் தெரிவித்துள்ளார். இதனுடன் யோகா, வீட்டிலேயே நடைப்பயிற்சி மற்றும் தனக்கு ஏற்ற உடற்பயிற்சிகளையும் மேற்கொண்டதாக குஷ்பு கூறியுள்ளார். ஆரம்பத்தில் முதல் 5 கிலோ எடையைக் குறைப்பது தனக்கு மிகவும் எளிதாக இருந்ததாகவும், அதன்பிறகு உடல் எடை குறைவது படிப்படியாக நடந்ததாகவும் தெரிவித்துள்ளார். எடையைக் குறைப்பதை அவசரமாக மேற்கொள்ளாமல், நீண்ட காலத்திற்கு தொடர்ந்து செய்யக்கூடிய மாற்றங்களை தனது வாழ்க்கை முறையில் கொண்டு வந்ததாகவும் அவர் கூறியுள்ளார். உணவுப் பழக்கத்திலும் முழுமையான தடை விதிப்பதை விட அளவைக் குறைத்துக் கொள்வதையே குஷ்பு பின்பற்றியதாக தெரிவித்துள்ளார். தனக்கு மிகவும் பிடித்த உணவுகளில் ஒன்றான மட்டன் பிரியாணியை முழுமையாக தவிர்க்கவில்லை என்றும், முன்பு சாப்பிட்ட அளவைவிட தற்போது குறைவாக சாப்பிடுவதாகவும் கூறியுள்ளார். ஒரு முழு பிரியாணிக்கு பதிலாக ஒரு கப் அளவு சாப்பிடுவதாக குறிப்பிட்ட அவர், உணவை முற்றிலும் தவிர்ப்பதை விட அளவோடு சாப்பிடுவது தனக்கு ஏற்றதாக இருந்ததாக தெரிவித்துள்ளார். கலோரிகளை கணக்கிட்டு ஒவ்வொரு உணவையும் சாப்பிடும் பழக்கம் தனக்கு இல்லை என்றும் குஷ்பு கூறியுள்ளார். குறிப்பிட்ட அளவு கிராம் புரதம் அல்லது குறிப்பிட்ட உணவு மட்டுமே சாப்பிட வேண்டும் என்ற கடுமையான டயட் முறையை பின்பற்றுவதில்லை என்றும் தெரிவித்துள்ளார். தனது உடலுக்கு உண்மையில் எவ்வளவு பசி இருக்கிறது என்பதை புரிந்து கொண்டு அதற்கேற்ப உணவு எடுத்துக் கொள்வதாக அவர் கூறியுள்ளார். இதன் மூலம் உணவை முழுமையாகத் தவிர்க்காமல், அளவைக் கட்டுப்படுத்துவதில் கவனம் செலுத்தியுள்ளார். அதே நேரத்தில் தனது எடை குறைப்பு முறையை மற்றவர்கள் அப்படியே பின்பற்ற வேண்டும் என்று தான் ஒருபோதும் பரிந்துரைக்கவில்லை என்றும் குஷ்பு எச்சரித்துள்ளார். ஒவ்வொருவருடைய உடலும் வெவ்வேறு விதமானது என்றும், ஒருவருக்கு பயனளிக்கும் உணவு அல்லது உடற்பயிற்சி மற்றொருவருக்கும் அதே அளவு பயனளிக்கும் என்று சொல்ல முடியாது என்றும் அவர் குறிப்பிட்டுள்ளார். “நம் உடலை நாம் புரிந்து கொண்டு, அதற்கேற்றபடி செயல்பட வேண்டும். அதுதான் எல்லாவற்றுக்கும் அடிப்படை” என்று குஷ்பு தெரிவித்துள்ளார். உடல் எடை குறைப்பை வெறும் தோற்றத்திற்காக மட்டுமே மேற்கொள்ளவில்லை என்றும், உடல் சுறுசுறுப்பு மற்றும் அன்றாட வாழ்க்கைத் தரத்தை மேம்படுத்துவதும் தனது நோக்கமாக இருந்ததாகவும் அவரது பேச்சில் தெரிகிறது. முன்னதாக உடல் எடை அதிகமாக இருந்தபோது படிக்கட்டுகளில் ஏறுவது, நீண்ட தூரம் நடப்பது போன்ற சாதாரண விஷயங்களிலேயே சிரமம் ஏற்பட்டதாக தெரிவித்த அவர், தற்போது அந்த நிலைமையில் குறிப்பிடத்தக்க மாற்றம் ஏற்பட்டுள்ளதாக கூறியுள்ளார். மேலும், அதிக உடல் எடையுடன் இருந்தபோது தூக்கத்திலும் ஒரு மாற்றத்தை எதிர்கொண்டதாக குஷ்பு தெரிவித்துள்ளார். குறிப்பாக தூங்கும்போது அதிகமாக குறட்டை விடுவதாக கூறிய அவர், தற்போது எடை குறைந்த பிறகு அந்தப் பிரச்சனை கணிசமாக குறைந்துள்ளதாக தெரிவித்துள்ளார். இந்த மாற்றத்தை முதலில் தனது கணவர்தான் கவனித்து கூறியதாகவும், அதன் பின்னரே தனது உடலில் ஏற்பட்ட மாற்றத்தை இன்னும் தெளிவாக உணர்ந்ததாகவும் குஷ்பு தெரிவித்துள்ளார். தனக்கு நீரிழிவு, ரத்த அழுத்தம் போன்ற பிரச்சனைகள் எடை அதிகரிப்பின் காரணமாக ஏற்படவில்லை என்றும் குஷ்பு தெரிவித்துள்ளார். தான் எப்போதும் மகிழ்ச்சியான மனநிலையுடன் இருப்பதாகவும், மன அழுத்தம் இல்லாததால் நன்றாக தூங்குவதாகவும் கூறியுள்ளார். படுத்தவுடன் தூங்கிவிடும் பழக்கம் தனக்கு இருப்பதாகவும் அவர் தெரிவித்துள்ளார். இருப்பினும், உடல் எடை அதிகமாக இருந்த காலத்தில் ஏற்பட்ட குறட்டை போன்ற பிரச்சனைகள், தனது வாழ்க்கை முறையை மாற்ற வேண்டும் என்ற எண்ணத்தை மேலும் வலுப்படுத்தியதாக கூறியுள்ளார். குஷ்புவின் இந்தப் பேச்சு, உடல் எடை குறைப்பு என்பது சில வாரங்களில் அல்லது சில மாதங்களில் முடிந்துவிடும் விஷயம் அல்ல; தொடர்ந்து கடைப்பிடிக்கக்கூடிய வாழ்க்கை முறை மாற்றங்களின் விளைவாகவும் இருக்கலாம் என்பதை வெளிப்படுத்துகிறது. நான்கு ஆண்டுகளில் 38 கிலோ வரை எடையைக் குறைத்திருப்பதாக அவர் கூறியிருப்பது, வேகமாக எடை குறைப்பதைவிட பொறுமையாகவும், தனக்கு ஏற்ற முறையிலும் மாற்றங்களை மேற்கொண்டதைக் காட்டுகிறது. குறிப்பாக ஜிம், கடுமையான டயட் என எதையும் கட்டாயப்படுத்தாமல், யோகா, நடைப்பயிற்சி, வீட்டு வேலைகள், உணவின் அளவு குறைப்பு போன்றவற்றை தனது அன்றாட வாழ்க்கையின் ஒரு பகுதியாக மாற்றியிருப்பதாக குஷ்பு தெரிவித்துள்ளார். இதன் மூலம், “எடை குறைக்க வேண்டும்” என்ற எண்ணத்தை தாண்டி, “உடலை புரிந்து கொண்டு அதற்கேற்ற வாழ்க்கை முறையை உருவாக்க வேண்டும்” என்பதே தனது அணுகுமுறை என்பதை குஷ்பு வலியுறுத்தியுள்ளார். தனது அனுபவத்தை மற்றவர்களுக்கு கட்டாயமான எடை குறைப்பு விதியாக முன்வைக்காமல், ஒவ்வொருவரும் தங்களது உடல்நிலை, தேவைகள் மற்றும் வாழ்க்கை முறைக்கு ஏற்ற மாற்றங்களை மேற்கொள்ள வேண்டும் என்ற கருத்தையும் அவர் பதிவு செய்துள்ளார். நான்கு ஆண்டுகளாக தொடர்ந்து மேற்கொண்ட முயற்சியின் மூலம் ஏற்பட்ட இந்த மாற்றம், தற்போது அவரது தோற்றத்தில் மட்டுமல்லாமல் அன்றாட செயல்பாடுகளிலும் தன்னம்பிக்கையிலும் மாற்றத்தை ஏற்படுத்தியுள்ளதாக குஷ்புவின் பேச்சு உணர்த்துகிறது.