அசாம்: மனைவியைக் கொன்று உடலைத் துண்டு துண்டாக வெட்டி பிரிட்ஜில் வைத்த கணவன் - காவல் நிலையத்தில் சரண்

அசாம் மாநிலம் கவுகாத்தி அருகே உள்ள பாசிஸ்தாபூர் பகுதியில், திருமணமான ஆறு மாதத்தில் இளம் பெண் ஒருவர் கொடூரமான முறையில் கொலை செய்யப்பட்டு சடலமாக மீட்கப்பட்டுள்ளார். 25 வயதான ரியா தாலுக்தார் கோஸ்வாமி என்ற அந்தப் பெண், தனது கணவர் ராமானுஜன் கோஸ்வாமியுடன் வசித்து வந்த அடுக்குமாடி குடியிருப்பில் இருந்து கடுமையான துர்நாற்றம் வீசியதை அடுத்து, அக்கம்பக்கத்தினர் காவல்துறைக்கு தகவல் அளித்தனர். சம்பவ இடத்திற்குச் சென்ற காவல்துறையினர், கதவை உடைத்து உள்ளே சென்று பார்த்தபோது, வீடு முழுவதும் ரத்தக்கறைகளுடன் ரியா துண்டு துண்டாக வெட்டப்பட்ட நிலையில் கிடப்பதைக் கண்டு அதிர்ச்சியடைந்தனர்.

வீட்டைப் பரிசோதித்தபோது, ரியாவின் தலை துண்டிக்கப்பட்டு கருப்பு நிற பாலித்தீன் பையில் சுற்றப்பட்டு பிரிட்ஜில் வைக்கப்பட்டிருந்தது கண்டறியப்பட்டது. மேலும், அவரது கை மற்றும் கால் விரல்களும் துண்டிக்கப்பட்டிருந்தன. கொலைக்கு பயன்படுத்தப்பட்ட கூர்மையான ஆயுதம் மற்றும் மது பாட்டில்களை காவல்துறையினர் கைப்பற்றினர். தடயவியல் நிபுணர்கள் மற்றும் கைரேகை நிபுணர்கள் வரவழைக்கப்பட்டு ஆதாரங்கள் சேகரிக்கப்பட்டன. பேன்சி பஜாரில் பணிபுரிந்து வந்த ரியாவையும், ஊபர் ஓட்டுநரான ராமானுஜனையும் ஆறு மாதங்களுக்கு முன்பு திருமணம் செய்த நிலையில், தம்பதியினரிடையே அடிக்கடி தகராறுகள் ஏற்பட்டு வந்ததாகத் தகவல்கள் தெரிவிக்கின்றன.

கொலை நடந்த பிறகு தலைமறைவாக இருந்த கணவர் ராமானுஜன் கோஸ்வாமி, பின்னர் கவுகாத்தியின் ஹதிகான் காவல் நிலையத்தில் சரணடைந்தார். விசாரணையில் அவர், தனது மனைவியைக் கொன்று தலையை வெட்டி பிரிட்ஜில் வைத்துவிட்டு தப்பிச் சென்றதை ஒப்புக்கொண்டார். 2022-ஆம் ஆண்டு டெல்லியில் நடைபெற்ற ஷ்ரத்தா வால்கர் கொலைச் சம்பவத்தைப் போலவே, அசாமிலும் இந்த கொடூரக் கொலை அரங்கேறியுள்ளது பெரும் அதிர்ச்சியை ஏற்படுத்தியுள்ளது. இந்த வழக்கின் முழுமையான பின்னணி விசாரணைக்குப் பிறகே தெரியவரும் என்று காவல்துறை தரப்பில் தெரிவிக்கப்பட்டுள்ளது.