தமிழ்த்தாய் வாழ்த்து விவகாரம் : முதல்வர் விஜய் தனித் தீர்மானம்!

தமிழக முதலமைச்சர் விஜய் தலைமையிலான புதிய அரசின் பதவியேற்பு விழா மற்றும் சில பல்கலைக்கழகப் பட்டமளிப்பு விழாக்களின் போது, மத்திய உள்துறை அமைச்சகத்தின் வழிகாட்டுதலைக் காரணம் காட்டி ‘வந்தேமாதரம்’ மற்றும் தேசிய கீதத்திற்குப் பிறகு, மூன்றாவதாகத் தமிழ்த்தாய் வாழ்த்து பாடப்பட்டது பெரும் அரசியல் சர்ச்சையை ஏற்படுத்தியது. அதாவது மாநிலப் பாடலின் முன்னுரிமை பின்னுக்குத் தள்ளப்பட்டதற்கு திமுக, விடுதலைச் சிறுத்தைகள் மற்றும் கம்யூனிஸ்ட் கட்சிகள் உள்ளிட்ட எதிர்க்கட்சிகள் கடும் கண்டனம் தெரிவித்திருந்தன. இந்நிலையில் தமிழகத்தில் உள்ள அனைத்து அரசுத் துறைகள், கல்வி நிறுவனங்கள் மற்றும் பொது அமைப்புகளின் விழாக்களில் ‘தமிழ்த்தாய் வாழ்த்து’ கட்டாயம் முதலாவதாகப் பாடப்பட வேண்டும் என்பதை வலியுறுத்தி, தமிழக சட்டப்பேரவையில் முதலமைச்சர் விஜய் ஒரு முக்கியத் தனித் தீர்மானத்தை இன்று (10.08.2026) தாக்கல் செய்ய உள்ளார். அதன்படி மாநிலத்தின் கலாச்சாரம், மொழி அடையாளம் மற்றும் பாரம்பரியப் பெருமையைப் பாதுகாக்கும் நோக்கில் இந்தத் தனித் தீர்மானம் முதலமைச்சர் விஜய்யால் முன்மொழியப்படவுள்ளது. இத்தீர்மானத்தின்படி, தமிழ்நாட்டின் எல்லைக்குட்பட்ட அனைத்துப் பல்கலைக்கழகங்கள், கல்லூரிகள், பள்ளிகள், அரசு அலுவலகங்கள் மற்றும் பொதுத்துறை நிறுவனங்கள் நடத்தும் எந்தவொரு அதிகாரப்பூர்வ நிகழ்ச்சியாக இருந்தாலும், அதன் தொடக்கத்தில் முதலாவதாகத் தமிழ்த்தாய் வாழ்த்துப் பாடல் பாடப்படுவது இனி சட்டப்பூர்வமாகக் கட்டாயமாக்கப்படும் எனத் தெரிவிக்கப்பட்டுள்ளது. இந்தச் சிறப்புத் தீர்மானம் மூலம் தமிழ்த் தாய் வாழ்த்திற்கு வலுவான சட்டப் பாதுகாப்பும், உரிய அங்கீகாரமும் கிடைக்கும் என எதிர்பார்க்கப்படுகிறது.