புகைப்படக் கலை சமூகத்தின் சக்திவாய்ந்த ஊடகம்: மயிலாடுதுறை ஏவிசி கல்லூரி விழாவில் புகழாரம்!

<p style="text-align: justify;"><strong>மயிலாடுதுறை: </strong>உலக புகைப்பட தினத்தை முன்னிட்டு, மயிலாடுதுறை மாவட்டம் மன்னம்பந்தலில் இயங்கி வரும் புகழ்பெற்ற அரசு உதவி பெறும் ஏவிசி கல்லூரியில் காட்சி தகவல் தொடர்பியல் துறை ( Visual Communication) சார்பில் 22-வது புகைப்படக் கண்காட்சி மிகச் சிறப்பாக நடைபெற்றது. மாணவர்களின் கலைத்திறன், படைப்பாற்றல் மற்றும் சமூகப் பார்வையை வெளிப்படுத்தும் நோக்கில் ஒருங்கிணைக்கப்பட்ட இக்கண்காட்சி, கல்லூரி வளாகத்தில் பெரும் வரவேற்பைப் பெற்றது.</p> <h3 style="text-align: justify;">புகைப்பட கண்காட்சியை திறந்து வைத்த முன்னாள் நீதிபதி</h3> <p style="text-align: justify;">விழாவிற்கு சென்னை உயர்நீதிமன்ற முன்னாள் நீதிபதியும், ஏவிசி கல்வி நிறுவனங்களின் நிர்வாக அதிகாரியுமான கே. வெங்கடராமன் தலைமை தாங்கி கண்காட்சியை முறைப்படி திறந்து வைத்தார். தொடர்ந்து, மாணவர்களால் படம்பிடிக்கப்பட்டு காட்சிப்படுத்தப்பட்டிருந்த நூற்றுக்கணக்கான புகைப்படங்களை அவர் நேரில் பார்வையிட்டார். ஒவ்வொரு புகைப்படத்தின் பின்னணியில் உள்ள கலைநயம், ஒளிப்பதிவு நுட்பம் மற்றும் கருத்து வெளிப்பாட்டை நுணுக்கமாகக் கேட்டறிந்து மாணவர்களை வெகுவாகப் பாராட்டினார்.</p> <p style="text-align: justify;">பின்னர் பேசிய அவர், புகைப்படம் என்பது வெறும் அழகியலைக் காட்டும் கலை மட்டுமல்ல என்றும், அது சமூகத்தின் பல்வேறு பரிமாணங்களை, நிகழ்வுகளை மனித மனங்களில் என்றென்றும் ஆவணப்படுத்தி வைக்கும் மிகச் சக்திவாய்ந்த ஊடகம் என்றும் குறிப்பிட்டார்.</p> <h3 style="text-align: justify;">பல்வேறு கருப்பொருள்களில் இடம் பெற்ற புகைப்படங்கள்</h3> <p style="text-align: justify;">இக்கண்காட்சியில் இந்திய பாரம்பரிய கலாசாரம், கிராமிய மக்களின் இயல்பு வாழ்க்கை முறை, பசுமை மாறா இயற்கை வளங்கள், அரிய வகை பறவையினங்கள், வனவிலங்குகள், தமிழக வரலாற்றுச் சிறப்புமிக்க கோவில்களின் சிற்பக் கலைகள், சுற்றுச்சூழல் பாதுகாப்பு விழிப்புணர்வு மற்றும் மனித உணர்வுகளின் பல்வேறு பரிமாணங்கள் எனப் பலதரப்பட்ட தலைப்புகளில் மாணவர்கள் எடுத்த படங்களின் தொகுப்புகள் இடம்பெற்றிருந்தன.</p> <p style="text-align: justify;">காட்சிப்படுத்தப்பட்டிருந்த ஒவ்வொரு படமும் ஒரு தனித்துவமான செய்தியையும், சமூகப் பொருள்படும் கண்ணோட்டத்தையும் நேர்த்தியாக வெளிப்படுத்தும் வகையில் அமைந்திருந்தது பார்வையாளர்களை வியப்பில் ஆழ்த்தியது.</p> <p style="text-align: justify;">ஏவிசி கல்லூரியின் பல்வேறு துறைகளைச் சேர்ந்த ஆயிரக்கணக்கான மாணவ, மாணவிகள் இக்கண்காட்சியை மிகுந்த ஆர்வத்துடனும் உற்சாகத்துடனும் வந்து பார்வையிட்டனர். குறிப்பாக, இயற்கையின் அழகைக் தத்ரூபமாகப் படம்பிடித்த காட்சியமைப்புகள், அரிதான பறவைகளின் அசைவுகள் மற்றும் கிராமத்து பாரம்பரிய கலாசாரத்தை பிரதிபலித்த புகைப்படங்கள் மாணவர்களின் கவனத்தை வெகுவாக ஈர்த்தன. புகைப்படங்களில் வெளிப்பட்டிருந்த நுணுக்கமான காட்சியமைப்புகள், கோணங்கள் மற்றும் படைப்பாற்றலைக் கண்டு சக மாணவர்களும் பேராசிரியர்களும் தங்களது வியப்பையும் பாராட்டுகளையும் தெரிவித்தனர்.</p> <h3 style="text-align: justify;">சிறப்பு விருந்தினர்கள் வியந்து பாராட்டு</h3> <p style="text-align: justify;">நிகழ்ச்சியில் ஏவிசி கல்லூரியின் முதல்வர் டாக்டர் ஆர். நாகராஜன், ஏவிசி பொறியியல் கல்லூரியின் இயக்குநர் செந்தில்முருகன் ஆகியோர் கலந்து கொண்டு மாணவர்களின் புகைப்படக் கலைத் திறனை வாழ்த்தி உரையாற்றினர். இக்கண்காட்சிக்கான அனைத்து விரிவான ஏற்பாடுகளையும் காட்சி தகவல் தொடர்பியல் துறைத் தலைவர் சங்கர் தலைமையில் அத்துறைப் பேராசிரியர்கள், ஆசிரியரல்லா பணியாளர்கள் மற்றும் மாணவர்கள் இணைந்து மிகச் சிறப்பாகச் செய்திருந்தனர்.</p> <h3 style="text-align: justify;">கலைத் திறனுக்குக் கிடைத்த அங்கீகாரம்</h3> <p style="text-align: justify;">காட்சி தொடர்பில் துறை மாணவர்களின் திறமைகளை வெளிக்கொணர்வதற்குச் சிறந்த களமாக அமைந்த இந்த புகைப்படக் கண்காட்சி, புகைப்படக் கலையின் முக்கியத்துவத்தையும், சமூக மாற்றத்திற்கு அது எந்தளவுக்குப் பங்களிக்கிறது என்பதையும் அனைவருக்கும் உணர்த்தும் சிறந்த நிகழ்வாக நிறைவுற்றது.</p>