பாதுகாப்பு கொடுப்பது மட்டும் அரசியல் அல்ல...அதிகாரம் வழங்குவதே சமத்துவம்...! - ஆதவ் அர்ஜுனா

அதாயி கல்விக் குழுமம் சார்பில் நடைபெற்ற மீலாது நபி விழா மற்றும் சமய நல்லிணக்க மாநாட்டில் அமைச்சர் ஆதவ் அர்ஜுனா கலந்து கொண்டு பேசினார். அப்போது, நபிகள் நாயகம் உலகிற்கு எடுத்துரைத்த அன்பு, கருணை, நம்பிக்கை ஆகிய உயரிய கொள்கைகளை நினைவுகூர்ந்ததுடன், சமத்துவம், சமூகநீதி, அதிகாரப் பகிர்வு, கல்வி மற்றும் பெண்களின் முன்னேற்றம் குறித்து விரிவாக எடுத்துரைத்தார். அன்பும் கருணையும் நபிகள் நாயகத்தின் போதனை மீலாது நபி திருநாளை முன்னிட்டு அனைவருக்கும் வாழ்த்து தெரிவித்த அமைச்சர் ஆதவ் அர்ஜுனா, மனிதர்களாகப் பிறந்து குடும்பத்துக்காகவும், சமூகத்துக்காகவும் வாழ்பவர்கள் பலர் உள்ளனர். ஆனால், ஒட்டுமொத்த உலகிற்கும் வழிகாட்டும் செய்தியை வழங்கி வாழ்ந்தவர்கள் மிகச் சிலரே. அந்த வரிசையில், மனிதராகப் பிறந்து இறைத்தூதராக உயர்ந்து, உலக மக்களுக்கு அன்பு, கருணை, நம்பிக்கை ஆகியவற்றை போதித்தவர் நபிகள் நாயகம் என்று தெரிவித்தார். சமத்துவமே சமூகத்தின் அடித்தளம் தனக்கு பல இஸ்லாமிய நண்பர்கள் இருப்பதாகவும், அவர்களிடம் இருந்து இஸ்லாமிய மார்க்கத்தின் சிறப்புகளை அறிந்து கொண்டதாகவும் அமைச்சர் கூறினார். குறிப்பாக, ஓய்வுபெற்ற உயர் நீதிமன்ற நீதியரசர் அக்பர் அலி, இஸ்லாமிய மார்க்கம் தொடர்பான பல்வேறு கருத்துகளை தன்னிடம் பகிர்ந்துகொண்டதாகவும் தெரிவித்தார். காயிதேமில்லத்தின் நீண்டகால கனவு 60 ஆண்டுகளுக்குப் பிறகு நிறைவேறியிருப்பதாகக் குறிப்பிட்ட அவர், பிறப்பின் அடிப்படையில் ஒருவரின் உயர்வு, தாழ்வு தீர்மானிக்கப்படக் கூடாது என்ற அம்பேத்கரின் சிந்தனையை நினைவுகூர்ந்தார். ஒருவர் எந்தச் சாதியில் பிறந்தார் என்பதைக் கொண்டு அவரது கல்வி, வாழ்க்கை, திருமணம் உள்ளிட்டவற்றை தீர்மானிக்கும் நிலை மாற வேண்டும் என்றும், அனைவருக்கும் சம உரிமையும் சம வாய்ப்பும் கிடைக்க வேண்டும் என்றும் வலியுறுத்தினார். மதம், சாதியை கடந்து மக்கள் அளித்த தீர்ப்பு இந்தியா மதச்சார்பற்ற நாடாகவும், சாதி வேறுபாடுகளற்ற சமூகமாகவும் விளங்க வேண்டும் என்பதே அம்பேத்கரின் கனவு என்று தெரிவித்த அமைச்சர், அனைவரும் சமம் என்ற அடிப்படையில்தான் அரசியலமைப்புச் சட்டம் உருவாக்கப்பட்டது என்றும் கூறினார். 2026-ம் ஆண்டு தேர்தல் வெற்றி சாதாரணமான அரசியல் வெற்றி அல்ல என்றும், பெண்கள் மற்றும் இளைஞர்கள் உருவாக்கிய மிகப்பெரிய மாற்றம் என்றும் அவர் தெரிவித்தார். தேர்தலின்போது வேலூர், ராணிப்பேட்டை வழியாக சென்றபோது இஸ்லாமிய சகோதரிகள் அளித்த வரவேற்பை நினைவுகூர்ந்த அவர், இந்த அரசியல் மாற்றத்தில் இஸ்லாமிய மக்களும் இளைஞர்களும் முக்கிய பங்கு வகித்ததாக கூறினார். மக்கள் வேட்பாளர்களின் சாதி, மதத்தைப் பார்க்காமல் வாக்களித்துள்ளதாகவும், குறிப்பாக பெண்கள் இந்த மாற்றத்தில் மிகப்பெரிய பங்களிப்பை வழங்கியுள்ளதாகவும் அமைச்சர் தெரிவித்தார். பாதுகாப்பு மட்டும் போதாது; அதிகாரமும் வேண்டும் அரசியலில் பெரும்பான்மை, சிறுபான்மை என்ற வேறுபாடு இருக்கக் கூடாது என்றும், அனைவரும் சமமான அதிகாரத்துடன் முன்னேற வேண்டும் என்பதே தமிழக வெற்றிக் கழகத்தின் நோக்கம் என்றும் அமைச்சர் கூறினார். இஸ்லாமியர்களுக்கு பாதுகாப்பு வழங்குவோம் என்று கூறுவது மட்டுமே அரசியல் அல்ல என்றும், அவர்களுக்கு உரிய அதிகாரத்தை வழங்குவதுதான் உண்மையான சமத்துவ அரசியல் என்றும் அவர் தெரிவித்தார். அப்துல்கலாமின் வாழ்க்கையை முன்மாதிரியாக குறிப்பிட்டார் முன்னாள் குடியரசுத் தலைவர் ஏ.பி.ஜே. அப்துல்கலாமை உதாரணமாகக் குறிப்பிட்ட அமைச்சர், எளிய குடும்பத்தில் பிறந்து கல்வி மற்றும் அறிவியல் துறையில் சாதித்து நாட்டின் உயரிய பதவியை அடைந்தவர் என்று தெரிவித்தார். அவரது வாழ்க்கையும், சாதனைகளும் இளைஞர்களுக்கு மிகப்பெரிய உத்வேகம் அளிப்பதாகவும், அவரது ‘அக்னிச் சிறகுகள்’ நூலைப் படித்து வளர்ந்ததாகவும் அமைச்சர் கூறினார். கல்வியில் சிறந்து விளங்குவதோடு மட்டுமல்லாமல், விளையாட்டிலும் சாதித்து, பொருளாதாரத்திலும் வலிமையான நிலையை அடைய வேண்டும் என்றும் அவர் வலியுறுத்தினார். அதிகாரத்தை நாமே உருவாக்க வேண்டும் அரசியல் அதிகாரம் என்பது தனிநபருக்கானது அல்ல; ஒட்டுமொத்த சமூகத்தின் முன்னேற்றத்துக்கான கருவி என்று அமைச்சர் தெரிவித்தார். ‘எங்களுக்கு என்ன வேண்டும்?’ என்று பிறரிடம் கேட்கும் நிலையை மாற்றி, ‘எங்களுக்கு என்ன தேவை?’ என்பதை நாமே தீர்மானிக்கும் அளவுக்கு சட்டமன்றம் மற்றும் நாடாளுமன்றத்தில் வலிமையான பிரதிநிதித்துவத்தை உருவாக்க வேண்டும் என்றும் கூறினார். அதிகாரம் கிடைத்தால்தான் சமூகத்தின் அடுத்த தலைமுறைக்கு கல்வி கற்று உயர வேண்டும் என்ற நம்பிக்கையும், பொருளாதார சுதந்திரத்தை அடைய வேண்டும் என்ற எண்ணமும் வலுப்பெறும் என்றும் தெரிவித்தார். தனது வாழ்க்கைப் போராட்டத்தையும் பகிர்ந்தார் தனது சிறுவயது வாழ்க்கையில் சந்தித்த துயரங்களையும் அமைச்சர் ஆதவ் அர்ஜுனா பகிர்ந்துகொண்டார். சிறுவயதிலேயே தாயை இழந்ததாகவும், வறுமையான சூழலில் வளர்ந்ததாகவும் தெரிவித்த அவர், தனக்கு அதிகாரம் கிடைக்கும் காலத்தில் ஊழலற்ற நிர்வாகத்தை உருவாக்க வேண்டும் என்ற எண்ணம் அப்போதே ஏற்பட்டதாக கூறினார். சமூகத்தில் ஒதுக்கப்பட்டவர்கள் தங்களது உழைப்பு மற்றும் கல்வியின் மூலம் உயர்ந்து நிற்க வேண்டும் என்பதே அம்பேத்கரின் கனவு என்றும், அந்தக் கனவை ஒவ்வொருவரும் முன்னெடுத்துச் செல்ல வேண்டும் என்றும் வலியுறுத்தினார். பெண்கள் தைரியமாக முன்னேற வேண்டும் பெண்கள் குடும்ப எல்லைகளைத் தாண்டி கல்வி கற்று, பொதுவாழ்வில் தைரியமாக களம் இறங்கி, சமூகத்திலும் அரசியலிலும் தங்களுக்கான இடத்தை உருவாக்க வேண்டும் என்று அமைச்சர் கேட்டுக்கொண்டார். தனது பெரியம்மா தன்னை கல்வி கற்க ஊக்கப்படுத்தியதையும், அவர் படித்து காவல் பணியில் உயர்ந்த பதவியை அடைந்ததையும் நினைவுகூர்ந்த அமைச்சர், பெண்களும் இளைஞர்களும் அந்த தன்னம்பிக்கையுடன் கல்வி கற்று வாழ்க்கையில் உயர வேண்டும் என்று தெரிவித்தார். அன்பு, சமத்துவம், கல்வி, அதிகாரம் ஆகியவற்றை அடிப்படையாகக் கொண்டு அனைவரும் முன்னேறினால்தான் உண்மையான சமூக மாற்றம் உருவாகும் என்று அமைச்சர் ஆதவ் அர்ஜுனா வலியுறுத்தினார்.