சூரியோட மண்டாடி படத்தை சீனாவில் வெளியிட்டால் ரூ.1000 கோடி வசூல் செய்யும்.. ‘மண்டாடி’ படத்துக்கு சத்யராஜ் போட்ட சூப்பர் பிளான்!

மதிமாறன் புகழேந்தி இயக்கத்தில் சூரி, சுஹாஸ், சத்யராஜ், மஹிமா நம்பியார் உள்ளிட்டோர் நடிப்பில் உருவாகியுள்ள ‘மண்டாடி’ திரைப்படத்தின் இசை வெளியீட்டு விழா சென்னையில் நடைபெற்றது. இதில் வெற்றிமாறன், சத்யராஜ், ஆர்ஜே பாலாஜி உள்ளிட்ட திரையுலக பிரபலங்கள் கலந்துகொண்டு படக்குழுவினருக்கு வாழ்த்து தெரிவித்தனர். வித்தியாசமான கதைக்களத்தில் உருவாகியுள்ள இப்படம், கடலில் பாய்மரப் படகுகளை வைத்து நடத்தப்படும் போட்டியை மையமாகக் கொண்டுள்ளது. தமிழ் மற்றும் தெலுங்கு மொழிகளில் உருவாகியுள்ள இப்படத்திற்கு ஜி.வி. பிரகாஷ் குமார் இசையமைத்துள்ளார். திட்டமிட்டபடி செப்டம்பர் 10-ஆம் தேதி ‘மண்டாடி’ திரைப்படம் திரையரங்குகளில் வெளியாக உள்ளது. படத்தில் சத்யராஜ் முற்றிலும் வித்தியாசமான தோற்றத்தில் நடித்துள்ளார். இதுகுறித்து இசை வெளியீட்டு விழாவில் பேசிய அவர், தனது நீண்ட திரைப்பயணத்தில் ஏராளமான கதாபாத்திரங்களிலும், பல்வேறு கெட்டப்புகளிலும் நடித்திருந்தாலும், ‘மண்டாடி’ படத்தில் இயக்குநர் தனக்கு கொடுத்துள்ள புதிய தோற்றம் தன்னை ஆச்சரியப்படுத்தியதாக தெரிவித்தார். மேலும், ‘மண்டாடி’ திரைப்படம் ரூ.1000 கோடி வசூல் செய்ய ஒரு ஐடியாவையும் சத்யராஜ் மேடையில் பகிர்ந்துகொண்டார். இந்தியாவில் ‘தங்கல்’ திரைப்படம் ரூ.2000 கோடிக்கும் அதிகமாக வசூல் செய்ததற்கு, அது சீனாவில் வெளியானதும் முக்கிய காரணம் என்று அவர் குறிப்பிட்டார். அதேபோல் சிவகார்த்திகேயனின் ‘கனா’ திரைப்படமும் சீனாவில் வெளியானதை அவர் சுட்டிக்காட்டினார். ‘மண்டாடி’ உலக அளவில் இதுவரை அதிகம் பேசப்படாத வித்தியாசமான கதைக்களத்தைக் கொண்டிருப்பதால், படத்தை சீன மொழியில் டப் செய்து சீனாவிலும் வெளியிட்டால் ரூ.1000 கோடி வசூலை எட்டுவதற்கான வாய்ப்பு இருப்பதாக சத்யராஜ் நம்பிக்கை தெரிவித்துள்ளார். இதனால் இசை வெளியீட்டு விழாவில் சத்யராஜின் இந்த பேச்சு ரசிகர்கள் மத்தியில் கவனம் பெற்றுள்ளது. ‘மண்டாடி’ திரைப்படம் வெளியாகும் நிலையில், படத்தின் வித்தியாசமான கதைக்களமும் சத்யராஜின் புதிய தோற்றமும் ரசிகர்களிடம் எதிர்பார்ப்பை ஏற்படுத்தியுள்ளது.