கண்டம் விட்டு கண்டம் காதல்... ரஷ்ய பெண்ணை கரம்பிடித்த தமிழர்

சென்னை மயிலாப்பூரைச் சேர்ந்த உதயசங்கர், ரஷ்யாவைச் சேர்ந்த மரியாவை திருச்செந்தூர் அருள்மிகு சுப்பிரமணிய சுவாமி கோயிலில் வைத்து திருமணம் செய்து கொண்ட சம்பவம் பலரது கவனத்தையும் ஈர்த்துள்ளது. வெவ்வேறு நாடுகள் மற்றும் கலாசாரப் பின்னணியைச் சேர்ந்த இருவரும் காதலித்து, இரு குடும்பங்களின் சம்மதத்துடன் திருமண வாழ்க்கையில் இணைந்துள்ளனர். உதயசங்கரும் மரியாவும் சீனாவில் உள்ள கார் தயாரிப்பு நிறுவனம் ஒன்றில் பணியாற்றியபோது ஒருவருக்கொருவர் அறிமுகமாகியுள்ளனர். ஒரே நிறுவனத்தில் பணியாற்றியதால் ஏற்பட்ட பழக்கம் நாளடைவில் நட்பாகவும், பின்னர் காதலாகவும் மாறியதாக கூறப்படுகிறது. இருவரும் தங்களது எதிர்கால வாழ்க்கையை ஒன்றாக அமைத்துக் கொள்ள முடிவு செய்த நிலையில், தங்களது காதல் குறித்து பெற்றோரிடம் தெரிவித்துள்ளனர். வெவ்வேறு நாட்டைச் சேர்ந்தவர்கள் என்பதால், இரு குடும்பங்களுக்கும் இந்தத் திருமணம் புதிய அனுபவமாக இருந்தாலும், இருவரின் விருப்பத்தையும் புரிந்துகொண்ட பெற்றோர் திருமணத்திற்கு சம்மதம் தெரிவித்துள்ளனர். இதையடுத்து, தமிழகத்தின் பாரம்பரிய திருமண முறையில் திருமணம் செய்து கொள்ள இருவரும் முடிவு செய்துள்ளனர். அதன்படி, அறுபடை வீடுகளில் ஒன்றாகவும், உலகப் புகழ்பெற்ற முருகன் திருத்தலமாகவும் விளங்கும் திருச்செந்தூர் கோயிலைத் திருமணத்திற்கான இடமாகத் தேர்வு செய்துள்ளனர். திருச்செந்தூர் முருகன் கோயிலில் நடைபெற்ற திருமணத்தில் உதயசங்கர், மரியாவின் கழுத்தில் தாலி அணிவித்து அவரைத் தனது வாழ்க்கைத் துணையாக ஏற்றுக்கொண்டார். தமிழ் பாரம்பரிய முறைப்படி நடைபெற்ற திருமண நிகழ்வில் குடும்பத்தினர் மற்றும் நெருங்கிய உறவினர்கள் கலந்து கொண்டு மணமக்களை வாழ்த்தினர். வெளிநாட்டைச் சேர்ந்த மரியா, தமிழக கலாசாரத்திற்கு ஏற்ப மணமகள் அலங்காரத்தில் திருமணத்தில் பங்கேற்றதும் பலரது கவனத்தை ஈர்த்தது. திருமணத்திற்குப் பிறகு மரியா தனது பெயரையும் ‘கீர்த்தனா’ என மாற்றிக் கொண்டுள்ளார். ரஷ்யாவைச் சேர்ந்த மரியா, தமிழக பாரம்பரியத்தை ஏற்றுக்கொண்டு ‘கீர்த்தனா’ என்ற பெயரை சூட்டிக் கொண்டிருப்பது இந்தத் திருமணத்தின் மற்றொரு சிறப்பம்சமாக பார்க்கப்படுகிறது. காதல் என்பது மொழி, நாடு, கலாசாரம் போன்ற எல்லைகளைக் கடந்து இரு மனங்களை இணைக்கக்கூடியது என்பதை வெளிப்படுத்தும் வகையில் இந்தத் திருமணம் அமைந்துள்ளது. சீனாவில் பணியாற்றிய காலத்தில் தொடங்கிய இவர்களின் அறிமுகம், காதலாக மலர்ந்து, தற்போது திருச்செந்தூர் முருகன் கோயிலில் திருமணத்தில் முடிந்துள்ளது. இரு குடும்பங்களின் ஆதரவுடன் நடைபெற்ற இந்தத் திருமணம், வெவ்வேறு கலாசாரங்களைச் சேர்ந்த இருவர் ஒருவரையொருவர் புரிந்துகொண்டு, தங்களது வாழ்க்கையை ஒன்றாகத் தொடங்கிய நிகழ்வாக அமைந்துள்ளது. இந்தத் திருமணத்தின் புகைப்படங்கள் மற்றும் தகவல்கள் சமூக வலைதளங்களில் கவனம் பெற்று வரும் நிலையில், புதுமணத் தம்பதிக்கு பலரும் வாழ்த்துகளைத் தெரிவித்து வருகின்றனர்.